U śviecie jość adzinaje ŭnikalnaje miesca, adkul vada moža patrapić u try akijany

Pik Trajnoha Vodapadziełu (Triple Divide Peak) znachodzicca ŭ nacyjanalnym parku Hlejšer u štacie Mantana (ZŠA). Jak piša Live Science, jaho nazyvajuć adzinym na Ziamli miescam, dzie sychodziacca vadazbory troch akijanaŭ. Padobnyja «trajnyja vodapadzieły» isnujuć i ŭ inšych častkach śvietu, ale nidzie bolš havorka nie idzie pra try roznyja akijany adnačasova.

Hara znachodzicca na tak zvanym Kantynientalnym vodapadziele Paŭnočnaj Amieryki — ujaŭnaj linii, jakaja prachodzić praz Skalistyja hory i raździalaje asnoŭnyja račnyja sistemy kantynienta. Ź viaršyni hary vada moža pajści na zachad praz basiejn raki Kałumbija i ŭrešcie apynucca ŭ Cichim akijanie. Inšy šlach viadzie praz reki Misury i Misisipi ŭ Atłantyčny akijan. Treci napramak prachodzić praz raku Saskačevan i Hudzonaŭ zaliŭ.

Mienavita vakoł statusu Hudzonava zaliva i ŭźnikajuć sprečki pamiž navukoŭcami. Častka daśledčykaŭ ličyć zaliŭ častkaj Atłantyčnaha akijana. U takim vypadku vada z hetaj hary traplaje tolki ŭ dva akijany — Cichi i Atłantyčny. Adnak Mižnarodnaja hidrahrafičnaja arhanizacyja adnosić jaho da Paŭnočnaha Ledavitaha akijana. Pavodle takoj kłasifikacyi, Pik Trajnoha Vodapadziełu sapraŭdy złučaje try akijany.

Hieohrafy adznačajuć, što akramia Piku Trajnoha Vodapadziełu ŭ Paŭnočnaj Amierycy jość jašče adna viaršynia, vada ź jakoj moža trapić u try roznyja basiejny. Heta Śniežny kupał (Snow Dome) u Kanadzie. Ź jaho schiłaŭ vada moža nakiravacca ŭ Cichi akijan praz raku Kałumbija, u Paŭnočny Ledavity akijan — praz raku Makienzi, abo ŭ Hudzonaŭ zaliŭ — praz raku Nelsan.

I kali ličyć Hudzonaŭ zaliŭ častkaj Atłantyčnaha akijana, mienavita Śniežny kupał, a nie Pik Trajnoha Vodapadziełu, budzie adzinym miescam na Ziamli, jakoje złučaje try akijany.

Abiedźvie viaršyni raźmieščanyja taksama na skryžavańniach inšych bujnych vodapadziełaŭ. Akramia Kantynientalnaha, Pik Trajnoha Vodapadziełu znachodzicca jašče i na Łaŭrencijskim vodapadziele, jaki adździalaje basiejn Hudzonava zaliva na poŭnačy ad basiejna Mieksikanskaha zaliva na poŭdni. Śniežny kupał, u svaju čarhu, lažyć na Arktyčnym vodapadziele, što raździalaje vody Paŭnočnaha Ledavitaha akijana i Hudzonava zaliva.

Dla turystaŭ heta prosta malaŭničy horny rajon ź ledavikami i aziorami. Ale dla hieohrafaŭ i hidrołahaŭ hetyja miescy — sapraŭdnyja «hidrałaičnyja skryžavańni» płaniety, dzie adna kropla moža adpravicca ŭ padarožža da troch roznych akijanaŭ.

• 6
• 0
• 0
• 0
• 0
• 0
• 0
• 0