Human Rights Watch: Situacyja z pravami čiełavieka ŭ Biełarusi nie palepšyłasia

Situacyja z pravami čałavieka ŭ Biełarusi nie palepšyłasia. Pra heta havorycca ŭ novym štohadovym dakładzie ab situacyi z pravami čałavieka ŭ śviecie, jaki apublikavany na sajcie pravaabarončaj arhanizacyi Human Rights Watch.

«Alaksandr Łukašenka vyzvaliŭ pa humanistyčnych matyvach šaściarych palityčnych źniavolenych, ale ŭ cełym situacyja z pravami čałavieka ŭ Biełarusi nie palepšyłasia», — adznačajecca ŭ dakładzie.

Human Rights Watch padkreślivaje, što ŭ Biełarusi pa-raniejšamu ŭžyvajecca śmiarotnaje pakarańnie, i ŭ 2015 hodzie nie było zroblena nijakich krokaŭ dla ŭviadzieńnia maratoryja na jaho prymianieńnie.

U krainie praciahvajucca nacisk na aktyvistaŭ i ich zatrymańnie, pieraśled niezaležnych žurnalistaŭ, adznačajuć aŭtary dakładu.

Prezidenckija vybary, jakija prajšli ŭ kastryčniku 2015 hoda, na dumku Human Rights Watch, byli niedastatkova prazrystymi z-za šerahu parušeńniaŭ, u tym liku padčas pracedury padliku hałasoŭ.

Adznačajecca taksama, što, choć Biełaruś pačała pieršy dyjałoh ź ES pa pytańniach pravoŭ čałavieka, ułady pa-raniejšamu admaŭlajucca ad supracoŭnictva sa śpiecdakładčykam AAN pa situacyi ŭ Biełarusi.

Siarod pazityŭnych krokaŭ u dakładzie nazyvajecca padpisańnie Biełaruśsiu kanviencyi ab pravach ludziej ź invalidnaściu. Ale pry hetym adznačajecca, što Biełaruś usio jašče nie zrabiła ŭsich nieabchodnych krokaŭ dla paŭnavartasnaha ŭdziełu ŭ kanviencyi.

Ułady, kanstatujuć aŭtary dakładu, praciahvajuć praktyku advolnych zatrymańniaŭ, vobšukaŭ i pieraśledu apazicyjnych i hramadzianskich aktyvistaŭ. Siarod prykładaŭ jany zhadvajuć vypadak z pravaabaroncaj Alenaj Tankačovaj, jakoj anulavali vid na žycharstva ŭ Biełarusi, a taksama vobšuk u mahiloŭskim ofisie zakrytaha ŭładami pravaabarončaha centra «Viasna» i pieraśled pravaabaronca Leanida Sudalenki.

U dakładzie taksama adznačajecca, što ŭ śniežni 2014 hoda biez hramadskaha abmierkavańnia byli pryniatyja papraŭki ŭ zakon ab ŚMI, jakija nadzialili Ministerstva infarmacyi pravam błakavańnia internet-resursaŭ biez rašeńnia suda. U kancy śniežnia 2014 hoda «ministerstva błakavała dziasiatak internet-sajtaŭ, u tym liku infarmacyjnaha ahienctva BiełaPAN», havorycca ŭ dakładzie.

Human Rights Watch taksama źviartaje ŭvahu na toje, što ŭ Biełarusi praciahvaje dziejničać artykuł Kryminalnaha kodeksa ab zabaronie na ŭdzieł u dziejnaści niezarehistravanaj arhanizacyi.

• 0
• 0
• 0
• 0
• 0
• 0
• 0
• 0