Izalacyja ŭ rezidencyjach i huvierniory z Paŭdniovaj Afryki. Jak žyvuć zasakrečanyja syny Pucina i Kabajevaj

Pra žyćcio dziaciej prezidenta Rasii Uładzimira Pucina i byłoj himnastki Aliny Kabajevaj raskazvaje centr «Daśje».

Pieršy syn Ivan u pary naradziŭsia ŭ 2015 hodzie, druhi Uładzimir — u 2019-m. Žurnalisty pa etyčnych mierkavańniach nie stali raźmiaščać ich zdymki. Paviedamlajecca, što chłopčyki žyvuć pa dakumientach prykryćcia, jakija zvyčajna robiać dla raźviedčykaŭ i ludziej pad abaronaj dziaržavy. Dakładnyja daty naradžeńnia viedajuć tolki blizkija svajaki.

Niekatoryja padrabiaznaści žyćcia dvuch synoŭ Pucina i Kabajevaj «Daśje» na ŭmovach ananimnaści raskazaŭ supracoŭnik rezidencyi, u jakoj jany pražyvajuć.

Huvierniory

Vydańnie adšukała taksama abviestku pra pošuk vykładčyka anhlijskaj movy dla dvuch chłopčykaŭ 4 i 8 hadoŭ u siamju, jakaja «pražyvaje izalavana» ŭ rehijonie Sankt-Pieciarburha. Zarobak za 60-hadzinny pracoŭny tydzień abiacali pamieram 7700 jeŭra ŭ miesiac. Pry hetym pieravahu addavali kandydatam z pašpartam Paŭdniova-Afrykanskaj Respubliki, jakuju rasijskija ŭłady ličać «siabroŭskaj krainaj».

Śćviardžajecca, što hetaja abviestka rehularna źjaŭlajecca na sajcie ahienctva pa padbory piersanału English Nanny.

Pavialičyć

Kandydat na pracu ŭ siamji prachodzić sumoŭje pa videasuviazi z asistentam siamji. Paśla hetaha — miedycynski ahlad i dva tydni karancinu na kurorcie «Ihora» ŭ Leninhradskaj vobłaści ci ŭ rezidencyjach Pucina na Vałdai ci Sočy.

Piedahahičny piersanał napramuju nie kamunikuje z baćkami dziaciej. Usie rasparadžeńni im dajuć pamočniki siamji. Čaściej za ŭsio huvierniory atrymlivajuć pasłańni ad stryječnaj siastry Aliny Kabajevaj Alesi Fiedzinaj, jakaja vydaje siabie za maci chłopčykaŭ. Jana asabista znajomicca z huvierniorami, kali ich prymajuć na rabotu.

Rasparadak dnia

Vydańnie raskazvaje pra rasparadak dnia dziaciej. U 8-9 hadzin ich pryvodziać da nianiek i huviernioraŭ. Razam jany śniedajuć. Ježu dla dziaciej hatujuć asabistyja kuchary. U kožnaha z chłopčykaŭ svoj kubak, tolki ź jaho jany pjuć. Pobač ź imi zaŭsiody achoŭniki sa słužby achovy prezidenta.

Paśla śniadanku ź imi zajmajucca. Kožny zaniatak pa 30-45 chvilin. Zatym — hulni. Na Vałdai ŭ rasparadžeńni chłopčykaŭ dva poni, trusiki i sienbiernar.

Pavialičyć

Apoŭdni dzieci abiedajuć, zatym śpiać. Paśla snu — vučebnyja i spartyŭnyja zaniatki. Paśla 8-j viečara dziaciej zabirajuć kiroŭcy, i jany amal adrazu iduć spać.

Jak paviedamlajecca, z chłopčykami zaŭsiody na praciahu dnia niekalki huviernioraŭ-nastaŭnikaŭ anhlijskaj i niamieckaj movaŭ. Siarod ich, akramia hramadzian Paŭdniova-Afrykanskaj respubliki, hramadzianie Vialikabrytanii i Novaj Ziełandyi.

Časam u rezidencyi źjaŭlajucca i inšyja dzieci, pieradusim heta dzieci siabroŭ Kabajevaj. Jany, jak i ŭsie astatnija, vymušany adbyć dvuchtydniovy karancin.

Vydańnie adznačaje, što chłopčykaŭ moh bačyć Łukašenka, kali ŭ lutym 2021 hoda byŭ u rezidencyi Pucina ŭ Sočy. Druhaja sustreča mahła adbycca ŭ lipieni 2023 hoda, kali jon naviedvaŭ Muziej vajenna-marskoj słavy ŭ Kranštacie. U toj čas tam była i Kabajeva ź dziećmi.

Dla spartyŭnych zaniatkaŭ amal u kožnaj rezidencyi raźmieščany spartyŭny kompleks z załaj dla himnastyki i basiejnam. Ź dziećmi zajmajucca piersanalnyja treniery pa płavańni i spartyŭnaj himnastycy.

Pa infarmacyi krynicy vydańnia, Uładzimir Pucin padčas svaich niačastych sustreč hulaje ŭ chakiej sa starejšym Ivanam. Dla hetaha na terytoryi rezidencyi na Vałdai pabudavali chakiejnuju placoŭku.

Časam na hulniu prychodzić pahladzieć i Kabajeva. Jana paźbiahaje prysłuhi i sočyć za hulnioj z asobnaj łožy, jakaja chavajecca za nieprazrystym škłom. Takim ža čynam baćki nazirajuć i za pradstaŭleńniami, jakija nastaŭniki razam ź dziećmi rychtujuć da vialikich śviataŭ.

Pajezdki

Jak paviedamlajecca, bolšuju častku hoda siamja pravodzić na Vałdai. Tam jany sustrakajuć Novy hod. Zvyčajna ŭ lutym-sakaviku ŭsie razam adpraŭlajucca ŭ Sočy katacca na łyžach. Letam padarožničajuć na jachcie.

Tak, letam 2023 hoda jany ŭsie razam byli na borcie 84-miatrovaj jachty Graceful. Jaje supravadžała jachta mienšych pamieraŭ. Tudy kožny ranak advozili dziaciej na zaniatki. Nazad jany viartalisia da 10-j hadziny viečara. Jachty, kab nie źviartać na siabie ŭvahu, znachodzilisia na adlehłaści.

Pavialičyć

Paśla abychodu Finskaha zaliva, padčas jakoha siamja naviedała muziej u Kranštacie, Kabajeva ź dziećmi praciahnuła padarožža i naviedała Vałaamski i Konieŭski manastyry na Ładažskim voziery.

U lipieni 2024 hoda vandroŭka prajšła pa padobnym maršrucie. Mienavita ŭ hety čas Łukašenka sustrakaŭsia z Pucinym u Vałaamskim manastyry.

U žniŭni siamja zvyčajna žyvie ŭ Krymie, a ŭvosień pierabirajecca ŭ Sočy ŭ rezidencyju «Bačaraŭ ručaj».

Časam dla pajezdak pa krainie vykarystoŭvajuć śpiećciahnik. Tady dziaciej supravadžaje abmiežavanaja kolkaść piersanału. Taksama dla pieramiaščeńnia siamji i absłuhovaha piersanału vykarystoŭvajuć samaloty i viertaloty.

I na Vałdai, i ŭ pajezdkach dzieci i absłuhovy piersanał žyvuć pablizu ŭ asobnych budynkach. Zaniatki adbyvajucca ŭ śpiecyjalna abstalavanych budynkach. Niahledziačy na toje, što ŭsie abjekty raźmieščany ŭ krokavaj dastupnaści, pieššu nichto nie pieramiaščajecca. Usie jeździać na mašynach. Bolš za toje, na Vałdai častcy supracoŭnikaŭ zabaroniena chadzić pa terytoryi, tamu jany vymušany vykarystoŭvać transpart.

Jak piša vydańnie, u pajezdkach rasparadak dnia dziaciej mała mianiajecca. Jany, jak zvyčajna, amal uvieś dzień pravodziać z nastaŭnikami, jakija ź imi zajmajucca i zabaŭlajuć ich.

Jak śćviardžaje krynica vydańnia, adziny čałaviek, jaki moža stroha pahavaryć z chłopčykami — heta ich baćka. Kabajeva taksama moža prajavić surovaść i navat emacyjnaść, ale tolki pakarańnie z boku baćki jany ŭsprymajuć usurjoz.

• 0
• 3
• 3
• 23
• 0
• 0
• 8
• 0