Minskaja sudździa, jakaja štampavała palityčnyja prysudy, padałasia ŭ advakaty
Dziasiatki kvalifikavanych advakataŭ stracili licenzii za svaje palityčnyja pohlady. Ich miesca zajmajuć «pravieranyja» ludzi. Sudździa Julija Hustyr dobra viadomaja minskim pratestoŭcam. U śniežni 2021-ha jana źniała sudziejskuju mantyju, a ciapier viartajecca da pracesaŭ — u novaj jakaści.
Hustyr pracavała ŭ sudzie Centralnaha rajona Minska. Palityčnyja spravy jana razhladała jašče da vybaraŭ. Tak, u śniežni 2019 hoda jana sudziła ŭdzielnikaŭ akcyi suprać intehracyi z Rasijaj.
U žniŭni 2020 dała 10 sutak «dydžeju pieramien» Uładzisłavu Sakałoŭskamu za pieśniu Coja, jakuju toj razam z kaleham uklučyŭ na dziaržaŭnym mierapryjemstvie ŭ Kijeŭskim skviery. Jaje rašeńniem atrymlivali sutki muzyka Cim Suładze, palityk Anatol Labiedźka.
Ahułam za palityku sudździa vydała 607 sutak administracyjnaha aryštu i štrafaŭ na amal 39 tysiač rubloŭ, zhodna z hramadzianskaj sistemaj manitorynhu zubr.cc. Ale hetyja źviestki, viadoma, niapoŭnyja, u realnaści achviar palityčnaha pieraśledu našmat bolš, čym viadoma pravaabaroncam.
Hustyr razhladała i kryminalnyja spravy. Minskaha architektara Arcioma Takarčuka jana pakarała 3,5 hadami kałonii — za toje, što padčas mirnaha marša za svabodnyja vybary toj udaryŭ vajskoŭca, jaki biespadstaŭna zatrymlivaŭ demanstrantaŭ. Sam architektar byŭ žorstka źbity.
Inšamu minčuku jana dała 2 hady kałonii za kinuty ŭ bok milicejskaha aŭtobusa piŭny kielich.
Za sprobu adbicca ad amapaŭcaŭ u lipieni 2020 hoda Hustyr adpraviła na 3 hady ŭ kałoniju 22-hadovaha demanstranta. A za sarvany z vadamiota elemient prysudziła minčuku 2 hady kałonii.
Usie hetyja spravy byli źviazanyja nie z chulihanstvam, a sa sprobami ludziej dabicca vykanańnia elemientarnych normaŭ zakonnaści — sumlennaha padliku hałasoŭ na vybarach, svabody słova i schodaŭ.
Pasadu sudździ Hustyr pakinuła ŭ kancy minułaha hoda «ŭ suviazi sa skančeńniem terminu paŭnamoctvaŭ».
Licenziju advakata byłaja sudździa atrymała zusim niadaŭna, 10 kastryčnika.
Ciapier Hustyr pracuje ŭ jurydyčnaj kansultacyi Kastryčnicaha rajona Minska. Jaje profil — adziny biez fota na sajcie kansultacyi.
Z kanca žniŭnia prajšła čarhovaja chvala zatrymańniaŭ advakataŭ. Pryjšli pa byłuju advakatku mastaka Alesia Puškina Juliju Jurhilevič. Schapili Uładzimira Anhielskaha — jon abaraniaŭ advakata Vitala Brahinca, jakoha trymajuć na Vaładarcy pa «narodnym» artykule 342. Na sutki adpravili advakataŭ Michaiła Makarava, jaki abaraniaŭ u sudzie palitviaźnia Mikitu Dranca pa spravie «Revalucyjnaha dziejańnia», i jaho žonku, taksama abaroncu, Viktoryju Hulkovu. Zatrymali taksama advakatku Nastaśsiu Sahanovič.
Paśla vybaraŭ 2020-ha bolš za 60 advakataŭ pazbavili prava abaraniać ludziej u sudach.
Ciapier u krainie kala 1100 abaroncaŭ pracujuć pa kryminalnych spravach. Pa mierkavańni adnaho ź ich, tolki 10 pracentaŭ hatovyja bracca za palityčnyja spravy.
«Naša Niva» — bastyjon biełaruščyny
PADTRYMAĆ«Kala 120 advakataŭ vyrašyli nie praciahvać svaju dziejnaść»
Karpienka nie vyklučyŭ, što prezidenta buduć abirać praz UNS18
Kamientary