Łukašenka maralna rychtuje Zachad da «novaj» pasłuchmianaj pałaty. Piša ŭ svaim błohu Alaksandar Kłaskoŭski.
"Krykuny tam nie patrebnyja", — tak akreśliŭ Alaksandar Łukašenka svajo bačańnie novaha składu Pałaty na admysłovaj naradzie 22 vieraśnia. Chto majecca na ŭvazie pad krykunami — zdahadajciesia z troch razoŭ.
Uvohule ton narady vyhladaje davoli suvorym. Maŭlaŭ, choć my i zacikaŭlenyja, kab vybary byli pryznanyja, ale nikomu nie dazvolim razhojdać abstanoŭku, niahledziačy na ŭsiu ŭvahu Zachadu da hetaj kampanii.
Druhaja ŭstanoŭka: naziralnikam davać zašmat voli taksama nia treba.
Sa spasyłkaj na sacyjolahaŭ Łukašenka ahučyŭ mierkavanuju ličbu jaŭki vybarnikaŭ — 85%.
Vertykal ŭsio razumieje z paŭsłova. Padtekst tezy, što my robim vybary dla siabie, taki: vy trymajecie adkaz nie pierad Bruselem i Vašynhtonam, a… sami viedajecie, karaciej. Tak što nie padmanvajciesia ekspartnym pijaram pad ehidaj łorda Beła!
Aficyjny kiraŭnik pieraściaroh apazycyju ad planaŭ zrabić uviečary 28-ha "druhi majdan". Naturalna, takija zajavy skiravanyja na toje, kab zadumanaja apazycyjaj płošča atrymałasia jak maha mieniej ludnaj. Što ž da imaviernaści razhonu, to tut fifci-fifci.
Usio ž stvarać brutalnuju karcinku dla zamiežža ŭładam nia chočacca.
Tak što pry małaludnym mitynhu ŭsio moža abyścisia spakojna, chiba što pastfaktum dastanuć arhanizataraŭ drobnymi represalijami.
Uvohule ž aficyjny kiraŭnik maralna rychtuje Zachad da vybaru miž kiepskim i vielmi kiepskim.
Demakratyčnymi zruchami prapanujecca ličyć mienšy adsotak zrazańnia kandydataŭ dy paŭtor "havarkich hałoŭ" pa telebačańni. Miž tym zrazać bolej nie było jak, bo vybary pieratvarylisia b u rymejk savieckaj biezalternatyŭnaści. A piacichvilinki na dziaržaŭnaj televizii jość tolki surahatam svabody słova.
Ci źjaduć zachodniki pilulu, ci pryznajuć prahresam, naprykład, taki "šyroki žest" uładaŭ, jak ułučeńnie ŭ novuju Pałatu dvuch-troch "krykunoŭ"?
Va ŭsiakim razie, spakusa "źlić" biełaruskaje pytańnie jość, i niemałaja.
Jak jość i ryzyka sapraŭdy stracić akno mahčymaściaŭ. Kali Zachad atrasie ruki, dyk tady ŭžo Maskva biez varyjantaŭ voźmie svajo.
Ciapier čytajuć
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju20
Kamientary