Karol Niderłandaŭ Vilem-Alaksandr pryznaŭsia, što i paśla ŭstupleńnia na pasad rehularna kiravaŭ samalotam pasažyrskich avijalinij, zastajučysia pry hetym inkohnita. Manarch lataŭ u jakaści druhoha piłota na rejsach KLM, a pasažyry časam paznavali jaho hołas, piša VVS.
Ab tym, što Vilem-Alaksandr piłatuje samaloty, było viadoma da jaho ŭzychodžańnia na tron u 2013 hodzie. Jon sadziŭsia za šturvał adnosna nievialikaha siaredniemahistralnaha Fokker 70 u jakaści «haściavoha piłota», kab zachavać licenziju lotčyka.
Adnak da hetaha času nie było viadoma, što i paśla karanacyi Vilem-Alaksandr dvojčy ŭ miesiac inkohnita pracavaŭ druhim piłotam na pasažyrskich rejsach KLM Cityhopper, daččynaj kampanii KLM.
Jaje pasažyrami, jak praviła, stanoviacca dziełavyja ludzi, jakija nakiroŭvajucca ŭ Brytaniju, Hiermaniju, Narviehiju i inšyja krainy Jeŭropy.
U intervju haziecie De Telegraaf karol raspavioŭ, što źbirajecca praciahnuć kiravać samalotam, a letam projdzie kursy kiravańniem bolš bujnym łajnieram Boeing 737s, na jakija avijakampanija zamianiła Fokker ŭ hetym hodzie.
«Było b pryjemna kali-niebudź pačać latać da novych punktaŭ pryznačeńnia, ź vialikim likam pasažyraŭ, na bolš doŭhija adlehłaści. Na samaj spravie ja mienavita tamu vučusia piłatavać 737», — rastłumačyŭ manarch.
Raniej Vilem-Alaksandr kazaŭ, što kali b jon nie naradziŭsia ŭ pałacy, to chacieŭ by kiravać takim vialikim pasažyrskim samalotam, jak Boeing 747.
Siadajučy za šturvał, karol nie nazyvaŭ svajho imia, źviartajučysia da pasažyraŭ pa hučnaj suviazi, bo druhi piłot nie abaviazany nazyvacca. Akramia taho, jaho składana było paznać ŭ formie i furažcy KLM, raspavioŭ Vilem-Alaksandr u intervju.
«Pieravaha ŭ tym, što ja zaŭsiody mahu ciopła pavitać pasažyraŭ ad asoby kapitana i kamandy. I mnie nie prychodzicca nazyvać svajo imia», — skazaŭ jon.
I ŭsio-tki, pa jaho słovach, niekatoryja pasažyry razumieli, chto znachodzicca ŭ kabinie piłota.
Karol Vilem-Alaksandr ustupiŭ na tron paśla taho, jak jaho maci karaleva Bieatryks u 2013 hodzie adrakłasia ad pasadu. U krasaviku hetaha hoda karalu Niderłandaŭ spoŭniłasia 50 hadoŭ.
Čym siońnia zajmajucca niekali viadomyja hieroi ŽŽ? Spojler: mnohija tak i nie zakinuli błohierstva4
Kamientary