Штогадовы абарот сродкаў на рынку жылой нерухомасці складае сотні мільёнаў даляраў. Колькасць мясцовых і «прыезджых» пакупнікоў, а таксама лакальны ўзровень коштаў шмат у чым вызначаюць тую суму, якую выдаткуюць на кватэры ў канкрэтным рэгіёне краіны за пэўны прамежак часу. У Мінску пражывае пятая частка насельніцтва Беларусі, а якая доля сталіцы ў агульным аб'ёме выдаткаваных на кватэры грошай?
Лічым чужыя грошы
Мы сумавалі кошт усіх кватэр, якія фігуравалі ў здзелках куплі-продажу ў мінулым годзе. Асобна быў падлічаны аб'ём рынку ў Мінску і абласцях за выключэннем абласных цэнтраў і самых буйных гарадоў.
Выніковыя значэнні былі паказаны ў выглядзе не зусім звычайнай карты Беларусі. Плошча адміністрацыйных адзінак змянілася ў адпаведнасці з разлічаным аб'ёмам мясцовага рынку продажу кватэр. Месцамі карта моцна расцягнулася, а дзесьці, наадварот, «сціснулася».
Мінск і ўсе астатнія
Статус Мінска як эканамічнага цэнтра краіны бясспрэчны, і на карце наглядна бачна рэальнае становішча рэчаў — на сталіцу ў 2016 годзе прыйшлося больш за палову ўсіх сродкаў, выдаткаваных беларусамі на куплю кватэр.
Сукупны аб'ём пяці абласных цэнтраў аказаўся ў 3 разы меншым, чым у сталічнага рынку. Іншыя буйныя гарады разам недацягнулі і да 1/5 мінскага аб'ёму.
Усё, што засталося на малыя гарады, пасёлкі і іншыя населеныя пункты, а гэта 16% агульнага аб'ёму, таксама размеркавана вельмі нераўнамерна. Больш за палову ўсіх «абласных» грошай прыйшліся ў 2016 годзе на Мінскую вобласць. Тут зноў адбіваецца ўплыў сталіцы, выражаны падвышанай актыўнасцю пакупнікоў і высокімі коштамі на кватэры ў прыгарадзе Мінска.
Калі глядзець на адрозненні паміж абласнымі цэнтрамі і іншымі буйнымі гарадамі, то іх можна збольшага растлумачыць рознай колькасцю насельніцтва, аднак без анамалій не абышлося. Так, аб'ём рынку продажу кватэр у Гродне і Віцебску па выніках 2016 года аказаўся вышэйшым, чым у Гомелі, хоць у апошнім пражывае на 150 тысяч чалавек больш. Гэта звязана з вельмі слабой актыўнасцю гомельскіх пакупнікоў ў 2016-м. У мінулыя гады Гомель з запасам апярэджваў іншыя абласныя цэнтры.
Сярод буйных гарадоў Беларусі звяртае на сябе ўвагу вялікі аб'ём салігорскага рынка. Адбіваецца той факт, што па дарагоўлі жылля Салігорск саступае толькі Менску.
Уплыў крызісу
У цэлым па краіне дынаміка аб'ёму рынку ў апошнія гады мела купалападобную форму: рост да 2014 года, а затым — падзенне. Прычым з надыходам крызісу аб'ёмы рынку «драбнеюць» у сталіцы і рэгіёнах па-рознаму.
У Мінску ён скараціўся за два гады толькі на 16%. Цэны ўпалі значна мацней, але частку «страт» удалося кампенсаваць рэкордным аб'ёмам здзелак у мінулым годзе.
У рэгіёнах скарачэнне было куды большым і за два гады склала 38%. Пры гэтым у 2016 годзе ў Мінску на куплю кватэр выдаткавалі больш, чым у 2015-м, а ў рэгіёнах падзенне працягнулася.
