Za dva hady kolkaść pajezdak litoŭskich hramadzian u Biełaruś skaraciłasia ŭ piać razoŭ
Kolkaść hramadzian Litvy, jakija naviedali Biełaruś, za dva hady skaraciłasia ŭ piać razoŭ, paviedamiła ŭ paniadziełak Słužba achovy dziaržaŭnaj miažy Litvy, paviedamlaje LRT.
U žniŭni hetaha hoda hramadzianie Litvy źjeździli ŭ susiedniuju krainu 10 tysiač razoŭ. U žniŭni 2022 hoda hety pakazčyk składaŭ 50 tys. razoŭ, a ŭ žniŭni minułaha hoda — 33 tys.
Pavodle źviestak pamiežnaj słužby, u žniŭni hetaha hoda hramadzianie Litvy pierasiakali miažu ź Biełaruśsiu praz punkty pamiežnaha kantrolu 10 020 razoŭ. Niekatoryja ź ich źjeździli tudy nie adzin raz, bo kolkaść tak zvanych unikalnych vyjezdaŭ skłała 7 358.
Paśla ŭviadzieńnia Biełaruśsiu ŭ krasaviku 2022 hoda biaźvizavaha režymu dla hramadzian Litvy niekatoryja ź ich, asabliva žychary pamiežnych ź Biełaruśsiu rajonaŭ, stali čaściej jeździć u susiedniuju krainu. Najbolšaja kolkaść pajezdak u Biełaruś za hety pieryjad była zafiksavanaja ŭ lipieni 2022 hoda. U hetym miesiacy hramadzianie Litvy pierasiekli miažu ź Biełaruśsiu 56048 razoŭ. Paźniej hetaja kolkaść stała źnižacca. Naprykład, u studzieni minułaha hoda było zafiksavana 36379 pierasiačeńniaŭ, a ŭ śniežni — 16930.
U lutym hetaha hoda hramadzianie Litvy źjeździli ŭ Biełaruś 20174 razy, a ŭ sakaviku — tolki 8903 razy.
Pa słovach litoŭskich pamiežnikaŭ, pierałom adbyŭsia ŭ sakaviku hetaha hoda, kali Litva zakryła jašče dva mižnarodnyja punkty propusku na miažy ź Biełaruśsiu — «Rajhard» i «Łavaryški». Pierad hetym, u žniŭni 2023 hoda, była prypynienaja praca punktaŭ propusku «Ćvierač» i «Šumsk».
Jak i inšyja litoŭskija viedamstvy, Słužba achovy dziaržaŭnaj miažy Litvy papiaredziła hramadzian ab niebiaśpiecy pajezdak u Biełaruś. Śpiecsłužby papiaredžvajuć hramadzian Litvy, što pry pajezdcy ŭ susiedniuju krainu ich mohuć pasprabavać vierbavać łukašenkaŭskija śpiecsłužby.
Jak vyhladaje 46-hadovy juryst Juraś Ziankovič praz try z pałovaj hady źniavoleńnia ŭ biełaruskaj turmie13
Kamientary