Były načalnik Homielskaha adździaleńnia Biełaruskaj čyhunki, asudžany za chabar z adterminoŭkaj, usio ž budzie siadzieć

U krasaviku eks-čynoŭnika asudzili da čatyroch hadoŭ pazbaŭleńnia voli z adterminoŭkaj na dva hady i da štrafu ŭ pamiery 350 bazavych vieličyń (12,95 tysiačy rubloŭ).

Ciapier paśla zadavalnieńnia pratestu prakuratury Ryhor Dvorak zastaŭsia biez adterminoŭki i adpravicca adbyvać termin pazbaŭleńnia voli ŭ kałonii ŭzmocnienaha režymu.

Usiaho na łavie padsudnych pa hetaj spravie apynułasia siem słužbovych asob. Ich abvinavacili ŭ kradziažy šlacham złoŭžyvańnia słužbovymi paŭnamoctvami, dačy i atrymańni chabaru, a taksama słužbovaj padrobcy.

Pa źviestkach śledstva, abvinavačanyja vykarystoŭvali dla asabistych patreb majomaść, jakaja nabyvałasia dla pradpryjemstva. Heta byli łožki, tumby, matracy, a taksama bytavaja technika. Rabotnikam BČ taksama pastavili ŭ vinu złoŭžyvańni pry ździajśnieńni zakupak. Majomaść nabyvałasia pa zavyšanych cenach, a roźnicu ŭ cenach słužbovyja asoby prysvojvali. Złačynstvy ŭčynialisia ŭ pieryjad z 2019 pa 2021 hod.

Samaje surovaje pakarańnie ŭ vyniku było vyniesiena načalniku filijała budaŭniča-mantažnaha ciahnika №354 na stancyi Homiel. Abvinavačany atrymaŭ piać hadoŭ pazbaŭleńnia voli ŭ kałonii ŭzmocnienaha režymu.

Što tyčycca Ryhora Dvoraka, to, pavodle prakuratury Homielskaj vobłaści, «były načalnik RUP «Homielskaje adździaleńnie Biełaruskaj čyhunki» akazvaŭ dapamohu eks-dyrektaru filijała, jaki, złoŭžyvajučy słužbovymi paŭnamoctvami, arhanizavaŭ rekanstrukcyju jaho domaŭładańnia pieravažna za košt srodkaŭ BMC №354, čym pryčyniŭ škodu pradpryjemstvu na sumu bolš za 60 tysiač rubloŭ. Jon ža vykarystaŭ u pracoŭny čas transpartnyja srodki Homielskaha adździaleńnia BČ u asabistych metach, paśla čaho davaŭ ukazańni kiroŭcam unosić u darožnyja listy niedakładnyja źviestki», — paviedamlaje prakuratura Homielskaj vobłaści.

Ryhor Dvorak kiravaŭ Homielskim adździaleńniem BČ na praciahu dzieviaci hadoŭ. Akramia taho, jon byŭ i členam Savieta Respubliki šostaha sklikańnia. U 2020 hodzie homielskija čyhunačniki vychodzili na pikiet u znak pratestu suprać represij z boku kiraŭnictva Homielskaha adździaleńnia BČ. Rabotniki śćviardžali, što zvalnieńni niazhodnych adbyvalisia pa asabistym rasparadžeńni Dvoraka.

• 9
• 0
• 4
• 1
• 0
• 1
• 4
• 0