«Mnie kazali: Łarysa, ty zvodziš ludziej z rozumu». Što za «žaleznaja łedzi» abaraniaje ŭ Ženievie režym Łukašenki
Łarysie Bielskaj jak pastajannamu pradstaŭniku Biełarusi pry Adździaleńni AAN u Ženievie daručajecca retranślavać pazicyju aficyjnaha Minska. Na niadaŭniaj siesii Savieta pa pravach čałavieka AAN jana zajaŭlała, što palityčny pieraśled u krainie — heta dezynfarmacyja. Represii jana nazyvaje zakonnymi dziejańniami, a siabie — «žaleznaj łedzi».
«Nie samy paśpiachovy mieniedžar», «słužka», «miakki čałaviek»
Łarysa Bielskaja naradziłasia ŭ Minsku. Joj 60 hadoŭ. Jana vypusknica histaryčnaha fakulteta BDU. Paśla niekalkich hadoŭ vykładčyckaj i daśledčaj dziejnaści ŭ 1994-m uładkavałasia ŭ Ministerstva zamiežnych spraŭ.
Bielskaja pracavała ŭ roznych jaho strukturach. Naprykład, była pieršym sakratarom pasolstva Biełarusi ŭ ZŠA (2004—2008), daradcaj Pastajannaha pradstaŭnictva Biełarusi pry AAN (2012—2016), daradcaj-pasłańnikam biełaruskaha pasolstva ŭ Vialikabrytanii.
Kalehi pra Bielskuju kažuć, što jana «nie vielmi arhanizavanaja i nie samy paśpiachovy mieniedžar». Pa charaktary — miakki čałaviek. Ale pry hetym pracavitaja i aktyŭnaja. Damahałasia pasad nie pa błacie, a starannaściu i nastojlivaściu.
Bielskaja — biurakrat, «addanany vielmi dakładnamu vykanańniu abaviazkaŭ i daručeńniaŭ, jakija na jaje ŭskładvajucca», dadaje były dypłamat Pavieł Łatuška.
«Jana słužka, jakaja budzie rabić toje, što zahadajuć źvierchu», — ličyć jon.
Jon paraŭnoŭvaje słužboŭku ź viernym sałdatam, jaki budzie stukać abcasami i vykonvać kožny zahad.
Pa źviestkach «Biełpoła», Bielskaja nie zamužam, dziaciej u jaje niama.
«Žaleznaja łedzi»
Łukašenka pryznačyŭ Bielskuju pastajannym pradstaŭnikom Biełarusi pry Adździaleńni AAN u Ženievie 10 lutaha 2022 hoda. Tady jana pachvaliłasia, što maje dobry vopyt pieramoŭnaj pracy mienavita ŭ Ńju-Jorku, bo jana tam šmat pracavała.
Bielskaja skazała, što ŭ Jeŭropie u jaje skłaŭsia vobraz «žaleznaj łedzi». «Naohuł kazali: Larisa, you make people crazy [ty zvodziš ludziej z rozumu]», — dzialiłasia jana.
Tak jana chacieła padkreślić simpatyi da byłoha premjer-ministra Vialikabrytanii Marharet Tetčer.
Hetym jana padkreślivaje svaju vykanalnaść, zaŭvažajuć kalehi.
«Kali byli libieralnyja časy, to i rytoryka, i pohlady Bielskaj byli inšyja, — adznačaje adzin ź ich. — Heta typovyja pavodziny čynoŭnika-karjerysta — padładžvacca pad viecier».
Zamianiła adyjoznaha Ambrazieviča
Pavieł Łatuška pierasiakaŭsia ź Bielskaj, kali jana kiravała sakrataryjatam Ministerstva zamiežnych spraŭ (heta byli 1999—2002 hady). Tady źniešniepalityčnaje viedamstva ŭznačalvali Urał Łatypaŭ i Michaił Chvastoŭ. Abodva ŭ łukašenkavym asiarodździ taho času ličylisia libierałami. Rabili sproby palepšyć adnosiny z zachodnimi krainami.
Pavieł Łatuška ličyć, što dla Bielskaj pryznačeńnie pastajannym pradstaŭnikom Biełarusi pry Adździaleńni AAN u Ženievie — viaršynia dypłamatyčnaj karjery.
Na hetaj pasadzie jana zamianiła adyjoznaha Juryja Ambrazieviča. Jon inicyjavaŭ vychad Biełarusi z šerahu mižnarodnych kanviencyj, jakija baroniać pravy čałavieka. Bielskaja trymajecca taho ž kursu.
«Palityčnych źniavolenych niama»
Bielskaja najčaściej chvaravita reahuje ŭ svaich vystupach na parušeńni pravoŭ čałavieka ŭ Biełarusi.
Pavodle jaje, «biełaruskaja dziaržava mirna raźvivaje i palapšaje ŭmovy dla ŭsich pravoŭ čałavieka» nasupierak sankcyjam i izalacyi na mižnarodnaj arenie.
Represii ŭ Biełarusi čynoŭnica nazyvaje «zakonnymi dziejańniami pravaachoŭnych orhanaŭ u strymlivańni zahadzia padrychtavanych i finansavanych z-za miažy biesparadkaŭ».
U śviežym svaim vystupie Bielskaja abvinavaciła ekśpiertaŭ upraŭleńnia AAN pa pravach čałavieka ŭ tym, što jany, aceńvajučy situacyju ŭ Biełarusi, vykarystoŭvajuć dvajnyja standarty.
«U Biełarusi niama palityčnych źniavolenych. Asoby, jakija adbyvajuć pakarańnie, asudžanyja za kankretnyja złačynstvy, u tym liku suprać nacyjanalnaj biaśpieki. U Biełarusi da parušalnikaŭ zakona staviacca adnolkava, niezaležna ad taho, što jany źjaŭlajucca favarytami zamiežnych palitykaŭ abo dziejničajuć u ich intaresach», — vystupała jana.
«Chočacca zapytacca ŭ Bielskaj, a kali jaje rodnaha čałavieka pasadzili b u turmu i trymali ŭ statusie inkamunikada, jak Mikałaja Statkieviča, ad jakoha niama viestak bolš za 400 dzion, ci ličyła b jana, što heta adbyvajecca ŭ miežach nacyjanalnaha zakanadaŭstva?» — zadajecca pytańniem Pavieł Łatuška.
«Naša Niva» — bastyjon biełaruščyny
PADTRYMAĆHladzicie taksama:
Za kulisami Hienasamblei AAN: voś jak Łukašenka prajhraŭ Słavienii 38:153
Łukašenka pra adklučeńnie internetu ŭ 2020-m: Kali heta paŭtorycca, adklučym zusim23
Kamientary