Adobe Flash aficyjna «pamior»

Adobe Flash Player — niekali papularny multymiedyjny modul, na jaki anłajn-kantent abapiraŭsia na praciahu mnohich hadoŭ, aficyjna spyniaje pracu, piša BBC.

Stvorany ŭ 1996 hodzie Flash vychodziŭ za miežy prostaha prajhravańnia videa, jon dapamahaŭ ludziam ŭvasablać svaje idei ŭ farmacie multymiedyja.

Ale znajści svajo miesca ŭ epochu smartfonaŭ jamu nie ŭdałosia.

Adobe spyniła padtrymku Flash Player na apieracyjnaj sistemie Windows 10.

Pra heta kampanija papiaredziła karystalnikaŭ asobnym paviedamleńniem i zaklikała ich «nieadkładna vydalić Flash Player, kab dapamahčy abaranić svaje sistemy».

A z 12 studzienia Adobe budzie błakavać zapusk luboha Flash-kantentu.

Kali źjaviŭsia Flash, bolšaść karystalnikaŭ vychodzili ŭ internet praz mademnaje złučeńnie, jakoje było vielmi pavolnym pa siońniašnich standartach.

A Flash dazvalaŭ veb-dyzajnieram i animataram stvarać zajmalny kantent, jaki možna było spampavać adnosna chutka.

Flash — heta bolš, čym prosta animacyja. Jon dazvalaŭ veb-sajtam nakštałt YouTube tranślavać vysakajakasnaje videa.

U 2009 hodzie Adobe vychvalałasia, što Flash Player «ustalavali na 99% usich nastolnych kamputaraŭ, padłučanych da internetu».

Ale śviet ruchaŭsia ŭ bok mabilnych pryład, a Adobe pavolna na heta adreahavała.

Suprać jaje vystupiŭ Styŭ Džobs: pieršyja ajfony nie vykarystoŭvali Flash.

U krasaviku 2010 hoda Džobs napisaŭ adkryty list pad zahałoŭkam «dumki pra Flash», u jakim patłumačyŭ, čamu Apple nie dazvalaje zapuskać Flash na iPhone i iPad.

Jon śćviardžaŭ, što Flash niazručny ŭ vykarystańni na sensarnym ekranie.

Ale hałoŭnaj pryčynaj antypatyi Džobsa da Flash była prablema ź biaśpiekaj hetaha praduktu.

Na źmienu Adobe Flash Player pryjšli novyja standarty nakštałt HTML5, jakija dazvalajuć rabić toje ž samaje bieź instalacyi dadatkovych płahinaŭ.

Bujnyja brendy, takija jak Facebook, Netflix i YouTube, užo tranślavali videa na smartfony biez Flash, a ŭ listapadzie 2011 hoda Adobe spyniła raspracoŭku Flash dla mabilnych pryład.

U 2015 hodzie Apple pa zmoŭčvańni adklučyła modul u svaim braŭziery Safari, a Google Chrome pačaŭ błakavać niekatoryja frahmienty Flash-kantentu.

U lipieni 2017 hoda Adobe abviaściła ab spynieńni padtrymki Flash u 2020 hodzie. Heta pastaviła pad pahrozu ceły płast ličbavaj kultury, jakaja choć i sastareła, ale mieła prava zastacca ŭ historyi sieciva.

I ratavać ad źniščeńnia fłeš-hulni padachvocilisia entuzijasty.

Raspracoŭščyk Zynga zajaviŭ, što zakryje hulniu Farmville ŭ Facebook z-za spynieńnia padtrymki Adobe Flash Player. Na piku papularnaści FarmVille mieła miljony karystalnikaŭ.

U listapadzie «Archiŭ internetu» (the Internet Archive) pačaŭ zachoŭvać na svaim sajcie fłeš-animacyju i hulni. Jany pracujuć na emulatary Ruffle, a aŭtaram prajektaŭ prapanujuć zahruzić svaje pracy na sajt samastojna, kab zachavać ich u historyi.

Adobe vypuściła apošniaje zapłanavanaje abnaŭleńnie dla Flash i padziakavała ŭsim, chto karystaŭsia i stvaraŭ kantent Flash Player apošnija dva dziesiacihodździ.

Adobe vykłała na svaim veb-sajcie instrukcyi pa vydaleńni Flash z kamputaraŭ Windows i Mac. 

«Vydaleńnie Flash Player dapamoža abaranić vašu sistemu, tamu što Adobe nie płanuje vypuskać abnaŭleńni abo vypraŭleńni biaśpieki paśla zakančeńnia terminu słužby», — papiaredžvaje kampanija.

• 0
• 0
• 0
• 0
• 0
• 0
• 0
• 0