Jak siłaviki atrymali dostup da telehrama redaktara Tut.by? Mahčymyja varyjanty

U materyjałach «spravy BiełTA» jość infarmacyja, atrymanaja siłavikami z telehram-akaŭnta redaktara Tut.by Dźmitryja Bobryka — praź jaho akaŭnt siłaviki atrymali dostup da redakcyjnych čataŭ.

Pra heta stała viadoma padčas sudovaha pasiedžańnia, adznačaje sajt Biełaruskaj asacyjacyi žurnalistaŭ.

Pavialičyć

Čytajcie. Žurnalist Tut.by Dźmitryj Bobryk: Padčas dopytu ŭ Śledčym kamitecie mianie šantažom zavierbavali

Jakim čynam siłaviki zmahli atrymać dostup da akaŭnta? Ličycca ž, što Telehram harantuje kanfidencyjnaść pierapisak. Tamu davajcie raźbiaromsia. 

Sajt BAŽ paviedamlaje, što ŭ spravie fihuruje pierapiska razmovaŭ, jakija adbylisia ŭžo paśla padziej 7 žniŭnia, kali pačalisia zatrymańni. 

Tamu pieršaj i najbolš imaviernaj viersijaj vyhladaje toje, što siłaviki ŭvajšli ŭ akaŭnt Bobryka praz kanfiskavanuju techniku, a jon pa niejkich pryčynach nie zaŭvažyŭ aktyŭnych siesij ź inšaj pryłady i nie adklučyŭ ich [Telehram, jak i niekatoryja inšyja miesiendžary, daje mahčymaść adsačyć aktyŭnyja padklučeńni — Red.].

Sychodziačy z hetaj viersii, možna padumać, što žurnalist nie nadta pierajmaŭsia zaparolvańniem i šyfravańniem infarmacyi na svaich devajsach. 

Druhaja ž imaviernaja viersija praduhledžvaje bolš aktyŭny ŭdzieł siłavikoŭ. Sprava ŭ tym, što pryviazka telehrama da numara telefona daje siłavikam mahčymaść zaleźci ŭ akaŭnt.

Jak pracuje hety ałharytm? Śledčyja abhruntoŭvajuć svaju pavyšanuju ŭvahu da peŭnaj piersony pierad prakuroram, i toj daje dabro na takoje kanfidencyjnaje nazirańnie. Pry najaŭnaści sankcyi prakurora i paśla zapyta apieratyŭnika, mabilny apieratar nie moža admovicca pradastavić siłavikam u apieratyŭnych metach kłon sim-karty, da jakoj moža być pryviazany telehram-akaŭnt.

Umoŭna kažučy, unačy, kali čałaviek chutčej za ŭsio śpić, z kłona sim-karty siłaviki mohuć zajści ŭ akaŭnt i vyhruzić usiu patrebnuju infarmacyju. Dalej jany mohuć jak vyjści z akaŭnta, tak i zastacca ŭ im, čytajučy pierapisku ŭ režymie realnaha času.

Padobnyja precedenty fiksavalisia ŭ Rasii, kali siłaviki pieraśledavali paplečnikaŭ Alaksieja Navalnaha.

Zaścierahčysia ad takoha ŭvachodu možna, pastaviŭšy ŭ naładach pryvatnaści padvojnuju aŭtaryzacyju — heta aznačaje, što pry sprobie zajści ŭ telehram ź jakoj-niebudź pryłady treba budzie ŭvieści dadatkovy parol. 

Treci varyjant praduhledžvaje, što stvaralniki prahramy pieradali infarmacyju pa zapycie biełaruskich siłavikoŭ.

Pryncypovaja reč u tym, što nieviadoma, dzie i kim nasamreč zachoŭvajecca infarmacyja, pieradadzienaja praz Telehram — naprykład, na Zachadzie mała daviarajuć prahramie, stvoranaj hramadzianinam Rasii Paŭłam Duravym. Miesiendžar papularny tolki ŭ niekatorych postsavieckich krainach, a taksama ŭ šerahu azijackich aŭtakratyj.

Varta dadać, što i astatnija miesiendžary nie dajuć stopracentnaj harantyi taho, što infarmacyja ŭ vyniku nie traplaje da śpiecsłužbaŭ.

Telehram raniej zajaŭlaŭ, što admoviŭsia ad svajoj palityki biezumoŭnaj ananimnaści i budzie pradastaŭlać siłavym orhanam infarmacyju ab karystalnikach — ale havorka, nibyta, tolki pra IR adrasy i ŭ vypadkach vyraznych dokazaŭ teraryzmu. Usie vydadzienyja dadzienyja abiacajuć apubličvać raz na paŭhoda. 

Sam Dźmitryj Bobryk pakul nie prakamientavaŭ situacyju.

• 0
• 0
• 0
• 0
• 0
• 0
• 0
• 0