«Hadami ŭ bietonnym turemnym miašku ja prasiŭ Boha, kab vy vystajali». Statkievič pavinšavaŭ ukraincaŭ z Dniom niezaležnaści
Eks-palitviazień i palityk u svaim telehram-kanale pavinšavaŭ Ukrainu i ŭkraincaŭ z Dniom niezaležnaści. «Vaša mužnaść i stojkaść ŭ abaronie niezaležnaści i svabody svajoj krainy vyklikajuć pavahu dy zachapleńnie ŭsiaho śvietu», — piša jon. I prosić prabačeńnia za 2022-i.
«Maje ščyryja vinšavańni z Dniom Niezaležnaści hodnamu i mužnamu ŭkrainskamu narodu!
Zaraz za niezaležnaść vam prychodzicca vieści kryvavuju i niaroŭnuju vajnu, za čas jakoj zahinuli mnohija tysiačy z vas, u jakoj pad pastajannaj pahrozaj śmierci znachodziacca nie tolki vašy vajary na froncie, ale i mirnyja hramadzianie — dzieci, žančyny, staryja ŭ kožnym rehijonie Ukrainy.
Vaša mužnaść i stojkaść ŭ abaronie niezaležnaści i svabody svajoj krainy vyklikajuć pavahu dy zachapleńnie ŭsiaho śvietu. Asabliva — u susiednich z vami narodaŭ, jakija razumiejuć, što, u vypadku vašaj parazy, nastupnymi abjektami ahresii Maskvy stanuć užo ich krainy. Mienavita tamu šmat patryjotaŭ z hetych krain pryjechała va Ukrainu, kab zmahacca suprać ahresara poruč z vami.
Mnie vielmi soramna, što Biełaruś była vykarystana ahresaram jak płacdarm dla sproby chutkaha zachopu vašaj stalicy. Ja ŭpeŭnieny, što biez raźliku na hety zachop i chutkuju pieramohu, ahresar ŭvohule nie pajšoŭ by na svaju kryvavuju avanturu.
Na žal, źniasilenaje doŭhim supracivam dyktatury, źniavoleńniem mnohich tysiač patryjotaŭ i naŭmysnym prymušeńniem pierad vajnoj da emihracyi sotniaŭ tysiač praciŭnikaŭ režymu, biełaruskaje hramadstva nie zdoleła pieraškodzić vykarystańniu našaj ziamli dla ahresii suprać najbolš blizkaha nam naroda. Darujcie, siabry!
U hety śviatočny dla vas dzień zyču vam siłaŭ vystajać i zachavać svaju cudoŭnuju krainu! Dziela siabie i dziela ŭsich narodaŭ, jakija prahnuć voli.
Hadami ŭ bietonnym turemnym miašku ja prasiŭ Boha pra heta. Majo serca z vami. Trymajciesia, druzi!» — napisaŭ jon.
Kamientary
Słava Biełarusi!!!!!
Žyvie Biełaruś!!!!!
Žyvie Ukrajina!!!!!