Stali viadomyja niekatoryja detali «vybaraŭ» va UNS. Pramych vybaraŭ, vidać, nie budzie
Dyrektar Nacyjanalnaha centra zakanadaŭstva i pravavych daśledavańniaŭ Vadzim Ipataŭ raskazaŭ, jak ułady płanujuć arhanizavać vybary členaŭ Usiebiełaruskaha narodnaha schodu, piša BIEŁTA. Delehataŭ ad «hramadzianskaj supolnaści» buduć vybirać sami arhanizacyi, ad miascovych savietaŭ — sami deputaty.
Vadzim Ipataŭ raskazaŭ, što častka delehataŭ Usiebiełaruskaha narodnaha schodu budzie vybiracca, heta delehaty ad miascovych savietaŭ deputataŭ i hramadzianskaj supolnaści.
Jak mienavita budzie prachodzić abrańnie siabroŭ UNS z hramadzianskaj supolnaści i miascovych deputataŭ, čynoŭniki prapišuć u Vybarčym kodeksie. Adnak, jak vynikaje, pramych vybaraŭ, nie budzie.
«U nas u adpaviednaści z prajektam zakona «Ab hramadzianskaj supolnaści» vyznačana, što takoje subjekty hramadzianskaj supolnaści. Vybarčy kodeks havoryć ab tym, što vybary hetych delehataŭ buduć arhanizoŭvacca samimi subjektami, na pasiadžeńniach ich vyšejšych orhanaŭ. Jany buduć hetych delehataŭ vyłučać, za ich hałasavać i takim čynam jany potym buduć pracavać u jakaści delehataŭ UNS», — zajaviŭ Ipataŭ.
Delehataŭ ad miascovych savietaŭ deputataŭ buduć abirać abłasnyja saviety ad rehijona.
A što tyčycca Minska, to «tut asablivaja forma».
«U Minsku adsutničajuć rajonnyja saviety deputataŭ, a jość tolki Minski haradski. Prajektam praduhledžana, što ŭsie deputaty Minskaha haradskoha savieta zjaŭlajucca delehatami Usiebiełaruskaha narodnaha schodu», — patłumačyŭ Ipataŭ.
Pra delehataŭ UNS ad zakanadaŭčaj, vykanaŭčaj i sudovaj ułady dyrektar Nacyjanalnaha centra zakanadaŭstva i pravavych daśledavańniaŭ ničoha nie skazaŭ. Mahčyma, ich niejkim čynam taksama buduć pryznačać.
«Vybary» va UNS čakajucca paśla parłamienckich vybaraŭ u 2024 hodzie.
Učora Alaksandr Łukašenka zajaviŭ, što pry stvareńni UNS «vyklučna vybarnym šlacham usio budzie ažyćcioŭlena».
«UNS — heta vybarny orhan. Usio budzie iści ad naroda. I niama takoj nieabchodnaści Łukašenku tam usich pryznačać. Nu a ŭžo tyja «burakapadobnyja» tavaryšy — jany tudy nie patrapiać. Heta dakładna. Ich nichto nie abiare. Heta vorahi naroda. Voraham naroda tam rabić niama čaho. Ludzi sa svaim punktam hledžańnia — kali łaska», — skazaŭ jon.
Niadaŭna Łukašenka škadavaŭ, što pry ŭniasieńni papravak u Kanstytucyju nie dazvolili UNS abirać na svaim pasiedžańni i prezidenta. Ale paźniej jon skazaŭ, što narod pakul nie hatovy da takoha.
Kamientary