Ekśpierty: Praktyka dziaržpadtrymki ekanomiki ŭ Biełarusi i ES istotna adroźnivajecca

Praktyka dziaržpadtrymki ekanomiki ŭ Biełarusi istotna adroźnivajecca ad isnaj u krainach Jeŭrasajuza i Arhanizacyi ekanamičnaha supracoŭnictva (AESR abjadnoŭvaje raźvityja krainy, jakija pryznajuć pryncypy demakratyi i svabodnaj rynkavaj ekanomiki). Takaja vysnova ŭtrymlivajecca ŭ analityčnaj zapiscy, jakuju padrychtavali ekśpierty Daśledčaha centra IPM i Niamieckaj ekanamičnaj hrupy (GET) u Biełarusi.

Pieršaje, na što źviartajuć uvahu ekśpierty, — toje, što ŭ adroźnieńnie ad jeŭrapiejskich krain, dzie ŭsia statystyka ab dziaržpadtrymcy dastupnaja hramadskaści, Biełaruś takija źviestki nie publikuje. «Realny siektar ekanomiki Biełarusi maje dostup da šyrokaha śpisa subsidyj i dyrektyŭnaha kredytavańnia, jakija vydzialajucca indyvidualna i skažajuć kankurencyju. Poŭnaj statystyki ab abjomach akazanaj padtrymki nie isnuje, a jaje maštaby i strukturu možna acanić tolki častkova», — havorycca ŭ dakumiencie.

Jašče adna asablivaść biełaruskaj praktyki dziaržpadtrymki — heta šyrokaje raspaŭsiudžańnie subsidyj, jakija dziaržava daje pradpryjemstvam. Pavodle acenak aŭtaraŭ daśledavańnia, kali ŭ Biełarusi subsidyi składajuć pryblizna 11% raschodaŭ siektara dziaržaŭnaha kiravańnia, to ŭ krainach AESR — prykładna 3%.

Na dumku ekśpiertaŭ, isnujuć značnyja adroźnieńni i ŭ tym, jak akazvajucca hramadskija pasłuhi i dasiahajucca mety dziaržaŭnych prahram u Biełarusi i ES/AESR. «Paraŭnańnie roli dziaržaŭnaj padtrymki i dziaržaŭnych zakupak pakazała, što Biełaruś u dasiahnieńni metaŭ sacyjalnaj i ekanamičnaj palityki ŭ bolšaj miery raźličvaje na padkantrolny i subsidavany dziaržavaj siektar ekanomiki», — havorycca ŭ daśledavańni.

U adroźnieńnie ad Biełarusi ŭ ekanomicy krain AESR «urad u bolšaj stupieni vystupaje zamoŭcam, a nie pastaŭščykom pasłuh, tavaraŭ i rabot, jakija akazvajucca nasielnictvu ŭ jakaści hramadskich pasłuh».

U Biełarusi ž dziaržaŭnyja prahramy dajuć prefierencyjnyja mahčymaści mienavita dziaržpradpryjemstvam. «U dziaržaŭnych prahramach zachoŭvajecca prefierencyjnaje staŭleńnie da dziaržaŭnych pradpryjemstvaŭ. Niahledziačy na toje što ŭ zakanadaŭstvie dziaržaŭnyja i pryvatnyja pradpryjemstvy nadzielenyja roŭnym dostupam da dziaržaŭnych prahram, mienavita dziaržaŭnyja pradpryjemstvy ŭ niekatorych vypadkach prapisanyja ŭ prahramach u jakaści arhanizacyj-vykanaŭcaŭ», — zaŭvažajecca ŭ dakumiencie.

Ekśpierty rekamiendujuć biełaruskim uładam pavysić efiektyŭnaść dziaržaŭnych prahram. Heta prapanujecca zrabić u tym liku za košt «žorstkaha padziełu instytutaŭ, adkaznych za acenku i vybar prapanavanych mierapryjemstvaŭ, ad dziaržaŭnych ustanoŭ, niepasredna adkaznych za vykanańnie asobnych dziaržaŭnych prahram».

• 0
• 0
• 0
• 0
• 0
• 0
• 0
• 0