Minharvykankam uchvaliŭ vyhlad doški ŭ honar abviaščeńnia niezaležnaści BNR, ale dazvołu na ŭstalavańnie niama
Mastackaja rada Mienharvykankamu zaćvierdziła vyhlad doški dla doma na vulicy Vaładarskaha, 9, u jakim 100 hadoŭ tamu była abvieščana niezaležnaść Biełaruskaj Narodnaj Respubliki, piša «Radyjo Svaboda».
Pra hetaje rašeńnie paviedamiŭ Svabodzie staršynia Sajuzu mastakoŭ Ryhor Sitnica. Pavodle jahonych słovaŭ, dazvołu na ŭstalavańnie doški pakul niama.
«Mastacki saviet zaćvierdziŭ došku amal biez zaŭvah. Ale ŭ mianie pakul niama dakumentu, dzie było b napisana, što pryniataje rašeńnie jaje ŭstalavać. Ale toje, što horad pajšoŭ na toje, kab jaje pryniać, — heta ŭžo paciapleńnie. Zaŭtra ci paśla śviataŭ ja budu źviazvacca z kiraŭnictvam horadu i pytacca pra dalejšyja dziejańni», — skazaŭ Ryhor Sitnica.
Hrošy na bronzavy varyjant doški zamiest sastarełaha aryhinału, zroblenaha ŭ 1993 hodzie skulptaram Alesiem Šaternikam, sabrali za try hadziny. Ustalavać došku mierkavali da 25 sakavika na domie na vulicy Vaładarskaha, 9 u Miensku — mienavita tut była padpisanaja Treciaja Ŭstaŭnaja hramata, jakaja abviaščała BNR niezaležnaj dziaržavaj. Pasiedžańnie Mienharvykankamu, na jakim šyldu mieli zaćvierdzić, adkładałasia amal dva tydni.
26 lutaha kiraŭnik hałoŭnaha ŭpraŭleńnia idealahičnaj pracy, kultury i spravach moładzi Mienharvykankamu Pavieł Skałaban prapanavaŭ 26 lutaha Ryhoru Kastusiovu abmierkavać ustalavańnie pamiatnaj šyldy pad adrasie Vaładarskaha, 9. Planavałasia, što adkryćcio doški ŭ honar abviaščeńnia niezaležnaści BNR stanie kampramisam pamiž Mienharvykankam i arhkamitetam śviatkavańnia 100 hod BNR: ułady ŭstalujuć šyldu, kali arhkamitet pahodzicca na praviadzieńnie tolki kancertu 25 sakavika la Opernaha teatru, piša «Svaboda».
Kamientary