U staličnym mikrarajonie Sierabranka na praciahu dvuch dzion zafiksavanyja dva fakty napadu na žančyn. Pravaachoŭniki vyśviatlajuć usie akaličnaści złačynstvaŭ. Pra heta TUT.BY paviedamiŭ aficyjny pradstaŭnik Śledčaha kamiteta Siarhiej Kabakovič.
U haradskich pablikach raspaŭsiudžvajecca infarmacyja ab niekalkich vypadkach napadu na žančyn u staličnym mikrarajonie Sierabranka. U milicyi aścierahajucca vydavać infarmacyju — praź niebiaśpieku naškodzić apieratyŭna-vyšukovym mierapryjemstvam.
U Śledčym kamitecie infarmacyju ab napadach paćvierdzili, ale padkreślivajuć — pakul nieviadoma, ci byli napady ździejśnienyja adnym i tym ža čałaviekam.
Pravaachoŭnym orhanam viadoma ab dvuch vypadkach - nieviadomy mužčyna napaŭ na dziaŭčynu ŭ rajonie vulicy Jakubava nočču 5 studzienia. Jašče adzin vypadak adbyŭsia praz sutki — na toj ža vulicy, ale pobač z druhim domam, nieviadomy mužčyna napaŭ na 43-hadovuju žančynu.
«Pa dadzienych faktach u milicyju pastupiła dźvie zajavy. Na padstavie ich zaviedzieny kryminalnyja spravy, pracujuć ekśpierty i śledčyja. Adznačym, što pakul u dadzieny momant my nie možam śćviardžać, što havorka idzie pra sieryju napadaŭ - mahčyma, heta nie źviazanyja adzin z adnym złačynstvy», - adznačyŭ Siarhiej Kabakovič.
U Śledčym kamitecie taksama zaklikali da razumnaj aściarožnaści.
«Varta paźbiahać lesaparkavych zon u ciomny čas sutak i źvieści pieramiaščeńni ŭ načny čas da minimumu. Taksama varta vybirać maršrut nie karotki, a biaśpiečny — pierasoŭvacca pa aśvietlenych vulicach, paźbiahać ciomnych dvaroŭ, pustak, doŭhich płatoŭ pramysłovaj zony, prachodaŭ pad mastami i estakadaŭ dy hetak dalej. Taksama pažadana, kab žančynu, jakaja viartajecca pozna ŭnačy dadomu, sustrakaŭ jaje muž abo svajak», - dali rekamiendacyi ŭ SK.
U viedamstvie padkreślili, što nie varta vychodzić na vulicu ŭ niećviarozym stanie, a kali da vas hruba źviartajucca abo robiać vas abjektam kpinaŭ, nie varta adkazvać i paddavacca na pravakacyi.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro4
Kamientary