Mielicina Staniuta stała śviedkaj biesparadkaŭ u Francyi i adkamientavała ich

Biesparadki ŭ Francyi pačalisia paśla taho, jak 27 červienia palicejskija zastrelili 17-hadovaha junaka. Pa aficyjnaj viersii, jon jechaŭ na aŭto i nie spyniŭsia pa patrabavańni palicyi. Palicyjanty taksama kazali, što chłopiec sprabavaŭ najechać na ich, ale videa heta abvierhła. Palicyjanta, jaki stralaŭ, zatrymali.

Mnohija ličać, što kali b chłopiec nie byŭ paŭnočnaafrykanskaha pachodžańnia (jon pry hetym mieŭ francuzskaje hramadzianstva), to stralać by nie stali.

Za hetyja dni pratestu, pa padlikach Associated Press, było zatrymana 3,3 tysiačy čałaviek. Ministr unutranych spraŭ Džerald Darmanin zajaviŭ, što siaredni ŭzrost aryštavanych skłaŭ 17 hadoŭ, a niekatorym było ŭsiaho 12 hadoŭ, kali jany ładzili pažary. Kala 60% aryštavanych raniej nie mieli sutyknieńniaŭ z palicyjaj, jak piša Bloomberg.

Biesparadki prajšli ŭ Paryžy, Marsieli, Tułuzie. Pratestoŭcy palać mašyny, rabujuć damy i kramy. Škoda moža skłaści niekalki sotniaŭ miljonaŭ jeŭra. Modny dom Celine admianiŭ pakaz mužčynskaj kalekcyi, jaki płanavaŭsia 2 lipienia ŭ Paryžy.

Pavialičyć

U kamunie Laj-le-Ruz (pryharad Paryža) dom mera prataraniŭ aŭtamabil, jaho žonka i adno z maleńkich dziaciej byli paranienyja.

Kab spravicca ź biesparadkami, ułady Francyi mabilizavali 45 tysiač supracoŭnikaŭ pravaachoŭnych orhanaŭ.

Biełaruskaja himnastka Mielicina Staniuta, jakaja ciapier žyvie ŭ Paryžy, bačyła heta na svaje vočy i padzialiłasia razvažańniami.

«Svaboda adnaho zakančvajecca, kali pačynajecca svaboda inšaha».

Mnie heta absalutna padabajecca. Pratesty, demanstracyja svajho mierkavańnia vitajucca, ale, na moj pohlad, heta pavinna być łahična i bieź vialikich razbureńniaŭ, jak było raniej.

Zmahajučysia za toje, kab vas pačuli, budźcie ŭpeŭnienyja, što vy źviartajeciesia da patrebnych vušej.

Ja maju na ŭvazie, kali vy abražanyja dziejańniami supracoŭnika palicyi — idzicie ŭ palicejski ŭčastak, navošta vy spalvajecie pryvatnuju ŭłasnaść i prymušajecie ludziej, jakija, vierahodna, znachodziacca na tym ža baku, što i vy, turbavacca i adčuvać stres.

Paviercie mnie, tak jak ja biełaruska, pratesty mohuć być roznymi. Pov 2020, — napisała spartoŭka ŭ instahramie pa-anhlijsku i dadała pa-biełarusku:

— Viedajecie, tekst na movie budzie scipły, bo vy i tak razumiejecie, što / jak / dzie / čamu možna vykazać svaju dumku. Kropka, bo ja viedaju, što my na adnoj chvali».

Hetyja pratesty paraŭnoŭvajuć z reakcyjaj u Amierycy na zabojstva afraamierykanca Džordža Fłojda ŭ 2020 hodzie. Kadr, jak palicejski prycisnuŭ jaho šyju kalenam da asfaltu, raźlacieŭsia ŭ miedyja.

• 49
• 0
• 11
• 8
• 9
• 8
• 5
• 0