Vielmi prosta — naziralnikaŭ ABSE treba ciahnuć u bufety, jakija dziejničajuć pry vybarčych učastkach. Feljeton Lolika Uškina.
Tavaryšy, naziralnik ABSE, usie siudy. Heta bufet, abaviazkovaja častka kožnaha vybarčaha ŭčastku. Pahladzim, jakaja tut sytuacyja z vybarami? Jak bačym, usio poŭnaściu adpaviadaje mižnarodnym standartam. Tatalny idejny pluralizm: pretendenty sprava — johurt i piva, na krajnim levym flanhu — sasiski, i narešcie ŭ centry — čypsy i minerałka
Bufet pracuje tolki ŭ dzień vybaraŭ, i zhodna z našymi zakonami kateharyčna zabaraniajecca papiaredniaje pajadańnie.
Usiu infarmacyju vybarščyk moža pračytać na etykietkach. Akramia taho, kali vy ŭklučycie televizar, vy budziecie prosta šakavanyja zasillem vybarčaj reklamy.
Vybary i prymus — u Biełarusi heta hučyć jak fantastyka. Zabaraniajecca luby cisk na vybarščyka. Ciažka ŭjavić, kab niechta najechaŭ na vybarščyka z słovami kštałtu: «A nu davaj vybiraj voś toje piačeńnie, pakul u łyč nie atrymaŭ». Heta nonsens! Pra vybarčuju aktyŭnaść kazać nia budu: hladzicie sami, kolki vybarščykaŭ u čarzie.
Darečy, chaciełasia ŭ reale raźviejać papularny mif pra toje, što vybary ŭ nas adbyvajucca pa raznaradcy. Byccam pracoŭnych i studentaŭ prymušajuć iści i abirać, pahražajučy im parvać kantrakt ci vykinuć z univeru. Voś tyja maładyja ludzi, napeŭna, studenty. Chłopcy, vy nabyvajecie «Orbit‑ananas» tamu, što baiciesia stracić miesca ŭ internacie? Bačycie reakcyju. Moładź śmiajecca z «kačak» zachodniaj prapahandy.
Idziem dalej. Źviarnicie ŭvahu, jak dobra raźvity ŭ našaj krainie instytut niezaležnych naziralnikaŭ. Pradstaŭnik luboj partyi, u tym liku apazycyjnaj, moža pryjści, sieści za stolik i nazirać za vybarčym pracesam. Davajcie dla prykładu arhanizujem niezaležnaje nazirańnie za tym taŭstunom. Hladzicie: jon bieź nijakich parušeńniaŭ abiraje doktarskuju kiłbasu.
Narešcie jašče adzin zabojny arhument na karyść tezisu ab demakratyčnaści hałasavańnia ŭ Respublicy Biełarusi. Luboje sacyjalahičnaje ahienctva abo ŚMI moža arhanizavać h.z. ekzyt‑poł — spytać ludziej na vychadzie z bufetu — što jany abrali na pieršaje, a na desert?
Jak tolki bufet začynicca, pradaŭščyca padviadzie vyniki vybaraŭ. Adnak dla vas, šanoŭnyja naziralniki, my padrychtavali siurpryz. Jak vam viadoma, u hetym hodzie my ŭvieś čas idziem na śviadomaje parušeńnie zakonaŭ, kab pierakanać vas u prazrystaści vyjaŭleńnia voli biełarusaŭ. Pasprabujem tajna daviedacca, jakaja ŭžo ciapier sytuacyja ŭ planie elektaralnych sympatyj?
Tavaryš pradaviec, ci nie mahli b Vy pa sakrecie padzialicca z nami infarmacyjaj — na čyju karyść ciapier vybar? Kažacie, što bolš za ŭsio vybarščyk nadaje pieravahu vaflam? Adnak, na Vašu dumku, pra kančatkovyja vyniki vybaraŭ kazać jašče rana. Čamu? Aha. Tamu što bližej da viečara aktyvizujecca sacyjalnaja baza kandydata piva «Krynica» i mahčymyja źmieny. Voś bačycie, spadarstva, jakaja zachaplalnaja intryha časam maje miesca na biełaruskich vybarach.
A naš vizyt na hetym skončany. Miarkuju, što ŭ vas niama sumnievaŭ nakont vysokaj stupieni demakratyčnaści vybarčaha pracesu.
Baj‑baj.
-
«Nie było b BNF — nie było b i siesii. Nie sabralisia b na jaje kamunisty». Navumčyk rezka adkazaŭ «abviarhacielu» Cyhankovu
-
«Liryka pra toje, što 25 žniŭnia 1991 hoda niechta pryhoža vystupiŭ, i ŭsie pamianiali svaje pohlady — heta dla mastackaha kino»
-
Taćciana Zamiroŭskaja napisała, čamu jana prychodzić u kamienty da ludziej, jakija staviać u siabie ŭ sacsietkach pasty, napisanyja ŠI
Kamientary