U Navahrudskim rajonie hruzavik naśmierć źbiŭ kiroŭcu, jaki stajaŭ na abočynie. Toj niezadoŭha da hetaha za rulom hruzavoha Mercedes nie spraviŭsia z kiravańniem na hetym ža ŭčastku darohi, paviemlaje DAI Hrodna.
Avaryja adbyłasia 16 žniŭnia, kala 6.00, niepadalok ad vioski Kosičy. Na zakruhleńni trasy Navajelnia — Valejeŭka, dzie iduć ramontnyja raboty, kiroŭca hruzavika Mercedes niapravilna vybraŭ chutkaść ruchu, nie spraviŭsia z kiravańniem i źjechaŭ na abočynu. Mužčyna vyjšaŭ z aŭtamabila i byŭ kala jaho.
Prykładna praz hadzinu na hetym ža ŭčastku darohi nie spraviŭsia z kiravańniem jašče adzin kiroŭca hruzavoha aŭto. Aŭtamabil vylecieŭ z darohi, urezaŭsia ŭ Mercedes, što stajaŭ na abočynie, i najechaŭ na kiroŭcu, jaki byŭ pobač. Ad atrymanych traŭmaŭ mužčyna zahinuŭ na miescy zdareńnia.
— Na momant DTZ darožnaje pakryćcio było mokrym praz doždž. Taksama faktaram, jaki paharšaŭ sčapleńnie, źjaŭlaŭsia naniesieny na trasu płast bitumu, — raspaviali ŭ DAI. — Pierad hetym učastkam darohi rabočyja zahadzia vystavili znaki «Časovaje abmiežavańnie chutkaści», «Darožnyja raboty», «Ślizkaja daroha» i «Zvužeńnie darohi».
Papiaredniaja pryčyna avaryi — ihnaravańnie kiroŭcami darožnych znakaŭ.
Kamientary