Jak raźmierkavany pa krainie hrošy, jakija biełarusy traciać na kuplu kvater KARTA
Štohadovy abarot srodkaŭ na rynku žyłoj nieruchomaści składaje sotni miljonaŭ dalaraŭ. Kolkaść miascovych i «pryjezdžych» pakupnikoŭ, a taksama łakalny ŭzrovień koštaŭ šmat u čym vyznačajuć tuju sumu, jakuju vydatkujuć na kvatery ŭ kankretnym rehijonie krainy za peŭny pramiežak času. U Minsku pražyvaje piataja častka nasielnictva Biełarusi, a jakaja dola stalicy ŭ ahulnym abjomie vydatkavanych na kvatery hrošaj?
Ličym čužyja hrošy
My sumavali košt usich kvater, jakija fihuravali ŭ ździełkach kupli-prodažu ŭ minułym hodzie. Asobna byŭ padličany abjom rynku ŭ Minsku i abłaściach za vyklučeńniem abłasnych centraŭ i samych bujnych haradoŭ.
Vynikovyja značeńni byli pakazany ŭ vyhladzie nie zusim zvyčajnaj karty Biełarusi. Płošča administracyjnych adzinak źmianiłasia ŭ adpaviednaści z raźličanym abjomam miascovaha rynku prodažu kvater. Miescami karta mocna raściahnułasia, a dzieści, naadvarot, «ścisnułasia».
Minsk i ŭsie astatnija
Status Minska jak ekanamičnaha centra krainy biassprečny, i na karcie nahladna bačna realnaje stanovišča rečaŭ — na stalicu ŭ 2016 hodzie pryjšłosia bolš za pałovu ŭsich srodkaŭ, vydatkavanych biełarusami na kuplu kvater.
Sukupny abjom piaci abłasnych centraŭ akazaŭsia ŭ 3 razy mienšym, čym u staličnaha rynku. Inšyja bujnyja harady razam niedaciahnuli i da 1/5 minskaha abjomu.
Usio, što zastałosia na małyja harady, pasiołki i inšyja nasielenyja punkty, a heta 16% ahulnaha abjomu, taksama raźmierkavana vielmi nieraŭnamierna. Bolš za pałovu ŭsich «abłasnych» hrošaj pryjšlisia ŭ 2016 hodzie na Minskuju vobłaść. Tut znoŭ adbivajecca ŭpłyŭ stalicy, vyražany padvyšanaj aktyŭnaściu pakupnikoŭ i vysokimi koštami na kvatery ŭ pryharadzie Minska.
Kali hladzieć na adroźnieńni pamiž abłasnymi centrami i inšymi bujnymi haradami, to ich možna zbolšaha rastłumačyć roznaj kolkaściu nasielnictva, adnak biez anamalij nie abyšłosia. Tak, abjom rynku prodažu kvater u Hrodnie i Viciebsku pa vynikach 2016 hoda akazaŭsia vyšejšym, čym u Homieli, choć u apošnim pražyvaje na 150 tysiač čałaviek bolš. Heta źviazana ź vielmi słaboj aktyŭnaściu homielskich pakupnikoŭ ŭ 2016-m. U minułyja hady Homiel z zapasam apiaredžvaŭ inšyja abłasnyja centry.
Siarod bujnych haradoŭ Biełarusi źviartaje na siabie ŭvahu vialiki abjom salihorskaha rynka. Adbivajecca toj fakt, što pa darahoŭli žylla Salihorsk sastupaje tolki Miensku.
Upłyŭ kryzisu
U cełym pa krainie dynamika abjomu rynku ŭ apošnija hady mieła kupałapadobnuju formu: rost da 2014 hoda, a zatym — padzieńnie. Pryčym z nadychodam kryzisu abjomy rynku «drabniejuć» u stalicy i rehijonach pa-roznamu.
U Minsku jon skaraciŭsia za dva hady tolki na 16%. Ceny ŭpali značna macniej, ale častku «strat» udałosia kampiensavać rekordnym abjomam ździełak u minułym hodzie.
U rehijonach skaračeńnie było kudy bolšym i za dva hady skłała 38%. Pry hetym u 2016 hodzie ŭ Minsku na kuplu kvater vydatkavali bolš, čym u 2015-m, a ŭ rehijonach padzieńnie praciahnułasia.
Kamientary