Ізаляцыя ў рэзідэнцыях і гувернёры з Паўднёвай Афрыкі. Як жывуць засакрэчаныя сыны Пуціна і Кабаевай

Пра жыццё дзяцей прэзідэнта Расіі Уладзіміра Пуціна і былой гімнасткі Аліны Кабаевай расказвае цэнтр «Дасье».

Першы сын Іван у пары нарадзіўся ў 2015 годзе, другі Уладзімір — у 2019-м. Журналісты па этычных меркаваннях не сталі размяшчаць іх здымкі. Паведамляецца, што хлопчыкі жывуць па дакументах прыкрыцця, якія звычайна робяць для разведчыкаў і людзей пад абаронай дзяржавы. Дакладныя даты нараджэння ведаюць толькі блізкія сваякі.

Некаторыя падрабязнасці жыцця двух сыноў Пуціна і Кабаевай «Дасье» на ўмовах ананімнасці расказаў супрацоўнік рэзідэнцыі, у якой яны пражываюць.

Гувернёры

Выданне адшукала таксама абвестку пра пошук выкладчыка англійскай мовы для двух хлопчыкаў 4 і 8 гадоў у сям'ю, якая «пражывае ізалявана» ў рэгіёне Санкт-Пецярбурга. Заробак за 60-гадзінны працоўны тыдзень абяцалі памерам 7700 еўра ў месяц. Пры гэтым перавагу аддавалі кандыдатам з пашпартам Паўднёва-Афрыканскай Рэспублікі, якую расійскія ўлады лічаць «сяброўскай краінай».

Сцвярджаецца, што гэтая абвестка рэгулярна з'яўляецца на сайце агенцтва па падборы персаналу English Nanny.

Павялічыць

Кандыдат на працу ў сям'і праходзіць сумоўе па відэасувязі з асістэнтам сям'і. Пасля гэтага — медыцынскі агляд і два тыдні каранціну на курорце «Ігора» ў Ленінградскай вобласці ці ў рэзідэнцыях Пуціна на Валдаі ці Сочы.

Педагагічны персанал напрамую не камунікуе з бацькамі дзяцей. Усе распараджэнні ім даюць памочнікі сям'і. Часцей за ўсё гувернёры атрымліваюць пасланні ад стрыечнай сястры Аліны Кабаевай Алесі Федзінай, якая выдае сябе за маці хлопчыкаў. Яна асабіста знаёміцца з гувернёрамі, калі іх прымаюць на работу.

Распарадак дня

Выданне расказвае пра распарадак дня дзяцей. У 8-9 гадзін іх прыводзяць да нянек і гувернёраў. Разам яны снедаюць. Ежу для дзяцей гатуюць асабістыя кухары. У кожнага з хлопчыкаў свой кубак, толькі з яго яны п'юць. Побач з імі заўсёды ахоўнікі са службы аховы прэзідэнта.

Пасля сняданку з імі займаюцца. Кожны занятак па 30-45 хвілін. Затым — гульні. На Валдаі ў распараджэнні хлопчыкаў два поні, трусікі і сенбернар.

Павялічыць

Апоўдні дзеці абедаюць, затым спяць. Пасля сну — вучэбныя і спартыўныя заняткі. Пасля 8-й вечара дзяцей забіраюць кіроўцы, і яны амаль адразу ідуць спаць.

Як паведамляецца, з хлопчыкамі заўсёды на працягу дня некалькі гувернёраў-настаўнікаў англійскай і нямецкай моваў. Сярод іх, акрамя грамадзян Паўднёва-Афрыканскай рэспублікі, грамадзяне Вялікабрытаніі і Новай Зеландыі.

Часам у рэзідэнцыі з'яўляюцца і іншыя дзеці, перадусім гэта дзеці сяброў Кабаевай. Яны, як і ўсе астатнія, вымушаны адбыць двухтыднёвы каранцін.

Выданне адзначае, што хлопчыкаў мог бачыць Лукашэнка, калі ў лютым 2021 года быў у рэзідэнцыі Пуціна ў Сочы. Другая сустрэча магла адбыцца ў ліпені 2023 года, калі ён наведваў Музей ваенна-марской славы ў Кранштаце. У той час там была і Кабаева з дзецьмі.

Для спартыўных заняткаў амаль у кожнай рэзідэнцыі размешчаны спартыўны комплекс з залай для гімнастыкі і басейнам. З дзецьмі займаюцца персанальныя трэнеры па плаванні і спартыўнай гімнастыцы.

Па інфармацыі крыніцы выдання, Уладзімір Пуцін падчас сваіх нячастых сустрэч гуляе ў хакей са старэйшым Іванам. Для гэтага на тэрыторыі рэзідэнцыі на Валдаі пабудавалі хакейную пляцоўку.

Часам на гульню прыходзіць паглядзець і Кабаева. Яна пазбягае прыслугі і сочыць за гульнёй з асобнай ложы, якая хаваецца за непразрыстым шклом. Такім жа чынам бацькі назіраюць і за прадстаўленнямі, якія настаўнікі разам з дзецьмі рыхтуюць да вялікіх святаў.

Паездкі

Як паведамляецца, большую частку года сям'я праводзіць на Валдаі. Там яны сустракаюць Новы год. Звычайна ў лютым-сакавіку ўсе разам адпраўляюцца ў Сочы катацца на лыжах. Летам падарожнічаюць на яхце.

Так, летам 2023 года яны ўсе разам былі на борце 84-мятровай яхты Graceful. Яе суправаджала яхта меншых памераў. Туды кожны ранак адвозілі дзяцей на заняткі. Назад яны вярталіся да 10-й гадзіны вечара. Яхты, каб не звяртаць на сябе ўвагу, знаходзіліся на адлегласці.

Павялічыць

Пасля абыходу Фінскага заліва, падчас якога сям'я наведала музей у Кранштаце, Кабаева з дзецьмі працягнула падарожжа і наведала Валаамскі і Конеўскі манастыры на Ладажскім возеры.

У ліпені 2024 года вандроўка прайшла па падобным маршруце. Менавіта ў гэты час Лукашэнка сустракаўся з Пуціным у Валаамскім манастыры.

У жніўні сям'я звычайна жыве ў Крыме, а ўвосень перабіраецца ў Сочы ў рэзідэнцыю «Бачараў ручай».

Часам для паездак па краіне выкарыстоўваюць спеццягнік. Тады дзяцей суправаджае абмежаваная колькасць персаналу. Таксама для перамяшчэння сям'і і абслуговага персаналу выкарыстоўваюць самалёты і верталёты.

І на Валдаі, і ў паездках дзеці і абслуговы персанал жывуць паблізу ў асобных будынках. Заняткі адбываюцца ў спецыяльна абсталяваных будынках. Нягледзячы на тое, што ўсе аб'екты размешчаны ў крокавай даступнасці, пешшу ніхто не перамяшчаецца. Усе ездзяць на машынах. Больш за тое, на Валдаі частцы супрацоўнікаў забаронена хадзіць па тэрыторыі, таму яны вымушаны выкарыстоўваць транспарт.

Як піша выданне, у паездках распарадак дня дзяцей мала мяняецца. Яны, як звычайна, амаль увесь дзень праводзяць з настаўнікамі, якія з імі займаюцца і забаўляюць іх.

Як сцвярджае крыніца выдання, адзіны чалавек, які можа строга пагаварыць з хлопчыкамі — гэта іх бацька. Кабаева таксама можа праявіць суровасць і нават эмацыйнасць, але толькі пакаранне з боку бацькі яны ўспрымаюць усур'ёз.

• 0
• 3
• 3
• 23
• 0
• 0
• 8
• 0