Staradaŭni park i voziera siadziby Ahinskaha pačnuć adnaŭlać viasnoj

Rekanstrukcyju staradaŭniaha parku i voziera majontka Ahinskaha Zaleśsie pačnuć viasnoj. Adpaviednaje daručeńnie na apieratyŭnaj naradzie ŭ Hrodzienskim abłvykankamie daŭ staršynia Uładzimir Kraŭcoŭ.

Pavialičyć

U rehijonie prapracoŭvali krynicy finansavańnia dla adnaŭleńnia parku i voziera ŭ Zaleśsi, jakija źjaŭlajucca pomnikami historyka-kulturnaj spadčyny. Jak zajaviŭ staršynia, dasiahnutaja damoŭlenaść z Bankam raźvićcia Biełarusi ab finansavańni častki rabot. Uładzimir Kraŭcoŭ daručyŭ u bližejšyja terminy prystupić da budaŭničych prac. Pieršymi na prylehłaj da siadziby terytoryi źjaviacca mielijaratary, hatovaja nieabchodnaja dla hetaha prajektnaja dakumientacyja. Čakajecca, što jany pačnuć pracy pa ačystcy łoža voziera ŭžo ŭ sakaviku ci krasaviku.

Padrychtavanyja dakumienty dla raspracoŭki poŭnaj prajektna-kaštarysnaj dakumientacyi pa rekanstrukcyi parka i voziera. Navukovym kiraŭnikom źjaŭlajecca architektar Ludmiła Ivanova — aŭtar prajekta restaŭracyi samoj siadziby.

Pa słovach načalnika adździeła ideałahičnaj raboty, kultury i pa spravach moładzi Smarhonskaha rajvykankama Taćciany Ražavaj, vyznačany asnoŭnyja kirunki rekanstrukcyi. Akramia mielijaracyjnych rabot, ačystki voziera, płanujecca adramantavać dva hidratechničnyja zbudavańni. Restaŭrujuć u pałacavym styli mietaličny i bietonny mastki nad dambami. Jość ideja pa adradžeńni jašče adnaho stračanaha mosta da astraŭka ŭ centry voziera. Hety mastok i dźvie damy, jakija špacyrujuć pa im, namalavanyja na hraviury Leanarda Chodźki 1822 hoda.

U Zaleśsi chočuć adradzić i abodva parki — anhlijski piejzažny i rehularny francuzski. U pieršym adnoviać aleju praz fruktovy sad, darožki, małyja architekturnyja formy, łavy i mastki. Taksama razabjuć kvietniki z chmyźniakami i kvietkami. Michaił Kleafas lubiŭ kvietki i, ubačyŭšy niejkuju novuju raślinu padčas svaich padarožžaŭ, prasiŭ sadoŭnika pasadzić takuju ž va ŭłasnym sadzie. Rehularny francuzski park byŭ kampazicyjna nieparyŭna źviazany z pałacam i znachodziŭsia pa darozie da jaho, stvarajučy efiektnuju vizualnuju strukturu. Takim jon paŭstanie pierad naviedvalnikami znoŭ — u formie pramavuholnika z hieamietryčnymi ŭzorami z hazonaŭ, kustoŭ i nievysokich dreŭ.

Siadziba ŭ Zaleśsi naležała Ahinskim z ChVIII stahodździa. Francišak Ksaviery Ahinski padaryŭ jaje ŭ 1802 hodzie plamieńniku Michału Kleafasu. Z novym haspadarom majontak atrymaŭ i zusim novaje źniešniaje abličča. U siadzibie, pabudavanaj pa svaim huście, kampazitar razam z žonkaj i dziećmi pravioŭ samyja plonnyja hady žyćcia. Siadziba Zaleśsie adrestaŭravanaja ŭ 2014 hodzie. Muziej-siadziba staŭ papularnym turystyčnym abjektam.

• 0
• 0
• 0
• 0
• 0
• 0
• 0
• 0