Incydent adbyŭsia ŭ adnoj sa škoł Baranavič u pačatku śniežnia padčas pieramieny. Paciarpiełaha — 14-hadovaha chłopca — rodnyja advieźli ŭ balnicu. Jamu spatrebiłasia apieracyja, piša Intex-Press.
Pra zdareńnie raspaviali rodnyja školnika. Chłopiec vučycca ŭ 9 kłasie.
Pa ich słovach, usio adbyłosia pamiž urokami ŭ adnoj sa školnych raspranalniaŭ.
— Jak mnie raspavioŭ Vadzim (imia školnika źmienienaje), u raspranalni jon byŭ ź inšymi chłopcami. Da hetaha jany nibyta jak palili za škołaj elektronnyja cyharety, i kali nastaŭnik fizkultury zajšoŭ u raspranalniu, jon ubačyŭ u rukach Vadzima hetu pryładu dla kureńnia, staŭ łajacca, zatym paciahnuŭ za ruku, kab vychodziŭ z raspranalni, i pry vychadzie ŭdaryŭ nahoj dzicia ŭ pach, — raspaviadaje babula paciarpiełaha.
Dalej, pa słovach žančyny, Vadzim samastojna źjechaŭ dadomu, nikomu z rodnych i blizkich ničoha nie raspavioŭšy.
— Tolki pa telefonie, kali ja datelefanavałasia da dziciaci, jon raspavioŭ ab zdareńni. Moj muž, jaho dziadula, adrazu ž pajechaŭ da jaho i ŭbačyŭ, što dziciaci drenna. Advieźli ŭ balnicu, u pryjomnym pakoi vyklikali ŭrołaha, toj skazaŭ, što ŭ dziciaci razryŭ pravaha jaječka, hiematoma, i što treba rabić apieracyju, — uspaminaje haradžanka.
Rodnyja dzieviacikłaśnika źviarnulisia z zajavaj u milicyju i ŭ Śledčy kamitet.
— Tak, ja razumieju, što padletki ciapier składanyja. Mohuć niešta i burknuć ŭ adkaz. Tak što, prabačcie, hetak bić treba?! — aburajecca babula chłopca.
Apieracyja praviedziena, školnika vypisali, ale jon praciahvaje znachodzicca na balničnym.
— Doktar skazaŭ, što ŭsio pavinna być dobra. Heta «pavinna» trochi aburaje. Nie viedaju, jak usio budzie dalej. I ci nie adabjecca ŭsio heta ŭ dalejšym na jaho maralnym i fizičnym stanie — niezrazumieła, — kaža babula. — Unuk baicca iści nazad u škołu, dumaje, što ź jaho buduć kpić. Choć siabry časta jamu telefanujuć i pišuć, pytajucca, jak u jaho samaadčuvańnie.
Zaviali kryminalnuju spravu pa art. 147 KK RB («Naŭmysnaje pryčynieńnie ciažkaha cialesnaha paškodžańnia»).
Va ŭpraŭleńni pa adukacyi Baranavickaha harvykankama atrymać apieratyŭny kamientar nakont zdareńnia nie ŭdałosia.
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie4
Kamientary