Chutki varyjant vyjechać u ES. Kolki biaruć za pieravozku praź miažu na aŭto i matacykłach
Praz uviadzieńnie susiednimi krainami ES novych abmiežavańniaŭ trapić ź Biełarusi ŭ Jeŭrasajuz stanovicca ŭsio składaniej. Apošnim časam nabiraje papularnaść pierasiačeńnie miažy na spadarožnym transparcie. Pacikavilisia, kolki kaštuje stać pasažyram.
Rekordnyja čerhi
Čerhi na miažy z Polščaj bjuć rekordy: upieršyniu vyjezdu ź Biełarusi čakajuć bolš za 100 aŭtobusaŭ. Čarha ź lehkavikoŭ u apošnija dni stabilna składaje kala 500 mašyn.
Na litoŭskim kirunku čerhaŭ z aŭtobusaŭ niama, ale kvitkoŭ nie dakupicca, bo pa inicyjatyvie litoŭskaha boku značna skaraciłasia kolkaść rejsaŭ. Bližejšyja kvitki ź Minska ciapier pradajucca z vyjezdam na 3 vieraśnia, a z Hrodna — až na 5 vieraśnia.
Čerhi ź lehkavikoŭ prykmietna pamienšali paśla taho, jak Litva zabaraniła zajazdžać u krainu aŭtamabilam ź biełaruskimi numarami, aproč vypadkaŭ, kali ŭłaśnik aŭto maje vizu abo DNŽ, vydadzienyja mienavita Litvoj.
Usio heta spryjaje raźvićciu biznesu pa pieravozcy ludziej praź miažu pryvatnym transpartam, u tym liku na matacykłach.
U admysłovych čatach źjaŭlajecca ŭsio bolš zapytaŭ na toje, kab znajści čałavieka, hatovaha pieravieźci praź miažu. Naturalna, nie za biaspłatna, a kali jość popyt, to ŭźnikaje i prapanova.
Ad 50 jeŭra za pierajezd praź miažu
Za pieravozku praź miažu na skutary abo matacykle biaruć pa 50 jeŭra. I, miarkujučy pa kolkaści zapytaŭ, takaja pasłuha karystajecca popytam.
Analizujučy prapanovy, možna zrazumieć, što dla niekatorych žycharoŭ pryhraničča takija «padarožžy» pastaŭlenyja na patok. I heta nie dziŭna, bo za adnu pajezdku praź miažu tudy-nazad čałaviek moža atrymać 100 jeŭra.
Admietna, što, miarkujučy pa pravapisie i vykarystańni łacinskich litar dla napisańnia pa-rusku, zajmajucca hetym u tym liku hramadzianie Litvy, jakija mohuć jeździć u Biełaruś bieź vizy.
Dabracca z Ašmian abo z samaj miažy da Vilni mašynaj kaštuje 70 jeŭra z čałavieka. Heta bolš, čym cana bileta na aŭtobus (bilet kaštuje 160 rubloŭ, heta kala 45 jeŭra). Ale z ulikam deficytu kvitkoŭ takija prapanovy karystajucca popytam.
Dajechać ź Minska ŭ Vilniu možna za 100 jeŭra z čałavieka. Za takija hrošy navat abiacajuć prajezd biez čarhi.
Na polskim kirunku ceny krychu nižejšyja. Staŭka na pieravozku čałavieka praź miažu pačynajecca z 30 dalaraŭ.
Za 150 jeŭra niekatoryja hatovyja ŭziać sabie ŭ aŭto da 3 darosłych i adno dzicia. Za pajezdku pa maršrucie Brest-Varšava prosiać 250 jeŭra.
Vyšejzhadanyja ceny, mierkavana, tyčacca tych ludziej, dla kaho pieravozka ludziej praź miažu nie žest dobraj voli abo vypadkovaja padpracoŭka, a sapraŭdny biznes.
Ludzi, jakija čaściakom raźmiaščajuć abjavy ab nabory spadarožnikaŭ, jak praviła nazyvajuć adnolkavyja ceny. Ale kali paščaścić, to možna znajści hatovych pieravieźci vas praź miažu pa bolš nizkich cenach. Samaje tannaje, što davodziłasia pačuć u adkaz, — 30 jeŭra za Litvu i 60 jeŭra z Varšavy ŭ Minsk.
Kamientary