Advakatka Ludmiła Kazak praciahnie abaraniać Maryju Kaleśnikavu. Svajo zatrymańnie i sud jana tłumačyć sprobaj akazać na jaje cisk, piša Svaboda.
«Adbylisia tolki stanoŭčyja dla spravy padziei, jakija, naturalna, možna skarystać na karyść abarony. Heta jak minimum paćviardžaje toje, što adbyvałasia ź joj (Maryjaj Kaleśnikavaj — red.). Pryčym vielmi krasamoŭna paćviardžaje, bo dziejańni majuć adnolkavy charaktar. Budziem dumać, jak potym vykarystoŭvać cisk na abaronu na karyść jaje abarony pa spravie», — kaža Ludmiła Kazak.
Advakatku Ludmiłu Kazak, jakaja abaraniaje siabra Kaardynacyjnaj rady Maryju Kaleśnikavu, pakarali štrafam u 675 rubloŭ za niepadparadkavańnie supracoŭnikam milicyi. Ludmiła Kazak raskazała na sudzie, što jaje siłaj zatrymlivali troje ludziej u maskach, adzin ź jakich u formie AMAPu. Jany nie pradstaŭlalisia i nie patłumačyli pryčynu zatrymańnia. Paśla advakatku advieźli ŭ Centralny RUUS.
Ludmiła Kazak źviazvaje svajo zatrymańnie, sud i pakarańnie štrafam «tolki sa sprobaj akazać na jaje ŭździejańnie» z pryčyny abarony Maryi Kaleśnikavaj.
Padčas zatrymańnia ŭ advakatki byli z saboj materyjały pa spravie Kaleśnikavaj.
«Padčas asabistaha vobšuku ŭ mianie hetyja materyjały apisali, specyjalnyja paki, daśje. Ja zapisała ŭ pratakole, što heta advakackaja tajna i što majo zatrymańnie jakraz i było nahodaj, kab uleźci ŭ hetyja materyjały i pasprabavać niešta adšukać, siarod inšaha i ŭ maim telefonie. Heta ŭsio lažała ŭ majoj sumcy, tamu chto što potym rabiŭ u majoj sumcy, zastajecca tolki zdahadvacca. Padčas źmiaščeńnia mianie ŭ «stakan» u RUUS ci ŭ kameru ŭ IČU na Akreścina ŭsio heta znachodziłasia niedzie ŭ ich. Nichto nie zajaŭlaje, što jany korpalisia ŭ maich rečach, ale heta vidavočna, bo navošta tady mianie treba było zatrymlivać?»
Advakatka kaža, što kali viarnuli jaje rečy paśla vyzvaleńnia, telefon byŭ adklučany, ale za čas źniavoleńnia ciaham bolš čym paŭtara sutak jana nia viedaje, «što ź im rabili, chto tudy rabiŭ dostup, heta treba praviarać». Jana kaža, što ŭsie materyjały, jakija byli ŭ jaje z saboj pa spravie Kaleśnikavaj, viarnuli, ale nie vyklučaje što «daśje mahło być skapijavana».
Advakatka kaža, što praciahnie abaraniać Maryju Kaleśnikavu, budzie miž inšym padavać chadajnictva ab spynieńni jaje kryminalnaha pieraśledu.
Paśla vyzvaleńnia Ludmiła Kazak prademanstravała žurnalistam skarhu, napisanuju na kavałku tkaniny, bo papiery dla skarhi nie dali. Hetu skarhu napisała adna ź jaje sukamernica — biełaruska sa Švajcaryi Natalla Chierše, jakuju aryštavali na 15 sutak za ŭdzieł u žanočym maršy ŭ Miensku.
«Heta byŭ kavałačak tkaniny, ja nia viedaju adkul jon tam uziaŭsia ŭ kamery, albo kavałak praściny ci anučy. Na nieadnarazovyja patrabavańni dać papieru i asadku, kab napisać skarhu, administracyja nie adreahavała. Tamu Natalla znajšła taki sposab jaje napisać. Potym, kali ja ŭžo była ŭ kamery, my znoŭ patrabavali prynieści papieru — papieru prynieśli, a jak jany prymuć skarhu, heta treba praviarać. Heta cudoŭny prykład tamu, jak tyja, chto znachodzicca tam, pry adsutnaści advakata nia majuć mahčymaści rasparadzicca svaimi pravami».
Ludmiła Kazak raspaviała pra ŭmovy ŭtrymańnia ŭ kamery, u jakoj było 5 čałaviek.
«Škło ŭ voknach nieprazrystaje, ščylnaje i praź ich nie pranikaje śviatło, na ich ustalavana drobnaja sietka, vokny nie adčyniajucca. Tamu kamera nie pravietryvajecca, uvieś čas haryć centralnaje aśviatleńnie. Z tak zvanaha sanvuzła idzie prosta nievynosny pach amijaku, ad jakoha prosta balić hałava. Adsutnaść pravietryvańnia i hety pach heta prosta katavańnie, bo znachodzicca ŭ kamery prosta niemahčyma. Da taho ž nie vyvodziać na prahułku na śviežym pavietry, chacia ŭ źniavolenych jość takoje prava. Takim čynam jany tolki jašče bolš paharšajuć znachodžańnie tam».
Pavodle Ludmiły Kazak, u IČU nie dajuć hihijeničnych srodkaŭ i srodkaŭ dla pryborki kamery.
«Dajuć praścinu, adnu navałačku i koŭdru. Ja ciapier čuchajusia, nia viedaju čym heta skončycca.Taksama ŭsim vydajuć tapki (nia viedaju, chto im ich šyje) adnaho pamieru, jakija nieabchodna abuć, i zrazumieła, što ni pra jakuju hihijenu tut havorki niama».
Taksama administracyja IČU nie pradstaviła Ludmile i inšym sukamernikam pravił utrymańnia, kab aznajomicca sa svaimi pravami.
Ciapier čytajuć
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5757
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz57
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4949
Kamientary