Čamu ŭ minskim mietro dźviery vahona časta začyniajucca pierad samym nosam pasažyraŭ? Adkazvaje mašynist
Nie śpiašajeciesia vinavacić mašynistaŭ mietro ŭ čerstvaści.
Uładzisłaŭ, jaki pracuje mašynistam u minskim mietro, raspaviadaje pra svaju pracu ŭ tyktoku i časam adkazvaje na pytańni pasažyraŭ. U kamientarach jamu pasažyry pišuć i pra kryŭdy. Adna z samych papularnych pretenzij tyčycca taho, što mašynisty časta začyniajuć dźviery pierad samym nosam ludziej, jakija biahuć na ciahnik, — navat kali tyja ź dziećmi.
Uładzisłaŭ rastłumačyŭ, čamu tak adbyvajecca.
— U nas vielmi składany hrafik, pasiekundny. To-bok my abaviazany adpraŭlacca nie prosta ŭ peŭnuju chvilinu, a ŭ chvilinu i stolki siekund. Naprykład, u 15 siekund, 35, 45 i hetak dalej… I kali adstavańnie ad hrafika 10 siekund, heta jašče ličycca dapuščalnym. Kali bolš — 20 siekund — heta ŭžo na miažy. 30 siekund — užo krytyčna.
Mužčyna dadaje, što čysta pa-čałaviečy ŭsie mašynisty imknucca ŭziać jak maha bolš pasažyraŭ — asabliva kali bačać, što sprabujuć paśpieć na ciahnik ludzi stałaha ŭzrostu, pasažyry ź dziećmi.
— Ale takija ludzi jość na kožnym prypynku. I voś kali pierad vami začynilisia dźviery, vy zasmucilisia, pakryŭdzilisia na mašynista… Mahčyma, jon na minułych prypynkach užo kahości čakaŭ, tamu ŭ jaho prosta vyčarpany dapuščalny limit i bolš jamu nielha čakać.
Uładzisłaŭ pryznajecca, što sam časta traplaje ŭ takuju situacyju — i bačyć niehatyŭnuju reakcyju pasažyraŭ, jakija zastalisia na płatformie: pa vačach, pa vusnach… Darečy, kali čałaviek pakazvaje mašynistu siaredni palec, toj heta zaŭvažaje.
— Zrazumiejcie śpiecyfiku pracy mietro. Na adnym prypynku pačakaŭ ludziej, uziaŭ maksimalna kolki moh — minus 10 siekund. Na nastupnym takija ža ludzi biahuć i prosiacca: «Vaźmicie nas». Ty ich škaduješ — i jašče minus 5‑10 siekund. A napieradzie jašče 15 stancyj, i stračany čas niadkul nie voźmiecca.
Mašynist raić stavicca da situacyi tak: vy nie spaźnilisia na hety ciahnik, a pryjšli krychu zahadzia na nastupny. Bo kali b ciahnik pajechaŭ pa raskładzie — na 20 siekund raniej, vy b jaho navat i nie pabačyli.
Uładzisłaŭ dadaŭ, što časta pasažyry niezadavoleny tym, što niedzie ŭ tuneli ciahnik prytarmožvaje — ale heta taksama źviazana z tym, što z nastupnaj stancyi ciahnik nie startavaŭ svoječasova.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy23
Kamientary