Rudy prapanuje skaracić adpačynak pa dohladzie dziciaci da dvuch hadoŭ

Adpačynak pa dohladzie dziciaci, praciahłaść jakoha u Biełarusi składaje try hady, možna skaracić da dvuch hadoŭ, ličyć pamočnik prezidenta pa ekanamičnych pytańniach Kirył Rudy.

«Adpačynak pa dohladzie dziciaci ŭ Biełarusi źjaŭlajecca adnym z samych praciahłych — try hady, u Rasii — paŭtara hoda, u Kazachstanie — adzin hod. Efiekt ad praciahłaha adpačynku pa dohladzie dziciaci nieadnaznačny», — piša Rudy ŭ artykule, apublikavanym u apošnim vypusku «Biełorusskoho ekonomičieskoho žurnała».

U liku plusoŭ praciahłaha adpačynku pamočnik prezidenta nazyvaje palapšeńnie zdaroŭja maci i dziciaci, stvareńnie ŭmoŭ dla paśpiachovaha hrudnoha hadavańnia. «Pry hetym bolšaść žančyn na praciahu čatyroch-šaści tydniaŭ adnaŭlajucca paśla rodaŭ, kali niama ŭskładnieńniaŭ. Tamu mnohija jeŭrapiejskija krainy dajuć adpačynak, jaki apłačvajecca, mienavita na hety pieryjad», — kanstatuje Rudy.

Na jaho dumku, praciahły adpačynak pa dohladzie dziciaci maje šerah minusaŭ — admoŭna ŭpłyvaje na kolkaść pracoŭnaj siły, vałavy ŭnutrany pradukt i stvaraje «dadatkovyja stymuły da dyskryminacyi na rynku pracy». «Heta pieraškadžaje nazapašvańniu vopytu i viadzie da bolš nizkich zarobkaŭ dla žančyn. U cełym, na prykładzie AESR dakazana, što adpačynak pa dohladzie dziciaci da adnaho hoda nieabchodny dla paśpiachovaha raźvićcia dziciaci i zabiaśpiečvaje zdaroŭje maci, a adpačynak zvyš dvuch hadoŭ nie maje peŭnych pieravah dla zdaroŭja i raźvićcia», — padkreślivaje Rudy.

Jon ličyć, što apošnija źviestki pakazvajuć na abjektyŭnuju mahčymaść skaracić u Biełarusi adpačynak pa dohladzie dziciaci da dvuch hadoŭ. «Pa-pieršaje, hrudnoje hadavańnie. Dla hrudnoha hadavańnia aptymalnym źjaŭlajecca termin adpačynku dva hady. U Biełarusi 19% dziaciej va ŭzroście da šaści miesiacaŭ byli vyklučna na hrudnym hadavańni, a 41,4% — pieravažna na hrudnym. U siarednim pa respublicy praciahvali znachodzicca na hrudnym hadavańni 27,9% dziaciej va ŭzroście 12—15 miesiacaŭ i 11,5% va ŭzroście 20—23 miesiacaŭ», — kanstatuje Rudy.

Pavodle aficyjnych źviestak, adznačaje jon, 66,1% biełaruskich dziaciej va ŭzroście da šaści miesiacaŭ i 66,5% va ŭzroście da 23 miesiacaŭ znachodzilisia na štučnym hadavańni.

Jašče adzin faktar, jaki havoryć na karyść mahčymaści skaračeńnia adpačynku pa dohladzie dziciaci, — heta daterminovy vychad žančyn na pracu. «Dla zabieśpiačeńnia bolš vysokaha dachodu biełaruskija žančyny časam daterminova vychodziać z adpačynku pa dohladzie dziciaci», — adznačaje Rudy.

Jon źviartaje ŭvahu na toje, što kali ŭ siarednim u apošnija hady ŭ Biełarusi naličvałasia prykładna 110 tysiač rodaŭ za hod, to kolkaść tych, chto daterminova vyjšaŭ z dekretnaha adpačynku, — 14 tysiač (10-13%).

«Takim čynam, trochhadovy dekretny adpačynak paŭnavartasna vykonvaje svaju funkcyju tolki ŭ pieršyja dva hady. Dadatkovy hod źjaŭlajecca, chutčej, vynikam niedachopu daškolnaj infrastruktury, zvyčki, inšych pryčyn, naŭprost nie źviazanych z dohladam dziciaci», — piša Rudy.

Skaračeńnie dekretnaha adpačynku na hod moža zabiaśpiečyć rost ekanomiki na 2,3%, adznačajecca ŭ artykule.

Nahadajem, u kancy 2015 hoda chvalu niezadavolenaści vyklikali słovy sustaršyni Biełaruskaha sajuza žančyn Antaniny Moravaj ab tym, što trochhadovy dekretny adpačynak — heta marnatraŭstva. Paźniej Morava apraŭdvałasia, što jaje słovy nibyta pierakrucili i «try hady ŭ dekrecie — heta dobra».

• 0
• 0
• 0
• 0
• 0
• 0
• 0
• 0