Byłoha kapitana MNS z Hrodna zatrymali za kamientaryi na adras rasijskich vajskoŭcaŭ i siłavikoŭ
Mužčynu vinavaciać taksama ŭ «rehistracyi ŭ čat-bocie płana «Pieramoha»».
Arciomu Ščypakinu z Hrodna 35 hadoŭ. Z 2013-ha hoda jon pracavaŭ u MNS, dasłužyŭsia da zvańnia kapitana ŭnutranaj słužby. Pracavaŭ u centry infarmatyki i kampjutaryzacyi Hrodzienskaha abłasnoha ŭpraŭleńnia MNS. Centr zajmajecca padtrymkaj i raspracoŭkaj prahram dla patrebaŭ MNS, a taksama vučyć rataŭnikoŭ imi karystacca.
«Čałaviek roznabakovy, myślić tvorča i niešabłonna, — pisaŭ pra mužčynu aficyjny sajt MNS. — Zachaplajecca čytańniem navukova-papularnaj litaratury i viadzie zdarovy ład žyćcia. Addaje pieravahu štodzionnym prabiežkam i rehularna ŭdzielničaje ŭ amatarskich masavych zabiehach na 3-5 kiłamietraŭ».
Mužčynu zatrymali za kamientaryi ŭ telehramie — pa źviestkach ź videa siłavikoŭ, jon «pisaŭ niehatyŭnyja kamientaryi na adras vajskoŭcaŭ RF i supracoŭnikaŭ milicyi Biełarusi». Taksama jamu prypisvajuć rehistracyju ŭ siaredzinie 2021 hoda ŭ bocie płana «Pieramoha».
U Hrodnie niadaŭna adbyłasia čarhovaja abłava siłavikoŭ. A niekalki tydniaŭ tamu rabočaha «Hrodna Azot» zatrymali za aktyvacyju fejkavaha čat-bota płana «Pieramoha». Siońnia nočču prajšła novaja abłava siłavikoŭ na piensijanieraŭ i čyhunačnikaŭ.
«Naša Niva» — bastyjon biełaruščyny
PADTRYMAĆBiełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?45
Kamientary