ZŠA pavinny zrabić bolš žorstkim padychod u dačynieńni da Rasii, kab jaje kiraŭnictva źmianiła palityku na mižnarodnaj arenie. Pra heta ŭ čaćvier, 9 lipienia, zajaviŭ były namieśnik pamočnika ministra abarony ZŠA pa Jeŭropie i NATA Jan Bžezinski — syn byłoha daradcy pa nacbiaśpiecy prezidenta ZŠA Źbihnieva Bžezinskaha, piša rbc.ru.
«Ciaham apošnich 15 hadoŭ adkaz Zachadu, u tym liku ZŠA, na rasiejskuju aktyŭnaść uklučaŭ u siabie abmiežavanyja miery cisku, takija jak ekanamičnyja sankcyi i adpraŭka vajskoŭcaŭ [u Jeŭropu razam z] niadoŭhaterminovaj dypłamatyčnaj izalacyjaj. <…> Usio heta nie pryviało da źmianieńnia [Uładzimiram] Pucinym svajho kursu i, vierahodna, navat nadało jamu advahi», — skazaŭ jon padčas słuchańniaŭ u pałacie pradstaŭnikoŭ.
Złučanym Štatam treba admovicca ad pałavinistaha padychodu da Rasii i pryniać žorstkija miery dla jaje strymlivańnia, pierakanany Bžezinski. Pa-pieršaje, pavodle jaho słoŭ, NATA pavinna naraścić hatoŭnaść da ŭdziełu ŭ kanfliktach vysokaj stupieni intensiŭnaści, uličvajučy kancentracyju vajennaj siły Rasii na ŭschodnich miežach aljansu. Sajuźnikam Vašynhtona ŭ Jeŭropie varta praciahvać umacoŭvać svaje vajennyja siły, a ZŠA — pieradysłacyravać bolš vojskaŭ va ŭschodniejeŭrapiejskija krainy na pastajannaj asnovie. Pa-druhoje, ZŠA pavinny bolš aktyŭna spryjać ustupleńniu Hruzii i Ukrainy ŭ NATA, paraiŭ Bžezinski. Pa-treciaje, amierykanskaje kiraŭnictva pavinna bolš žorstka spyniać sproby Rasii pašyryć niedakładnuju infarmacyju. Pa-čaćviortaje, Vašynhtonu varta zrabić bolš žorstkimi sankcyi suprać Rasii — pryčym jak abmiežavańni suprać kankretnych asob, tak i suprać siektaraŭ ekanomiki.
Uładzimir Pucin — prahmatyčny palityk i źmienić svaje pavodziny pad naciskam novaj chvali abmiežavalnych mier, zapeŭniŭ Bžezinski čalcoŭ pałaty pradstaŭnikoŭ. Pry adsutnaści cisku rasiejski lidar budzie tolki prymać ŭsio bolš ryzykoŭnyja dziejańni, upeŭnieny były čynoŭnik.
Padčas słuchańniaŭ krytykavaŭ Rasiju i namieśnik staršyni kamiteta pałaty pradstaŭnikoŭ pa zamiežnych spravach Majkł Makkoł. Pavodle jaho słoŭ, ZŠA varta surjozna pastavicca da paviedamleńniaŭ u ŚMI pra toje, što Rasija prapanoŭvała talibam uznaharodu za zabojstva amierykanskich sałdat. Na dumku Makkoła, heta adpaviadała b reputacyi i charaktaru dziejańniaŭ rasiejskaha kiraŭnictva, jakoje imkniecca destabilizavać krainy Zachadu.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»36
Kamientary