Cana nafty marki Brent na tarhach u aŭtorak apuściłasia nižej za $60 za baral. Rasijskaja nafta z-za sankcyj i ŭ vyniku źnižeńnia suśvietnych kacirovak ciapier pradajecca tańniej za ŭsio z pačatku poŭnamaštabnaj ahresii, piša The Moscow Times.
Na 15.00 pa minskim časie nafta Brent kaštavała $59,7 za baral, patańnieŭšy na 1,4%. Heta samy nizki ŭzrovień z 2021 hoda, za vyklučeńniem 5 maja 2025 hoda, kali padčas tarhoŭ jana na karotki čas apuskałasia nižej za $60, ale zakryćcio adbyłosia vyšej hetaj adznaki. Tarhi amierykanskim sortam WTI zakrylisia ŭ paniadziełak na samym nizkim cenavym uzroŭni ź lutaha 2021 hoda — $55,83 za baral.
Adzin z faktaraŭ padzieńnia cen apošnim časam — prasoŭvańnie mirnych pieramoŭ pa Ukrainie.
«Nafta praciahvaje handlavacca pad ciskam, pakolki siońniašnija naviny śviedčać ab uzrastajučym kansensusie adnosna mahčymaha pieramirja pamiž Rasijaj i Ukrainaj, — skazała Bloomberg Rebieka Bejbin, starejšy trejdar enierharesursaŭ u CIBC Private Wealth Group. — Chacia pieramirje i nie pryviadzie da raptoŭnaha viartańnia rasijskaj nafty na rynak, jano istotna źnizić ryzyku budučych pierapynkaŭ pastavak».
2025 hod staŭ hodam padzieńnia cen na naftu: tarhi pačynalisia na ŭzroŭni $74,6, a ŭ studzieni Brent daražeła da $82 za baral. Hałoŭnaj pryčynaj stała značnaje pavieličeńnie zdabyčy, pierš za ŭsio ŭ vyniku źmianieńnia palityki OPIEK+, jakaja ź viasny pačała apieradžalna pavialičvać vytvorčyja kvoty. U vyniku na rynku ŭtvaryŭsia lišak. U vieraśni, pa apošnich dadzienych Mižnarodnaha enierhietyčnaha ahienctva (MEA), kamiercyjnyja zapasy nafty vyraśli na 77,7 młn baralaŭ — samy vysoki ŭzrovień ź lipienia 2021 hoda, a jaje zapasy na vadzie, u tankierach, — na cełych 80 młn baralaŭ.
Za pieršyja dzieviać miesiacaŭ hoda zapasy pavialičylisia na 313 młn baralaŭ, abo ŭ siarednim na 1,15 młn baralaŭ u sutki. Asabliva chutka raście abjom baralaŭ, jakija zachoŭvajucca na tankierach rasijskaha cieńavoha fłota: jany doŭha nie mohuć znajści pakupnikoŭ na sankcyjnuju naftu abo šukajuć mahčymaści dla jaje pierahruzki ŭ mory, kab schavać pachodžańnie.
MEA prahnazuje rekordny praficyt na suśvietnym rynku ŭ 2026 hodzie: dysbałans usio pavialičvajecca, pakolki «prapanova raście, a rost popytu zastajecca ścipłym pa histaryčnych mierkach».
Rasijskaja nafta z-za hetych faktaraŭ ciapier pradajecca navat tańniej, čym u studzieni 2023 hoda, paśla ŭstupleńnia ŭ siłu jeŭrapiejskaha embarha i cenavaha dachu, uviedzienaha «Vialikaj siamiorkaj». Tady jon skłaŭ $60 za baral, a ŭ hetym vieraśni ES i Vialikabrytanija (chacia biez padtrymki ZŠA) źnizili jaho da $47,6.
Pa danych Argus Media, u siarednim rasijskija eksparciory nafty ciapier atrymlivajuć krychu bolš za $40 za baral za partyi, adhružanyja z partoŭ Bałtyjskaha i Čornaha mora, a taksama dalokaŭschodniaha porta Koźmina, piša Bloomberg. Za apošnija try miesiacy hetaja cana ŭpała na 28% jak z-za źnižeńnia suśvietnych kacirovak, tak i z-za ŭviadzieńnia Złučanymi Štatami sankcyj suprać «Raśniefci» i «Łukojła».
Ciapier čytajuć
Syn Siarhieja Bulby źbiraje hrošy ŭ Polščy, prydumaŭšy sabie bijahrafiju vieterana i palityčnaha ŭciekača49
Kamientary
Kab čałaviek, jaki pastajanna chvalicca tym, čaho zrabiŭ i čaho nie zrabiŭ, pra takoje i maŭčaŭ by. Nu-nu.
No vopros nie riešajetsia - i ludi prodołžajut hibnuť.