U Biełarusi siońnia aficyjna adznačać Radaŭnicu — dzień paminańnia pamierłych. Va Ukrainie taki dzień — Pravadnaja niadziela, pieršaja niadziela paśla Paschi. Mienavita tady ukraincy naviedvajuć mohiłki, tam adbyvajucca paminalnyja malitvy, aśviačajucca mahiły. Tradycyja prychodzić na mohiłki da prodkaŭ mienavita ŭ Pravadnuju niadzielu šyroka isnuje, da słova, i ŭ Biełarusi, a mienavita, na Brestčynie.
Uvohule, va Ukrainie sutyknulisia z prablemaj, jakaja ŭ peŭnaj stupieni charakternaja i dla Biełarusi: niedachop miesca dla novych pachavańniaŭ na isnujučych mohiłkach i niedachop miescaŭ dla raźmiaščeńnia novych mohiłak. Kab vyrašyć jaje, prapanujecca novy zakon, jaki praduhledžvaje mahčymaść pachavańnia ludziej nie tolki na mohiłkach, ale i ŭ inšych miescach, u pryvatnaści, u parkach i skvierach, inšych ziamielnych učastkach.
Zhodna z zakonaprajektam, u nasielenych punktach dazvalajecca advodzić miesca pamierłym nie tolki na terytoryjach mohiłak, ale i ŭ parkach, lesaparkach, parkach kultury i adpačynku. Ale heta musiać być bijapachavańni.
Bijapachavańnie — heta raznavidnaść pachavańnia z vykarystańniem materyjałaŭ, jakija raskładajucca na praciahu piaci hadoŭ. Nad takim miescam pachavańnia ustaloŭvajuć tolki infarmacyjnuju tabličku — nijakich nadmahilnych zbudavańniaŭ ustaloŭvać budzie nielha.
Kamientary