U śmiarotnaj avaryi pad Minskam padazrajuć rasijskaha błohiera. Jon choča patreniravacca pierad śledčym ekśpierymientam, kab nie sieści

Fota: UDKSE Respubliki Biełaruś pa Minskaj vobłaści

1 žniŭnia telehram-kanał «Biespoŝadnyj piarŝik» paviedamiŭ, što rasijski błohier Illa Rubcoŭ źbirajecca padmanuć biełaruskich śledčych. Ścisła historyja takaja: Rubcova padazrajuć u tym, što, padarožničajučy pa Biełarusi, jon naśmierć źbiŭ čałavieka na trasie Minsk — Maskva. Błohieru treba budzie prajści śledčy ekśpierymient, ale jaho ŭłasny aŭtamabil Renault Sandero raźbity. Tamu kiemlivy małady čałaviek šukaje takuju ž mašynu, kab patreniravacca pierad spatkańniem sa śledčymi, piša Jeŭraradyjo.

«Biespoŝadnyj piarŝik» pryvodzić skrynšoty, nibyta zroblenyja sa staronki Illi Rubcova ŭ «Fejsbuku».

Pavialičyć

«Mnie treba budzie śledčy ekśpierymient. Śledčy apisaŭ tolki adnu častku (druhuju, statyčnuju), advakat upeŭnieny, što spačatku budzie jašče inšaja. Spačatku mnie treba budzie prajechać z zakrytym śpidomietram z toj chutkaściu, jakaja była ŭ momant avaryi. Pa adčuvańniach. Try razy i potym vybrać samy padobny. Zatym statyčnaja častka: mašyna stanovicca ad umoŭnaha miesca avaryi na adlehłaści, jakuju ja prajazdžaŭ za 1,2… 5 siekund z toj chutkaściu, ja i paniatyja pavinnyja budziem u kožny z hetych razoŭ pasprabavać razhledzieć na darozie statysta, jaki hraje rolu paciarpiełaha».

Miarkujučy sa źmieście skrynšotaŭ, Rubcoŭ spadziajecca, što ŭbačyć statysta z 25-27 mietraŭ, «pakolki ŭ heta ŭkładvajecca i prypynačny šlach pry chutkaści 70 km/h». Akazvajecca, błohier nie viedaŭ, što kiroŭcam sa stažam kiravańnia mienš za dva hady ŭ Biełarusi možna jechać z chutkaściu, jakaja nie pieravyšaje 70 kiłamietraŭ. A pravy jon atrymaŭ mienš za dva hady tamu — u listapadzie 2016-ha.

Pavialičyć

Śmiarotnaje DTZ, pra jakoje idzie havorka, adbyłosia 30 lipienia kala 1:00 u Barysaŭskim rajonie. Aŭtamabil marki Renault Sandero, za rulom jakoha znachodziŭsia 33-hadovy kiroŭca, naśmierć źbiŭ 26-hadovaha piešachoda. Mašyna ruchałasia ad Minska da miažy z Rasijaj.

Aficyjnaja pradstaŭnica Śledčaha kamiteta Biełarusi Julija Hančarova paćvierdziła Jeŭraradyjo, što aŭtamabilem kiravaŭ hramadzianin RF Illa Rubcoŭ:

«Tak, heta sapraŭdy toj čałaviek, pra jakoha vy kažacie. Kateharyčna kazać «ździejśniŭ najezd» pakul rana, pa hetaj kryminalnaj spravie jon źjaŭlajecca padazravanym. Da jaho ŭžytaja pracesualnaja miera prymusu — abaviazańnie ab jaŭcy. Jon u Biełarusi, kantaktuje sa śledčym i ŭdzielničaje ŭ pracesualnych dziejańniach».

Pa fakcie zdareńnia pačataja kryminalnaja sprava pa častcy 2 artykuła 317 Kryminalnaha kodeksa — parušeńnie praviłaŭ darožnaha ruchu ci ekspłuatacyi transpartnych srodkaŭ, što paciahnuła pa nieaściarožnaści śmierć čałavieka. Julija Hančarova taksama paćvierdziła Jeŭraradyjo, što Rubcova čakaje aŭtatechničnaja ekśpiertyza, padčas jakoj budzie vyznačana, ź jakoj chutkaściu ruchaŭsia aŭtamabil padčas DTZ.

Miarkujučy pa dopisach u sacsietkach, razam z Rubcovym u Biełaruś pryjechaŭ jaho siabar — IT-žurnalist Ivan Źviahin. Imavierna, jon byŭ u mašynie Rubcova padčas DTZ.

Pavialičyć

My datelefanavalisia da Ivana Źviahina, adnak jon nie staŭ słuchać našych pytańniaŭ: «Nie, da pabačeńnia, usiaho dobraha». Sam ža Illa Rubcoŭ na zvanki Jeŭraradyjo nie adkazaŭ.

• 0
• 0
• 0
• 0
• 0
• 0
• 0
• 0