U ZŠA aryštavali śpiecnazaŭca, jaki zarabiŭ $400 tysiač na staŭcy, što aryštujuć Madura

Amierykanskija ŭłady aryštavali vajskoŭca śpiecnaza, jaki, pavodle abvinavačvańnia, zrabiŭ staŭku na toje, što prezident Vieniesueły Nikałas Madura budzie adchileny ad ułady, i takim čynam zarabiŭ bolš za 409 tysiač dalaraŭ, piša Bi-bi-si.

Miniust ZŠA zajaviŭ, što Henan Kien Van Dajk vałodaŭ infarmacyjaj ab padrychtoŭcy apieracyi amierykanskaha śpiecnaza pa zatrymańni Madura i na jaje padstavie raźmiaściŭ staŭki na biržy pradkazańniaŭ Polymarket.

«Heta vidavočna ŭjaŭlaje saboj ździełku z vykarystańniem insajdarskaj infarmacyi, što zabaroniena fiederalnymi zakonami», — skazana ŭ zajavie Miniusta ZŠA.

Van Dajk źjaŭlajecca dziejučym vajennym i słužyć na amierykanskaj vajskovaj bazie Fort-Breh u Paŭnočnaj Karalinie.

Pavodle danych prakuroraŭ, z 8 śniežnia 2025 hoda i prynamsi da 6 studzienia Van Dajk braŭ udzieł u płanavańni i realizacyi apieracyi «Absalutnaja rašučaść», u vyniku jakoj byŭ zachopleny Madura.

Amierykanskija siły zachapili Madura i jaho žonku Siliju Fłores 3 studzienia, pravioŭšy adnadzionnuju apieracyju ŭ Karakasie. Jany byli dastaŭleny ŭ Ńju-Jork, dzie ŭłady vystavili im abvinavačvańni ŭ kantrabandzie zbroi i narkotykaŭ. Adchileny prezident Vieniesueły i jaho žonka hetyja abvinavačvańni admaŭlajuć.

Miniust ZŠA śćviardžaje, što Van Dajk zrabiŭ staŭki na čas i vynik amierykanskaj apieracyi.

U abvinavaŭčym zaklučeńni skazana, što 25 śniežnia 2025 hoda jon stvaryŭ akaŭnt na Polymarket i pačaŭ raźmiaščać źviazanyja ź Vieniesuełaj staŭki. Paviedamlajecca, što ŭsiaho jon pastaviŭ 33 tysiač dalaraŭ.

Situacyju ŭžo prakamientavała sama birža Polymarket.

«Kali my identyfikavali karystalnika, jaki rabiŭ staŭki na asnovie zakrytaj uradavaj infarmacyi, my pieradali hetuju spravu Miniustu i supracoŭničali ź jaho rasśledavańniem, — skazana ŭ zajavie kampanii. — Na Polymarket niama miesca insajdarskim tarham handlu. Siońniašni aryšt dakazvaje, što naša sistema spraŭna pracuje».

Van Dajku vystaŭlenyja abvinavačvańni ŭ niezakonnym vykarystańni dziaržaŭnych sakretnych danych dla piersanalnaha ŭzbahačeńnia, kradziažy zakrytaj infarmacyi, machlarstvie i niezakonnych tranzakcyjach.

«Našym vajskoŭcam daviarajuć sakretnyja danyja, kab jany mahli vykonvać svaje zadačy jak maha bolš biaśpiečna i efiektyŭna. Im zabaroniena vykarystoŭvać zusim sakretnuju infarmacyju dla asabistaha finansavaha ŭzbahačeńnia, — skazaŭ vykonvajučy abaviazki hienprakurora ZŠA Tod Błanš. — Šyroki dostup da rynkaŭ pradkazańniaŭ — heta adnosna novaja źjava, ale fiederalnyja zakony ab abaronie infarmacyi ŭ halinie nacyjanalnaj biaśpieki tut całkam pracujuć».

Tramp: «Mnie ŭsio heta nie padabajecca»

U čaćvier situacyju sa staŭkami na roznyja padziei prakamientavaŭ prezident ZŠA Donald Tramp.

«Mnie ŭsio heta nie padabajecca», — skazaŭ Tramp u adkaz na pytańnie ab aściarohach, što rynki pradkazańniaŭ mohuć pravakavać ździełki z vykarystańniem insajdarskaj infarmacyi.

«Uvieś śviet, na žal, u peŭnym sensie pieratvaryŭsia ŭ kazino. Kali pahladzieć na ŭsio, što adbyvajecca pa ŭsim śviecie, u Jeŭropie, u inšych miescach, tam robiacca ŭsie hetyja staŭki. Mnie heta nikoli nie padabałasia», — zajaviŭ jon.

Jak nahadvaje ahienctva AFP, niezadoŭha da pačatku vajny ZŠA i Izraila ź Iranam šeść akaŭntaŭ na biržy Polymarket zarabili 1,2 młn dalaraŭ paśla taho, jak zrabili staŭku, što kanflikt pačniecca 28 lutaha.

U suviazi z hetymi staŭkami nichto nie byŭ aryštavany i pakul niama nijakich dokazaŭ, što da ich byli datyčnyja ludzi, źviazanyja z amierykanskimi ŭładami.

• 1
• 0
• 6
• 2
• 1
• 0
• 2
• 0