Prapahandysty zasvoili novy mietad raspaŭsiudžvańnia fejkaŭ: zamiest realnaha sajta stvarajuć kłon
Anłajn-prajekt Media IQ vyjaviŭ kłon sajta polskaha špitala, na jakim raźmiaścili chłuślivuju infarmacyju pra nibyta zahinułych bajcoŭ «pałka Kalinoŭskaha». I pravioŭ z hetaj nahody nievialikaje rasśledavańnie.
Prapahandyscki resurs «Žiołtyje ślivy» 22 traŭnia paviedamiŭ pra hibiel va Ukrainie 12 biełaruskich dobraachvotnikaŭ pałka Kalinoŭskaha. Pry hetym resurs spasyłaŭsia na publikacyju na sajcie vajskovaha špitala ŭ polskim Lublinie, kudy nibyta dastavili cieły zahinułych pad Bachmutam dobraachvotnikaŭ.
Media IQ pravioŭ ułasnaje rasśledavańnie i ŭ vyniku vyśvietliŭ, što navina źjaŭlajecca «fejkam», a sajt, na jakim raźmieščanaja publikacyja, — prosta dakładnaja kopija sapraŭdnaj veb-staronki polskaha špitala.
Niekatoryja spasyłki na padroblenym sajcie 1wszk.eu viali na aryhinalny sajt 1wszk.pl. Dziakujučy hetamu adrazu stała zrazumieła, što sajt, na jaki spasyłajecca praŭładny resurs, — kłon sapraŭdnaj staronki špitala sa źmienienaj damiennaj zonaj u adrasie.
Sajty adroźnivajucca tolki tym, što na aryhinalnaj veb-staroncy niama naviny pra cieły kalinoŭcaŭ, jakija nibyta zahinuli pad Bachmutam. Sama fejkavaja publikacyja napisanaja na polskaj movie i nibyta padpisanaja realnym aŭtaram, rabotnikam špitala.
Kab dakazać, što sajt 1wszk.eu źjaŭlajecca padrobkaj, aŭtary pravierki «prahnali» jaho praz servis Who is. Danyja zaśviedčyli, što imia ŭładalnika sajta i data jaho rehistracyi schavanyja, u toj čas jak usia infarmacyja pra sapraŭdny sajt špitala dastupnaja.
Dziakujučy praviercy danych damiena praz servis whois.eurid.eu, aŭtary rasśledavańnia zmahli pierakanacca, što sajt 1wszk.eu — iłžyvy. Damien zarehistravali tolki 19 traŭnia 2023 hoda. Heta značyć, kłon sajta špitala zarehistravali za dva dni da źjaŭleńnia na im publikacyi ab ciełach kalinoŭcaŭ. Elektronny adras, paznačany pry rehistracyi damiena, — [email protected].
Pa nazirańniach Media IQ, taki mietad raspaŭsiudžvańnia fejka vykarystany ŭ biełaruskaj prapahandzie ŭpieršyniu.
Nazaŭtra paśla publikacyi chłuślivuju navinu stali raspaŭsiudžvać rasijskija prapahandysckija miedyja.
U toj ža dzień, 23 traŭnia, lublinski špital apublikavaŭ terminovaje paviedamleńnie i paćvierdziŭ, što jahonaj aficyjnaj staronkaj źjaŭlajecca sajt z adrasam 1wszk.pl i što ŭstanova nie niasie adkaznaści za sajt-kłon.
Čamu Markaŭ nie Sałaŭjoŭ. Čym adroźnivajecca biełaruskaja i rasijskaja prapahanda
Prapahandysty vyrašyli nie zamaročvacca z pošukam śpikieraŭ. Voś jak vyhladali tyja, chto ačarniaŭ Bialackaha na BT
Jak pracuje chłuśnia: ruskija stvaryli fejkavy kanał ukrainskich marpiechaŭ, ciapier jaho biaskonca cytuje prapahanda, u tym liku minskaja
Stała viadomaje imia mužčyny, zatrymanaha ŭ Mahilovie za nibyta napad na hubazikaŭcaŭ27
Kamientary