Čystki ŭ Mahiloŭskim univiersitecie: prymusili syści ŭžo troch biełaruskamoŭnych vykładčykaŭ
Usie troje jašče hod tamu visieli na došcy honaru VNU, a ciapier akazalisia niepatrebnymi.
«Ja byŭ zmušany napisać zajavu pa ŭłasnym žadańni, inakš mianie b zvolnili pa artykule ab niedastatkovaj kvalifikacyi», — kaža prafiesar kafiedry archieałohii i historyi Biełarusi Alaksandr Ahiejeŭ, jaki pracavaŭ u VNU z 1991 hoda.
Ahiejeŭ — viadomy ŭ Mahilovie čałaviek. Pryčym viadomy nie tolki jak vykładčyk, jon udzielničaŭ i ŭ hramadska-palityčnym žyćci krainy, byŭ u šerahach BNF i TBM. U 2003 i 2007 hadach abiraŭsia deputatam u Mahiloŭski harsaviet. Uvachodziŭ u tapanimičnuju kamisiju pry harvykankamie. Vydavaŭ almanach «Mahiloŭskaja daŭnina», a taksama sumiesna z Aleham Trusavym napisaŭ knihu «Mahiloŭskaja ratuša». Takich znaŭcaŭ historyi Mahilova nie tak šmat, ale ŭ dalejšym supracoŭnictvie ŭniviersitet bolš nie zacikaŭleny, pry tym što jość niedachop kadraŭ.
Reč u tym, što ŭ Mahiloŭskim dziaržaŭnym univiersitecie imia Kulašova niadaŭna pracavała atestacyjnaja kamisija, jana skončyła rabotu 31 maja. Pa jaje vynikach niekatorym z supracoŭnikaŭ i było prapanavana zvolnicca.
«Rašeńnie prymajecca «kalektyŭnym rektaram», — śmiajecca Alaksandr Ahiejeŭ. — Sam rektar kaža, što nie moža nie daviarać vysnovam atestacyjnaj kamisii, u pracy jakoj jon nie braŭ udziełu».
Rektar MDU — viadomy historyk i archieołah Dzianis Duk, vučań Hieorhija Štychava i Siarhieja Tarasava. Kaliści Łukašenka nazyvaŭ knihu Duka i Volhi Laŭko «zdarovym nacyjanalizmam».
Pa źviestkach «Našaj Nivy», u čas pracy atestacyjnaja kamisija zasiarodžvałasia nie stolki na prafiesijnaj dziejnaści vykładčykaŭ, jak na tym, što jany pisali ŭ sacyjalnych sietkach ci jak vykazvalisia publična. Na hetaj padstavie i vynosilisia rašeńni.
«Śmiajomsia: jašče niadaŭna ŭsie troje visieli na došcy honaru, a Šarucha dyk na samaj važnaj došcy honaru ŭniviersiteta, a ciapier niepatrebnyja», — kaža Ahiejeŭ.
Ihar Šarucha — prafiesar kafiedry pryrodaznaŭstva, niejki čas pabyŭ i dekanam. Jon va ŭniviersitecie ad 1993 hoda. Jaho ličać ci nie najlepšym hieohrafam Mahilova. Šarucha ŭznačalvaje abłasnoje adździaleńnie Biełaruskaha hieahrafičnaha tavarystva. Mieŭ šmatlikija hramaty-padziaki ad Ministerstva adukacyi.
Trecim vykładčykam, jaki byŭ vymušany syści z MDU, staŭ dacent kafiedry litaratury i mižkulturnych kamunikacyj Vital Jeŭmiańkoŭ. VNU Jeŭmiańkoŭ addaŭ 21 hod pracy.
«Ščyra kažučy, škada. Škada ŭniviersitet, škada studentaŭ», — napisaŭ u fejsbuku Jeŭmiańkoŭ.
Usie troje — heta biełaruskamoŭnyja vykładčyki. Ahiejeŭ kaža, što peŭnyja prapanovy ab pracy ŭžo majucca. «Ludzi padzialilisia: chtości mnie spačuvaje, a chtości, naadvarot, vinšuje», — kaža jon.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda1
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha219219
Kamientary