Śpioka ŭ Piekinie bje rekordy. Takoje ŭražańnie, što nad horadam śvieciać try soncy

Raniej ułady horada z nasielnictvam bolš za 21 młn čałaviek užo abviaścili aranžavy (pieradapošni) uzrovień niebiaśpieki ŭ suviazi z mocnaj śpiokaj, a na minułym tydni była abvieščanaja tryvoha ŭ suviazi z ryzykaj ciepłavych udaraŭ, jak piša Bi-bi-si.

Śpioka supała sa śviatam drakona łodak Duań, kali kitajcy pa tradycyi šmat času pravodziać na vulicy. Adnak na praciahu ŭsiaho śviata, jakoje doŭžycca try dni, u rajonie Piekina čakajecca praciah śpioki, i ŭłady rekamiendujuć ludziam, asabliva tym, u kaho majucca prablemy sa zdaroŭjem, mienš času pravodzić na soncy, kab paźbiehnuć ciepłavych udaraŭ i inšych uskładnieńniaŭ.

Mnohija žychary Piekina vyrašyli ratavacca ad śpioki, kupajučysia ŭ šmatlikich kanałach horada.

«Raniej u červieni nikoli nie było tak horača, — napisaŭ u sacyjalnaj sietcy Weibo adzin z karystalnikaŭ. — Moža być, prosta ciapier nad Piekinam śvieciać adrazu try soncy?»

Prablemy z elektryčnaściu

Va ŭmovach śpioki da enierhietyčnaj sistemy Kitaja vystaŭlajucca asablivyja patrabavańni: adnačasovaje ŭklučeńnie šmatlikich kandycyjanieraŭ moža pryvieści da błekaŭtu.

I choć hetaha pakul nie adbyłosia, na minułym tydni Dziaržaŭnaje enierhietyčnaje ŭpraŭleńnie Kitaja navat zładziła na ŭschodzie krainy pieršyja ŭ historyi vučeńni, na jakich adpracoŭvalisia dziejańni na vypadak surjoznych pierabojaŭ z elektraenierhijaj.

U bujnym partovym horadzie Ciańcziń praz aktyŭnaje vykarystańnie kandycyjanieraŭ i inšaha elektraabstalavańnia nahruzka na elektrasietku ŭ červieni pavialičyłasia na 23% u paraŭnańni z pakazčykami minułaha hoda, i ŭłady horada stvaryli śpiecyjalnyja ramontnyja bryhady, jakija patrulujuć tuneli z elektrakabielami, kab možna było terminova likvidavać nastupstvy mahčymych avaryj.

U čym pryčyna anamalnaj śpiakoty?

Pa słovach navukoŭcaŭ, anamalnaja śpioka — heta adzin sa składnikaŭ hłabalnaha paciapleńnia, jakoje, u svaju čarhu, paskarajecca ŭ vyniku spalvańnia vykapniovych vidaŭ paliva. Dla krain Azii hetyja klimatyčnyja źmieny ŭ 30 razoŭ pavyšajuć imaviernaść anamalnaj śpioki.

Sapraŭdy, adrazu ŭ niekalkich krainach u apošnija tydni adznačajucca rekordna vysokija tempieratury. A krasavickaja śpioka ŭ Tajłandzie, Łaosie, Banhładeš i Indyi, kali tempieratura pieravalvała za 45°C, stała histaryčnym rekordam.

Nastupstvy takoj śpioki vylivajucca ŭ tysiačy śmierciaŭ, špitalizacyi, raspłaŭlenyja darohi i škodu dla inšych abjektaŭ infrastruktury.

• 2
• 1
• 0
• 12
• 9
• 2