Hramadziancy ZŠA i Rasii dali 12 hadoŭ kałonii za danat u 52 dalary ŭkrainskamu fondu
Prysud pa spravie ab dziaržzdradzie vynies sud u Jekaciarynburhu. Pavodle viersii abvinavačvańnia, Ksienija Karelina (Chavana) pieravodziła hrošy, jakija išli na zbory dla USU. Prakuror zapytvaŭ dla Karelinaj 15 hadoŭ.
Dziaŭčyna ŭ pieršy dzień vajny, 24 lutaha 2022 hoda, pieraviała sa svajho amierykanskaha rachunku 51,8 dalara ŭ fond Razom for Ukraine, stvoranamu ŭkraincami ŭ ZŠA. Pieravod siłaviki vyjavili ŭ telefonie Karelinaj, jaki byŭ u jaje kanfiskavany i ŭskryty.
33-hadovaja Ksienija Karelina žyła ŭ Łos-Andželesie, a ŭ studzieni 2024 hoda pryjechała da babuli ź dziadulem u Jekaciarynburh. Tam jaje i zatrymali.
Ksienija Chavana (Karelina — jaje dziavočaje proźvišča), pa viersii FSB, jakoje viało śledstva, «ź lutaha 2022 hoda (…) inicyjatyŭna ažyćciaŭlała pieravod hrašovych srodkaŭ u intaresach adnoj z ukrainskich arhanizacyj, jakija paśla nakiroŭvalisia na nabyćcio ŭzbrojenymi siłami Ukrainy pradmietaŭ taktyčnaj miedycyny, ekipiroŭki, srodkaŭ paražeńnia i bojeprypasaŭ».
Pravaabarončy prajekt «Pieršy adździeł», jaki śpiecyjalizujecca na spravach ab dziaržaŭnaj zdradzie, pisaŭ sa spasyłkaj na svaje krynicy, što padstavaj dla spravy staŭ adziny pieravod, zrobleny Chavanaj-Karelinaj u pieršy dzień poŭnamaštabnaha ŭvarvańnia Rasii va Ukrainu.
U toj ža čas vydańnie RBK sa spasyłkaj na advakata dziaŭčyny pisała, što Chavana pryznała vinu ŭ pieravodzie hrošaj USU.
Ab zatrymańni Ksienii stała viadoma 20 lutaha 2024 hoda. Heta adbyłosia ŭ Jekaciarynburhu, kudy jana prylacieła z Łos-Andželesa, kab naviedać svajakoŭ. Hramadzianstva ZŠA, miarkujučy pa sacsietkach dziaŭčyny, jana atrymała ŭ kancy 2021 hoda.
Pavodle infarmacyi «Pieršaha adździeła», jaje zatrymali jašče ŭ kancy studzienia supracoŭniki patrulna-pastavoj słužby nibyta za mat u hramadskim miescy, choć rapart byŭ składzieny supracoŭnikami FSB. Pa administracyjnaj spravie ab drobnym chulihanstvie jaje aryštavali na 14 sutak.
Ale jašče da vychadu sa śpiecpryjomnika joj aformili zatrymańnie pavodle kryminalnaj spravy ab dziaržaŭnaj zdradzie, paśla čaho sud adpraviŭ jaje na dva miesiacy ŭ SIZA.
Kamientary
Tak było v fašistskich i kommunističieskich sistiemach, tak ustrojena mafija i kleptokratija. Zakony napisany dla vorov i ubijc vo vłasti, dla ich błahopołučija.