kab admianić sankcyi ŭ dačynieńni da biełaruskich čynoŭnikaŭ
Jeŭrasajuzu patrebna dapamoha Biełarusi, kab admianić sankcyi ŭ dačynieńni da biełaruskich čynoŭnikaŭ.
Pra heta zajaviŭ pasoł Šviecyi Stefan Eryksan 1 lipienia ŭ Minsku na pres‑kanfierencyi, pryśviečanaj pačatku staršynstva Šviecyi ŭ Jeŭrasajuzie ŭ druhim paŭhodździ.
Pavodle słoŭ dypłamata,
padrychtoŭka rašeńnia ab admienie abo pradaŭžeńni sankcyj pačniecca ŭ kastryčniku, a samo rašeńnie, chutčej za ŭsio, budzie pryniata ŭ listapadzie.
«Spadziajemsia, što biełaruski bok zrobić naležnyja kroki, kab ES zmoh pryniać pravilnaje rašeńnie», — skazaŭ pasoł.
Eryksan nie staŭ udakładniać, jakija mienavita zachady ES čakaje ad Minska najbližejšymi miesiacami.
Jon ličyć, što «biełaruski bok budzie vyrašać, jak i što zrabić, bo znajomy z rekamiendacyjami ES». «Narmalizacyja stasunkaŭ — u intaresach ES i Biełarusi, — padkreśliŭ dypłamat. — Hałoŭnaje — heta dyjałoh i ruch».
Šviedski pasoł zajaviŭ, što Jeŭrasajuz vitaje zroblenyja biełaruskimi ŭładami zachady. «My budziem nadalej pracavać, kab praciahvaŭsia dyjałoh i kantakty pamiž Biełaruśsiu i ES. Važna taksama vieści dyjałoh adnačasova z uładami i hramadzianskaj supolnaściu krainy», — ličyć Eryksan.
Pavodle słoŭ dypłamata, šviedy ličacca prahmatyčnaj nacyjaj, adnak jość pytańni, u jakich jany zajmajuć pryncypovuju pazicyju. Tak, adznačyŭ jon, u miežach svajho staršynstva Šviecyja maje namier uzdymać pytańnie ab zachavańni pravoŭ čałavieka i važnaści pravavoj dziaržavy. Eryksan vykazaŭ nadzieju, što za čas šviedskaha staršynstva ŭ ES pravaabarončaja tematyka «stanie bolš prykmietnaj».
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu24
Kamientary