Abłasnyja i rajonnyja čynoŭniki, «mocnyja haspadarniki», siłavik. U Homieli idzie ceły kanviejer sudoŭ pa karupcyi
U pačatku sakavika ŭ sudach Homielskaj vobłaści razhladajecca adrazu niekalki kryminalnych spraŭ u dačynieńni da kiraŭnikoŭ dziaržaŭnych orhanaŭ. Vydańnie «Fłahštok» raskazała, kaho hetymi dniami sudziać u Homieli pa karupcyjnych złačynstvach. Imiony dla rehijona hučnyja.
Kiraŭnictva «Miłkavity»
Niahledziačy na bahaćcie karupcyjnych spraŭ z udziełam vyšejšych słužbovych asob vobłaści, dziaržSMI abychodziać hetuju temu bokam. Adzinaje vyklučeńnie — rezanansnaja kryminalnaja sprava ab zakupcy nieprydatnaj dla ŭžyvańnia karmavoj dabaŭki «Zieoł 3», vykarystańnie jakoj pryvodziła da padziažu žyvioły.
Sa źviestak śledstva viadoma, što dvoje pradprymalnikaŭ ź Minska, nie majučy śpiecyjalnaj adukacyi, prydumali recepturu karmavoj dabaŭki i zamovili jaje vytvorčaść u Rasii.
Pa viersii śledčych, dla padmanu spažyŭcoŭ fihuranty schilili supracoŭnika Instytuta ekśpierymientalnaj vieterynaryi imia S. M. Vyšaleskaha Ivana Dubinu da praviadzieńnia farmalnych daśledavańniaŭ i składańnia niedakładnych spravazdač ab efiektyŭnaści karmavoj dabaŭki.
Inšymi fihurantami kryminalnaj spravy źjaŭlajucca hienieralny dyrektar i viadučy śpiecyjalist pa sielskaj haspadarcy AAT «Miłkavita». Pa viersii śledstva, były kiraŭnik pradpryjemstva Vital Nikulin za pryniaćcie rašeńnia ab zakupcy «Zieoł 3» atrymaŭ chabar u pamiery 25 000 rubloŭ, a jahony padnačaleny — 16 000 rubloŭ.
Sudovaje raźbiralnictva pa spravie prachodzić u sudzie Čyhunačnaha rajona Homiela. Abvinavačvanym staviać u vinu machlarstva, słužbovyja padrobki, atrymańnie chabaru i pieravyšeńnie ŭłady i słužbovych paŭnamoctvaŭ.
Pieršy namieśnik staršyni Vietkaŭskaha rajvykankama
U asobnuju vytvorčaść pa spravie nieprydatnaj dla ŭžyvańnia karmavoj dabaŭki «Zieoł 3» vydzieleny epizod z udziełam pieršaha namieśnika staršyni Vietkaŭskaha rajvykankama Siarhieja Zabłockaha. Pa viersii śledstva, dla łabiravańnia prodažu «Zieoł 3» siarod haspadarak Vietkaŭskaha rajona namieśnik staršyni rajvykankama atrymaŭ u jakaści chabaru nie mienš za 5000 rubloŭ.
Ciapier eks-čynoŭnika sudziać za pieravyšeńnie ŭłady i słužbovych paŭnamoctvaŭ, a taksama za atrymańnie chabaru. Sprava razhladajecca ŭ sudzie Čyhunačnaha rajona Homiela.
Kiraŭnictva Homielskaha zavoda vieterynarnych preparataŭ
Pastaŭka haspadarkam nieprydatnaj da ŭžyvańnia karmavoj dabaŭki — nie adziny karupcyjny skandał u vieterynarnaj śfiery Homielskaj vobłaści.
Pierad sudom Navabielickaha rajona Homiela raniej taksama stali dyrektar, hałoŭny buchhałtar i načalnik kamiercyjnaha adździeła UP «Homielski zavod vieterynarnych preparataŭ». Ich abvinavacili ŭ kradziažy, złoŭžyvańni ŭładaj i słužbovymi paŭnamoctvami dy ŭ słužbovych padrobkach.
Ciapier u Homielskim abłasnym sudzie idzie razhlad apielacyi.
Hałoŭny čyhunačnik vobłaści
U sudzie Savieckaha rajona Homiela prachodzić razhlad kryminalnaj spravy pa fakcie karupcyi na Biełaruskaj čyhuncy. Adzin z abvinavačvanych — były načalnik Homielskaha adździaleńnia BČ Ryhor Dvorak.
Usiaho pa spravie prachodzić siem fihurantaŭ, jakich abvinavačvajuć u chabarnictvie, kradziažy, złoŭžyvańni ŭładaj, a taksama ŭ słužbovych padrobkach.
Milicejski načalnik
Homielskija siłaviki nie tolki łoviać čynoŭnikaŭ na chabarach, ale i sami imi nie hrebujuć. U sudzie Centralnaha rajona Homiela prachodzić razhlad kryminalnaj spravy ŭ dačynieńni da Andreja Kuźmiankova. Abvinavačvany ŭznačalvaŭ upraŭleńnie finansaŭ i tyłu UUS Homielskaha abłvykankama.
Ciapier jaho sudziać pavodle artykuła 430 č. 3 KK Biełarusi. Hety artykuł praduhledžvaje, što dla ździajśnieńnia złačynstva słužbovyja asoby abjadnalisia ŭ kiravanuju ŭstojlivuju hrupu.
Hałoŭny budaŭnik vobłaści
Z punktu hledžańnia pasady fihurantaŭ samym rezanansnym varta pryznać sudovy praces nad eks-staršynioj kamiteta architektury i budaŭnictva Homielskaha abłvykankama Siarhiejem Atraškovym.
Siarhiej Atraškoŭ uznačaliŭ budaŭničuju halinu Homielskaj vobłaści ŭ krasaviku 2022-ha, ale nie pratrymaŭsia i hoda.
Siońnia jon adzin ź fihurantaŭ kryminalnaj spravy pa słužbovych padrobkach, kradziažy i pieravyšeńni ŭłady. Akramia čynoŭnika z abłvykankama, abvinavačvanym vystupaje taksama dyrektar SU-243 AAT «DSK» Viktar Končyc. Sprava razhladajecca ŭ sudzie Savieckaha rajona Homiela.
Na niadaŭnim pasiadžeńni Homielskaha haradskoha vykanaŭčaha kamiteta prakuror abłasnoha centra Juryj Bułynka zajaviŭ, što ŭ paraŭnańni z 2021 hodam u Homieli ŭzrasła kolkaść karupcyjnych spraŭ na 30 pracentaŭ. Pra heta paviedamlaje «Homielskaja praŭda».
Značnaja kolkaść zarehistravanych kradziažoŭ šlacham złoŭžyvańnia słužbovymi paŭnamoctvami ździejśnili sami kiraŭniki arhanizacyj, na jakich uskładzieny abaviazak pa arhanizacyi antykarupcyjnaj pracy, akcentavaŭ uvahu prakuror. Imiony fihurantaŭ karupcyjnych spraŭ Bułynka nie nazvaŭ.
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie5
Kamientary