Eskizny prajekt vantavaha masta prezientavali bieź jakoha-niebudź tłumačeńnia, jakaja patreba mienavita ŭ takim inžyniernym rašeńni. Śled vyvodzić da ambicyjnych prajektaŭ arabskich inviestaraŭ.
Padčas śviatkavańnia 75‑hodździa Frunzienskaha rajona «BiełdarNDI» pradstaviŭ eskizy vantavaha mosta jak mahčymaha abjekta dla realizacyi ŭ stalicy. Hety rajon nie maje vychadu da Śvisłačy abo inšych šyrokich vadajomaŭ, jakija b patrabavali ŭźviadzieńnia mosta padobnaha typu, prosta sam instytut raźmieščany na terytoryi rajona.
Inžyniernyja zbudavańni takoha typu, dzie darožnaje pałatno trymajecca na stalovych trosach i vysokich piłonach, vyznačajucca nadzvyčajnaj ustojlivaściu da vialikich nahruzak i vietru. Vantavyja masty lepšyja za padviesnyja i belečnyja anałahi pry pierakryćci siarednich i vialikich pralotaŭ, jany chutkija i ekanamičnyja va ŭźviadzieńni, choć i bolš składanyja ŭ raźlikach i prajektavańni. Da taho ž, jany časta robiacca architekturnymi akcentami ŭ haradach.
Raniej nieabchodnaści ŭ pierakryćci vielizarnych pralotaŭ u Minsku naohuł nie było, bo stalica nie maje ni šyrokich rek, ni hłybokich jaraŭ, a puciepravody cieraz čyhunku možna prosta pakłaści na nieabchodnuju kolkaść apor.
Šeść novych pierapraŭ cieraź Śvisłač
U hienieralnym płanie Minska, jaki prachodziŭ hramadskaje abmierkavańnie ŭ 2025 hodzie, zakładziena budaŭnictva prynamsi šaści novych mastoŭ cieraz raku Śvisłač. Niekatoryja ź ich vyrazna akreśleny, pra niekatoryja možna mierkavać pa ŭskosnych detalach hienpłana.
Čatyry ź ich skancentravanyja ŭ paŭdniovaj častcy horada. Prajekty praduhledžvajuć transpartnuju suviaź pamiž Łošycaj i Sierabrankaj praz złučeńnie vulic Stanisłava Maniuški i Malinina, praciah vulicy Plachanava da vulicy Majakoŭskaha krychu na poŭnač ad Łošyckaha parku, a taksama dva masty, što złučać vulicu Jakubava ź Dzianisaŭskaj i terytoryjaj byłoj vioski Stałovaj.
Śvisłač, adzinaja raka ŭ horadzie, pieraprava cieraz katoruju mahła b zapatrabavać značnych inžyniernych vyšukaŭ, u nazvanych miescach davoli vuzkaja. Uźviadzieńnie tam masiŭnych piłonaŭ sa składanaj sistemaj vantaŭ ničym nie apraŭdana.
Jašče dźvie pierapravy zaprajektavanyja ŭ paŭnočnaj častcy stalicy. Adzin most pavinien źjavicca ŭ rajonie Drazdoŭ, a druhi stanie praciaham vulicy Ratamskaj i źviaža paŭdniovy bierah vadaschovišča Drazdy z paŭnočnym.
Mienavita ŭ apošnim vypadku šyrynia vodnaha lusterka takaja vialikaja, kala 600 mietraŭ, što robić uźviadzieńnie vantavaha mosta z tryma vialikimi pralotami technična metazhodnym i vizualna efiektnym.
Infrastruktura dla «Paŭnočnaha Bieraha»
Siońnia na paŭnočnym bierazie vadaschovišča Drazdy ŭradlivyja sielskahaspadarčyja ziemli, jakija doŭha ličylisia niedatykalnymi. Ajčynnyja zabudoŭščyki mahli tolki ablizvacca na hety łasy kavałak u miežach horada, bo vydzialeńnie takich uhodździaŭ pad žyllo dapuskałasia tolki pad asabistuju adkaznaść i vyklučna dla «supierinviestycyjnych prajektaŭ».
Usio źmianiłasia ŭ kancy 2020 hoda, kali źjaviŭsia inviestar z Abjadnanych Arabskich Emirataŭ. Asabistym ukazam Łukašenki z łandšaftna-rekreacyjnaj zony i sielhasuhodździaŭ było vyklučana bolš za tysiaču hiektaraŭ, amal usie ź jakich addali pad šmatkvaternuju žyłuju zabudovu. Miehaprajekt atrymaŭ nazvu «Paŭnočny Bierah».
Aficyjna zajaŭlałasia, što emirackaja kampanija Emaar Properties na čale ź biznesmienam Muchamiedam Ali Ałabaram układzie čatyry miljardy dalaraŭ u stvareńnie vysokatechnałahičnaha «razumnaha horada». Praŭda, vielmi chutka za hetym bliskučym fasadam pačali prahladacca abrysy zabudoŭščyka «Emirejts Blu Skaj», byłoj kampanii «Zomieks Inviestmient», što ščylna źviazanaja z dobra znajomaj biełarusam Dana Holdings.
Kali ž kazać kankretna pra tuju častku, što lažyć akurat na poŭnač ad vadaschovišča Drazdy, to tam u zonu šmatkvaternaj zabudovy pieraviali 316 hiektaraŭ byłoj ralli.
Mienavita hety novy hihancki rajon, dzie zapłanavana ŭźviadzieńnie dziasiatkaŭ tysiač kvater, i musić złučyć vantavy most z adnoj z hałoŭnych haradskich mahistralaŭ — praśpiektam Pieramožcaŭ, a dalej z bujnymi žyłymi masivami zachodniaj častki horada. Pieraprava praz vadaschovišča ŭžo była adlustravanaja na prajekcie detalovaj płaniroŭki «Paŭnočnaha Bieraha», zaćvierdžanym jašče ŭvosień 2022 hoda.
Praŭda, zvyčajna horadabudaŭničyja płany mała što značać i pastajanna źmianiajucca, ale kali za eskizy ŭziaŭsia śpiecyjalizavany prajektny instytut, situacyja vyhladaje kudy bolš realnaj.
Možna mierkavać, što realizacyja składanaha inžyniernaha abjekta źjaŭlajecca častkaj inviestycyjnaj prahramy zabudoŭščyka, jakomu nieabchodna zabiaśpiečyć zručnuju transpartnuju dastupnaść svaich novych kvartałaŭ.
Z horadabudaŭničaha punktu hledžańnia hety most stanie klučavym elemientam transpartnaj arteryi, jakaja paŭkołam achopić usiu zachodniuju častku Minska. Dla realizacyi hetaj mahistrali siońnia ŭžo ŭzvodzicca puciepravod nad čyhunkaj, jaki maje źviazać Ratamskuju vulicu z vulicaj Kaleśnikava ŭ Kamiennaj Horcy.
«Naša Niva» — bastyjon biełaruščyny
PADTRYMAĆCiapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy48
Kamientary
Jany taksama pavinny być na hetym moście, pa schiemach Hienpłana Minska 2025 i PDP Paŭnočnaha Bieraha.
Zdajecca, jość pustaja prastora sprava ad aŭtapałasy, za aharodžaj i linijaj słupoŭ-lichtaroŭ.
Darečy, i pra spynieńnie budaŭnictva mietro treciaj linii na płoščy Banhałor i pieraklučeńnie na praciah kalcavoj linii było viadoma jašče letaś, u čas abmierkavańnia hienpłana.
Čamu tak daviedvajemsia? Jedzie hruzavik pa maršrucie, trasiecca, časam ź jaho vypadajuć uhnajeńni. Voś mietafara infarmavańnia nasialeńnia čynoŭnikami i śpiecyjalistami.