U Biełarusi zabaroniena kupańnie bolš čym u 50 vadajomach

Pavodle infarmacyi Respublikanskaha centra hihijeny, epidemijałohii i hramadskaha zdaroŭja, u Biełarusi kupańnie zabaroniena bolš čym u 50 vadajomach, 30 ź jakich raźmieščany ŭ Minskaj vobłaści.

U lik niepažadanych dla kupańnia vadajomaŭ uvachodziać Smalavickaje, Piatrovickaje vadaschoviščy, a taksama aziory Michajłaŭskaje (Puchavicki rajon), Słabada, Mściž, zona adpačynku «Dubki» (Barysaŭski rajon), a taksama zony adpačynku Barysava.

Na race Nioman kupańnie zabaroniena ŭ rajonie plaža «Vysoki Bierah» (vioska Mikałajeŭščyna Staŭbcoŭskaha rajona), u zonie adpačynku na race Nioman (Stoŭbcy), zonie adpačynku na race Nioman plaž «Cieramok» (vioska Novy Śvieržań Staŭbcoŭskaha rajona), a taksama ŭ zonie adpačynku ŭ mikrarajonie «Akinčycy» horada Stoŭbcy i niekatorych inšych.

U Minsku kupańnie zabaroniena na vadaschoviščach Pcič, Cna, plažach № 6, 7, 8 vadaschovišča Drazdy i zonach adpačynku ŭ rajonie plažaŭ №2—6, 8,9 Zasłaŭskaha vadaschovišča.

U Bresckaj vobłaści nie rekamiendujecca kupacca ŭ 12 vadajomach, u liku jakich voziera Śviaciłaŭskaje Baranavickaha rajona, raka Ščara (vioska Darava Lachavickaha rajona), zona adpačynku azdaraŭlenčaha łahiera «Čajka» Lachavickaha rajona, raka Viedźma (Lachavičy), voziera Čornaje Biarozaŭskaha rajona, zona adpačynku sanatoryja «Buh» Žabinkaŭskaha rajona.

U Viciebskaj vobłaści sansłužba nie rekamienduje kupacca ŭ race Zachodniaja Dźvina (za vyklučeńniem zony adpačynku parka «Mazuryna» Viciebska), race Łučesa (Viciebsk), race Vićba (Viciebsk), voziery Šaty Połackaha rajona, voziery Suja Połackaha rajona i inš.

U Mahiloŭskaj vobłaści zabaroniena kupańnie na race Basia Čavuskaha rajona, u Homielskaj — na race Prypiać Mazyrskaha rajona, u Hrodzienskaj vobłaści na sažałcy vioski Łuckaŭlany Hrodzienskaha rajona.

Hihijeničnymi patrabavańniami da ŭtrymańnia i ekspłuatacyi vodnych abjektaŭ pry vykarystańni ich u rekreacyjnych metach ustanoŭleny narmatyŭ utrymańnia ŭ vadzie bakteryj hrupy kišačnaj pałački. U vadzie nie pavinna być uzbudžalnikaŭ zachvorvańniaŭ, a na pavierchni vadajoma — płavajučych plonak, plam minieralnych masieł i inšych prymiesiej. Vada nie pavinna mieć nieŭłaścivych joj pachaŭ, a ŭtrymańnie chimičnych rečyvaŭ — pieravyšać hranična dapuščalnyja kancentracyi.

Asnoŭnaj pryčynaj zabarony na kupańnie ŭ vadajomach źjaŭlajecca pieravyšeńnie dapuščalnaha ŭtrymańnia kišačnaj pałački. U siezon bakteryjałahičnyja daśledavańni vady ŭ vadajomach u miescach masavaha adpačynku pravodziacca ŭ siarednim raz na tydzień. Pry atrymańni dvuch paśladoŭnych niezdavalniajučych vynikaŭ analizu vady z adnaho punktu adboru terytaryjalnymi orhanami Dziaržsannahladu vynosicca pastanova ab zabaronie.

BiełaPAN

• 0
• 0
• 0
• 0
• 0
• 0
• 0
• 0