U Maskvie školnyja liniejki projduć u pamiaškańniach. I baćkoŭ na ich nie puściać
Śviatočnyja liniejki, pryśviečanyja pačatku navučalnaha hoda, u Maskvie buduć pravodzić nie na vulicy, jak zvyčajna, a ŭ pamiaškańniach. Pra heta RBK paviedamili troje nastaŭnikaŭ maskoŭskich škoł. Navučalny hod u hetym hodzie pačniecca 2 vieraśnia, jak i ŭ Biełarusi.
Anałahičnuju infarmacyju baćkam paviedamiła dyrektar škoły ŭ Niakrasaŭcy na paŭdniovym uschodzie Maskvy Maja Bułajeva.
«Sioleta farmat budzie niekalki nietradycyjnym: usie liniejki, u tym liku i sama hałoŭnaja liniejka dla pieršych i 11 kłasaŭ, projduć u pamiaškańniach. Heta, ja dumaju, budzie zroblena absalutna va ŭsich škołach našaha horada», — skazała jana.
Pry hetym baćki na liniejkach prysutničać nie buduć. Pa słovach dyrektara, heta źviazana ź biaśpiekaj dziaciej, a škoła budzie vieści anłajn-tranślacyju mierapryjemstva. Pieršy ŭrok u škole pačniecca z «Razmovy pra važnaje», adznačyła Bułajeva.
Pra pieranos liniejek u Maskvie ŭ zakrytyja pamiaškańni taksama paviedamiŭ telehram-kanał Baza.
Pa słovach nastaŭnika historyi škoły ŭ Zielenahradzie Alaksandra Odža, heta rašeńnie pradyktavana «pytańniami biaśpieki». Inšy nastaŭnik maskoŭskaj škoły paviedamiŭ, što farmalna praviadzieńnie liniejki ŭ pamiaškańni tłumačać zanadta haračym nadvorjem.
U inšych rehijonach Rasii farmat śviatočnych liniejek taksama budzie źmienieny.
Tak, pres-słužba hubiernatara Rastoŭskaj vobłaści Vasila Hołubieva 24 žniŭnia paviedamiła ab rašeńni pravieści ŭsie liniejki ŭ zakrytych pamiaškańniach. Takoje ž rašeńnie pryniali ŭłady Branskaj vobłaści.
U abłaściach, jakija miažujuć z Ukrainaj, navučańnie budzie iści pa źmiašanaj sistemie.
Kamientary