Chatniaja hulnia zbornaj Biełarusi pa mastactvie + šakujučyja foty

Sioleta Biełaruś (katory raz) nie trapić u lik udzielnikaŭ najvialikšaha suśvietnaha ahladu dasiahnieńniaŭ sučasnaha mastactva — Vieniecyjanskaha Bijenale. Ale ajčynnyja mastaki hetaha tak nie pakinuli. I zładzili biełaruski paviljon... u Minsku.

U ekspazicyi «Paviljonu» pradstaŭlenyja tvory 30 biełaruskich mastakoŭ, skulptaraŭ i fatohrafaŭ roznych pakaleńniaŭ, što pracujuć u razmaityich nakirunkach aktualnaha mastactva, siarod jakich viadomyja tvorcy: Siarhiej Kiruščanka, Uładzimir Ceśler i Artur Klinaŭ, a taksama tvory tych mastakoŭ, jakija praktyčna nikoli jašče nie vystaŭlalisia.

Vystava musić zajavić pra žyćciovuju zdolnaść i značnaść aktualnaha biełaruskaha mastactva. «Pakolki mastactva takaja ž imidžavaja reč, jak i sport, dyk, pierakładajučy, Vieniecyjanski Bijenale dla luboj krainy — heta jak mastackaja Alimpijada, — kaža mastactvaznaŭca i kuratar vystavy Lizavieta Michalčuk. — I kali tvajoj krainy niama ŭ Vieniecyi, dyk heta admoŭna śviedčyć pra ŭzrovień mastactva ŭ joj. Ale ž my nie sprabavali zrabić «na złość»: ni jeŭrapiejcam, ni ajčynnym uładam. U nas nałučyłasia cudoŭnaja nahoda prademanstravać biełaruskaje mastactva doma, i jaje, spadziajusia, my vykarystali».

Na vystavie, jakaja maje takuju pravakacyjnuju nazvu, nie abyšłasia biez pravakacyjnych tvoraŭ. Mastak Kanstancin Harecki vystaviŭ tvor «Mužčynskaje serca lubić Baćkaŭščynu», dzie ŭ kardonnaj skryni znachodzicca televizar, jaki pad badzioryja huki pieradač radyjo «Kultura» pakazvaje mužčynskaje načyńnie. «Dzie časam znachodzicca serca mužčyny, my ŭsie cudoŭna viedajem, — kaža Harecki. — A Radzimu mužčyny lubiać».

Na pytańnie, ci ž pravakacyja nie adciahnie ŭvahi naviednikaŭ ad inšych tvoraŭ, Lizavieta Michalčuk adkazvaje: «My zaprasili mastakoŭ, u jakich pravakacyja arhaičnaja častka. To bok u nas dziorzkija tvory nie dziela dziorzkaści, a dziela raznastajnaści — my chočam pakazać uvieś śpiektr biełaruskaha mastactva: i avanhard, i pop-art. Za ścienkaj ad Hareckaha, naprykład, visiać chutčej miłyja pracy Alaksandra Bielskaha (jon pracuje mastakom-afarmlalnikam u kinateatry «Pijanier»): tut Alaksandr vystaviŭ rekłamy na filmy, jakich nie isnuje».

Vystava praciahniecca da 6 červienia ŭklučna. Uvachod na «Biełaruski paviljon Vieniecyjanskaha Bijenale» — volny.

ŁK, fota Jarasłava Ściešyka

• 0
• 0
• 0
• 0
• 0
• 0