«Zakir Salijeŭ». Łukašenka zabiaśpiečyŭ siamju Bakijevych pašpartami Biełarusi ŭ dvuch varyjantach, jak robiać z ahientami. Heta dazvoliła Bakijevu zaklučyć druhi šlub paralelna — rasśledavańnie

U krasaviku 2010 hodzie ŭ Kyrhyzstanie adbylisia masavyja vystupleńni apazicyi z patrabavańniem adstaŭki vybranaha na novy termin prezidenta Kurmanbieka Bakijeva, jaki sam da hetaha ŭznačaliŭ krainu na chvali «revalucyi ciulpanaŭ» 2006 hoda. Jaho rodny brat Žanybiek Bakijeŭ, jaki kiravaŭ słužbaj dziaržaŭnaj achovy, addaŭ zahad stralać pa pratestoŭcach.

Rasstreł manifiestantaŭ vyklikaŭ novuju chvalu pratestaŭ. Kurmanbiek Bakijeŭ byŭ vymušany źbiehčy spačatku na poŭdzień krainy ŭ horad Oš, a zatym paśla pieramovaŭ z prezidentami Kazachstana, Rasii i Biełarusi pryniaŭ rašeńnie źbiehčy z krainy.

Nazarbajeŭ dapamoh Bakijevu vybracca z krainy, a Łukašenka padrychtavaŭ śpiecapieracyju pa evakuacyi.

Pryjom Bakijevych u Biełarusi

Jak śćviardžajuć rasśledavalniki, usiaho ŭ Biełaruś pryjechała jak minimum 20 členaŭ kłana Bakijeva. Znachodžańnie ich usich u Biełarusi treba było lehalizavać takim čynam, kab abyści ordar Interpała. Łukašenka zahadaŭ nie tolki vydać usim biełaruskija pašparty, ale i stvaryć asobnym čalcam kłana alternatyŭnyja asoby.

Spačatku ŭsim siamiejnikam Bakijeva aformili rehistracyju ŭ słužbovym internacie Słužby biaśpieki pa vulicy Karala, 38 u Minsku.

Usie astatnija pytańni lehalizacyi, jak śćviardžajecca ŭ materyjale, daručyli kuryravać supracoŭnicy Departamienta zabieśpiačeńnia apieratyŭna-vyšukovaj dziejnaści MUS Plaškievič Alenie Michajłaŭnie, jakaja bolš viadomaja jak Karalenka Łarysa Ivanaŭna. Pad hetym imiem jana vystupaje jak dyrektarka ŭstanovy «Łaryskor», stvoranaj dla prykryćcia apieratyŭna-vyšukovaj dziejnaści, naładžvańnia ahienturnaj pracy i śležki za palityčnymi apanientami.

Sprava z pašpartami Bakijeva

U biełaruskaje hramadzianstva Kurmanbiek Bakijeŭ byŭ pryniaty vielmi chutka na padstavie śpiecyjalnaha ŭkaza Łukašenki ad 10 žniŭnia 2010 hoda. Užo 13 žniŭnia Departamient pa hramadzianstvie i mihracyi MUS aformiŭ Bakijevu pašpart hramadzianina Biełarusi.

Jak śćviardžajuć rasśledavalniki, Bakijeŭ aformiŭ jašče adzin pašpart na inšaje imia z atrymańniem novaha ID-numara na imia Zakira Salijeva. Takim čynam, dla Bakijeva była stvorana druhaja asoba, bo, jak viadoma, kožnamu čałavieku pry pieršaj vydačy pašparta prysvojvajecca ŭnikalny identyfikacyjny numar. Źmianić jaho ci atrymać novy niemahčyma.

Vydača dvuch pašpartoŭ na roznyja imiony i z roznymi ID-numarami śviedčyć, jak śćviardžajuć aŭtary rasśledavańnia, ab hłybokaj prapracoŭcy i lehiendavańni, padobnaj tamu, jak heta było zroblena dla zhadanaj vyšej Łarysy Karalenka (Aleny Plaškievič).

Kurmanbiek Bakijeŭ z kyrhyzskim pašpartam nievyjazny ź Biełarusi, bo znachodzicca ŭ mižnarodnym vyšuku. A voś ź biełaruskim nie ŭsio tak adnaznačna. Akramia mahčymaściej padarožničać, najaŭnaść druhoha pašparta dała mahčymaść Bakijevu zaklučyć paralelna jašče adzin šlub.

Jak vyśvietlili, što Bakijeŭ i Salijeŭ — adna asoba

Rasśledavalniki raspaviali, što pieršapačatkova im byli viadomyja źviestki tolki pra druhuju žonku Bakijeva — Tałamušavu Nazhul Muratbiekaŭnu i jaje dziaciej.

Dziakujučy «Kibierpartyzanam» jany zmahli pravieryć najaŭnaść biełaruskich pašpartoŭ na imiony ŭsich viadomych dziaciej Bakijeva. U AIS «Pašpart» u pazašlubnych dziaciej Bakijeva baćkam paznačany Zakir Salijeŭ.

Pravieryŭšy pašpart i fota zahadkavaha Zakira Salijeva, rasśledavalniki vyśvietlili, što heta Kurmanbiek Bakijeŭ. Jany śćviardžajuć, što fotazdymki ŭ pašpartach na imia Kurmanbieka Bakijeva i Zakira Salijeva identyčnyja.

Paralelnaja žonka Bakijeva Nazhul Tałamušava pamierła ŭ studzieni 2023 hoda, 18 studzienia jaje pachavali ŭ jaje rodavaj vioscy.

Pavialičyć

U kaho z kłana Bakijeva jašče jość dva pašparty

Pa słovach rasśledavalnikaŭ, syn brata Bakijeva — Salijeŭ Asyłbiek Žanybiekavič — byŭ pryniaty ŭ hramadzianstva ŭ kastryčniku 2011 hoda. U 2017 hodzie jon atrymaŭ jašče adzin pašpart. Padstavaj dla vydačy novaha pašparta, jak i ŭ pieršym vypadku, paznačana daviedka ab pryniaćci ŭ hramadzianstva. U vyniku ŭ novym pašparcie na toje ž imia byŭ paznačany novy ID-numar, sfarmiravany ŭžo pa praviłach, jakija pačali dziejničać z 1 studzienia 2012 hoda, kali źmianiŭsia ałharytm farmiravańnia ID numara. U im ciapier niama adpaviednaści kankretnych ličbaŭ dacie naradžeńnia, a taksama niama ŭkazańnia na poł jaho ŭładalnika.

Atrymlivajecca, što Asyłbieka ŭ 2017 hodzie paŭtorna pryniali ŭ hramadzianstva, ale ŭžo jak zusim inšaha čałavieka.

Salijevymi ŭ Biełarusi stali małodšy brat Bakijeva Žanybiek i jaho siamja. Piatrovymi stali aficyjny syn Bakijeva Marat z žonkaj i dvoje synoŭ. Piatrovym staŭ i syn Marata ad jašče adnoj jaho spadarožnicy — Iny Mianiajłavaj. Na apošniuju ŭ Biełarusi zarehistravana AAT «Saŭn Choł», a na Kipry afšor Fairy Tale Holdings Limited.

Akramia Bakijeva, u Biełaruś źbieh były premjer-ministr Kyrhyzstana Danijar Usienaŭ, jaki źmianiŭ imia na Daniił Urycki.

Jak śćviardžajuć rasśledavalniki, čalcy kłanaŭ Bakijeva i Usienava viaduć u Biełarusi ceły šerah biznesaŭ ad kazino da bijatechnałahičnaj kampanii.

Najaŭnaść biełaruskich pašpartoŭ dazvalaje ŭsim bieśpieraškodna pieramiaščacca pa śviecie. Naprykład, sam Kurmanbiek Bakijeŭ u 2015 hodzie spakojna źlotaŭ na try tydni ŭ Izrail. A ŭ mai 2018 hoda na prezidenckim samalocie viarnuŭsia z Hruzii, dzie, chutčej za ŭsio, prabyŭ 10 dzion.

Brat Bakijeva Žanybiek Salijeŭ u mai 2011 hoda na piać dzion źlotaŭ u Aŭstryju, a ŭ červieni na try dni zjeździŭ u Litvu. Paźniej jon naviedaŭ Čarnahoryju, Hrecyju, AAE.

Čytajcie jašče:

Bakijeŭ choča viarnucca ŭ Kyrhyzstan?

Bakijeŭ padaryŭ tajamničy katedž kala Drazdoŭ 19-hadovaj dačce

Łukašenka sustreŭsia z Bakijevym i paraŭnaŭ jaho z ptuškaj

Jak vyhladaje dom Bakijeva, jaki jon sabie pabudavaŭ u Minsku FOTY

• 5
• 4
• 5
• 7
• 53