SCALP. Što viadoma pra rakiety, technałohii vytvorčaści jakich Ukrainie pieradajuć Brytanija i Francyja

SCALP — francuzskaja viersija brytanskaj Storm Shadow. Abiedźvie rakiety raspracoŭvali z vykarystańniem supolnych brytanskich i francuzskich technałohij. Pieradača hetych danych musić dapamahčy Francyi i Ukrainie prasunucca ŭ stvareńni vytvorčaści SCALP niepasredna va Ukrainie.

Jak zaznačaje ofis brytanskaha premjera, heta krok praciahvaje palityku Łondana, jaki jašče ŭ 2023 hodzie pieršym pieradaŭ Ukrainie dalnabojnuju ŭdarnuju zbroju dla abarony. Ciapier ža havorka viadziecca nie tolki pra pastaŭki hatovych rakiet. Ukraina musić atrymać mahčymaść vyrablać ich častkova abo całkam na ŭłasnaj terytoryi.

Rassakrečvańnie infarmacyi pra brytanskija kampanienty maje dapamahčy francuzskamu i ŭkrainskamu boku prasunucca ŭ stvareńni miascovych vytvorčych linij.

Heta taksama častka šyrejšych namahańniaŭ Vialikabrytanii pa chutčejšaj raspracoŭcy sučasnych i adnosna niedarahich dalnabojnych srodkaŭ parazy dla Ukrainy ŭ miežach prajekta Brakestop.

Vytvorčaść dalnabojnych rakiet niepasredna va Ukrainie ŭ pierśpiektyvie moža źmienšyć zaležnaść Kijeva ad hatovych bojeprypasaŭ z-za miažy i dazvolić chutčej pavialičvać ich kolkaść.

Rasija vusnami pres-sakratara Kramla ŭžo asudziła taki krok Vialikabrytanii.

Pavialičyć

Što viadoma pra rakiety

Dalnabojnaja rakieta SCALP važyć 1300 kh i maje daŭžyniu 5,10 m.

Jana zdatnaja patraplać u celi na adlehłaści kala 240 km uhłyb Rasii — heta nie takaja vialikaja dalokaść, jak va ŭkrainskich dronaŭ, zdatnych nanosić udary pa hłybokim tyle, ale heta važny krok, jaki demanstruje hatoŭnaść mižnarodnych partnioraŭ dzialicca technałohijami ŭzbrajeńniaŭ.

Vytvorca adznačaje, što rakiety pryznačanyja dla źniščeńnia zahadzia vyznačanych nieruchomych celaŭ.

Ich možna prymianiać udzień i ŭnačy pry lubych umovach nadvorja, a taksama jany abstalavanyja sučasnymi navihacyjnymi sistemami.

Jak paviedamlaje vydańnie Missilery, kanstrukcyja rakiety SCALP praduhledžvaje źnižeńnie jaje radyjołakacyjnaj prykmietnaści, to-bok jaje składaniej zafiksavać naziemnym radaram praciŭnika. Chutkaść rakiety dasiahaje 1500 km/h.

Pavialičyć

Jak ich vykarystoŭvajuć Pavietranyja siły Ukrainy

U mai 2023 hoda Vialikabrytanija abviaściła pra pieradaču rakiet Storm Shadow Ukrainie. U lipieni taho ž hoda Francyja zajaviła, što daść Ukrainie rakiety SCALP.

Viadoma, što dadzienyja Vialikabrytanijaj rakiety možna zapuskać z vajskovych samalotaŭ, a dadzienyja Francyjaj — taksama z karabloŭ i padvodnych łodak.

Va Ukrainie hetyja rakiety navučylisia zapuskać sa starych savieckich bambavikoŭ Su-24M. Pavietranyja siły dziakujučy hetym rakietam nanosiać udary pa mnohich rajonach terytoryi Rasii i akupavanych terytoryjach.

«Nichto nie dumaŭ, što samalot Su-24 stanie mahutnym rakietanoscam i asvoić «štormy» i «skalpy», vykonvajučy ahniavyja zadačy na dobruju hłybiniu praciŭnika», — zajaviŭ 22 žniŭnia kamandujučy avijacyjaj Pavietranych sił Alaksandr Dziakaŭ.

Pavialičyć

Kryłatyja rakiety Storm Shadow raspracavanyja jeŭrapiejskaj multynacyjanalnaj kampanijaj MBDA u 1990‑ch hadach i pryniatyja na ŭzbrajeńnie brytanskaj, francuzskaj i inšych armij na pačatku 2000‑ch hadoŭ.

«Storm Shadow/SCALP — heta pavietranaje ŭzbrajeńnie dalokaha dziejańnia, što maje kanviencyjny charaktar i stvorana dla hłybokich udaraŭ pry zahadzia spłanavanych atakach na značnyja stacyjanarnyja celi», — adznačajecca ŭ apisańni na sajcie vytvorcy.

«Aryhinalnaja rakieta, jakaja stvoranaja z aktyŭnym vykarystańniem technałohii małazaŭvažnaści, maje dalokaść da 560 km. Ahulnaja vaha rakiety SCALP składaje 1300 kh, ź jakich 450 kh prypadaje na bajavuju častku», — apisvaje rakietu ŭkrainskaje vydańnie Defense Express.

Viadoma, što ad Vialikabrytanii Ukraina pavinna była atrymać ekspartny varyjant Storm Shadow z dalokaściu dziejańnia kala 250 km. Heta trochi mienš za dalokaść amierykanskich taktyčnych rakietnych sistem kłasa «ziamla-ziamla» ATACMS dla zapuskaŭ z HIMARS. Adnak Vašynhton admaŭlaŭ u ich pieradačy praz, jak ličycca, strach eskałacyi ŭ vyniku mahčymych udaraŭ pa Rasii.

«Dla praryvu SPA heta rakieta vykarystoŭvaje kłasičny małavyšynny palot na dahukavoj chutkaści. Za dakładnaść naviadzieńnia adkazvaje ŭvieś nabor sučasnych sistem — iniercyjalnaja i spadarožnikavaja sistema navihacyi, režym paraŭnańnia etałonnaj vyjavy z najaŭnaj — DSMAC», — raskazvaje pra jaje charaktarystyki Defense Express.

• 0
• 0
• 0
• 0
• 0
• 0
• 0
• 0