U Nižnim horadzie, zusim niedaloka ad miemaryjału zahinułym u čas trahiedyi na Niamizie, viaducca archieałahičnyja raskopki.
Na miescy archieałahičnych raskopak u Nižnim horadzie haradskija ŭłady razhladajuć mahčymaść pabudovy histaryčnaha muzieju.
Pra heta paviedamiŭ adzin z udzielnikaŭ raskopak, jaki paprasiŭ zastacca nieviadomym. Hałoŭnymi ekspanatami budučaha muzieju mohuć zrabicca raskapanyja pareštki damoŭ i častki vułki, a taksama pradmiety pobytu, znojdzienyja padčas raskopak.
Archieołahi znoŭ kapajuć Nižni horad. Pobač z Domam fizkultury «Pracoŭnyja reziervy», zusim niedaloka ad miemaryjału zahinułym u čas trahiedyi na Niamizie vyryli dva vialikija raskopy, dzie miž druzu, pakinutaha mietrabudaŭnikami ŭ 1980-ja, dratoŭ kamunikacyj dy inšych praduktaŭ papiaredniaha stahodździa možna zhledzieć pareštki haradskich pabudovaŭ i častku vulicy CHIV stahodździa.
«My dajšli da CHIV st. Kali dazvolać, dyk budziem kapać hłybiej. A kulturny słoj jon taki: jak hłybiej, to daŭniej. Možam dajści da CHIII i navat CHII stahodździa», — kažuć archieołahi.Jany płanujuć da kanca hetaha hodu adkapać padmurak carkvy kanca XI stahodździa.
Siońnia pryležnaja da Doma fizkultury «Pracoŭnyja reziervy» terytoryja mižvoli zrabiłasia ci nie adzinym niezabudavanym łapikam ziamli, dzie, pakapaŭšy ŭhłyb, možna dajści da ŭzroŭniu staražytnaha Minska. Archieołahi pačali daśledavańni tut u 1956 hodzie i praciahnuli pry kancy 80-ch, padčas budaŭnictva druhoj linii mietro.
Historyki ličać, što dalej, naprykład la Pałaca sportu, kapać niama sensu, pakolki stary Miensk nie ros u toj bok. Z kirunku Trajeckaha kapać taksama niama jak, bo paśla vajny ŭ Minsku pašyrali rečyšča Śvisłačy, patapiŭšy pry hetym šmat kaštoŭnaha kulturnaha słoju. Ź inšaha boku miesca, dzie koliś stajaŭ staražytny Miensk, abmiežavanaje praśpiektam Pieramožcaŭ (były pr. Mašerava).
Raskopki pryciahvajuć vialikuju ŭvahu: la aharodžanaj terytoryi taŭkucca minčuki, što admysłova pryjazdžajuć pahladzieć, jak žyli našyja prodki. U samich raskopkach biaruć udzieł prybyłyja historyki z Kazani.
Pavodle archieołahaŭ, raskopki ŭ Nižnim horadzie praciahnucca da kastryčnika.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy15
Kamientary