Stalica Mieksiki apuskajecca pad ziamlu tak chutka, što heta bačna z kosmasu
U niekatorych rajonach Miechika apuskajecca prykładna na 24 santymietry ŭ hod. Heta adzin z najvyšejšych pakazčykaŭ prasiadańnia siarod haradoŭ śvietu. Čamu stalica Mieksiki akazałasia ŭ takoj situacyi i ci jość u horada šancy na vyratavańnie, raźbirałasia Associated Press.
Miechika razam z navakolnymi terytoryjami — adzin z najbujniejšych miehapolisaŭ płaniety: jon zajmaje kala 7800 kvadratnych kiłamietraŭ, a nasielnictva ahłamieracyi dasiahaje prykładna 22 miljonaŭ čałaviek. Horad byŭ pabudavany na miescy staražytnaha voziera. U centry niekatoryja vulicy raniej byli kanałami, a ŭ sielskich rajonach na ŭskrainach jany zachavalisia dahetul.
Asnoŭnaj pryčynaj apuskańnia źjaŭlajecca intensiŭnaja adpampoŭka padziemnych vod u spałučeńni z urbanizacyjaj. Heta pryviało da značnaha skaračeńnia vadanosnaha płasta, u vyniku čaho horad apuskajecca ŭžo bolš za stahodździe. U mnohich miescach heta vidać pa nachilenych histaryčnych budynkach i pomnikach, u tym liku Kafiedralnym sabory, budaŭnictva jakoha pačałosia ŭ 1573 hodzie.
Pavodle hieafizika Enrykie Kabrala z Nacyjanalnaha aŭtanomnaha ŭniviersiteta Mieksiki, prasiadańnie nanosić škodu klučavoj infrastruktury horada — mietro, sistemam drenažu i vodazabieśpiačeńnia, žyllu i daroham.
U niekatorych rajonach horada, naprykład, kala hałoŭnaha aeraporta i pomnika «Anioł niezaležnaści», ziamla apuskajecca ŭ siarednim na dva santymietry štomiesiac. U cełym heta daje kala 24 santymietraŭ u hod. Za mienš čym stahodździe ŭ asobnych miescach Miechika prasiadańnie skłała bolš čym 12 mietraŭ.
Pavodle ekśpiertaŭ, heta adzin z samych vysokich tempaŭ u śviecie. Padobnyja pakazčyki fiksujucca ŭ asobnych rajonach indaniezijskaj Džakarty.
Novy etap u vyvučeńni hetaj prablemy pačaŭsia dziakujučy sumiesnaj misii NASA i Indyjskaj arhanizacyi kaśmičnych daśledavańniaŭ. Spadarožnik NISAR, jaki pracavaŭ na arbicie ŭ kancy 2025 — pačatku 2026 hoda, dazvoliŭ navukoŭcam atrymać zvyšdakładnyja vymiareńni źmianieńniaŭ ziamnoj pavierchni ŭ režymie realnaha času. Takija nazirańni dazvalajuć dakumientavać źmieny ŭ miežach horada, acanić maštab prablemy i adkryvajuć mahčymaści dla raspracoŭki efiektyŭnych mier pa źmiakčeńni nastupstvaŭ.
Kali raniej ułady Mieksiki abmiažoŭvalisia kropkavym umacavańniem padmurkaŭ asobnych pomnikaŭ, to ciapier, na fonie abvastreńnia prablem z vadoj, čynoŭniki pačali vydzialać bolš srodkaŭ na daśledavańni.
Navukoŭcy spadziajucca, što ŭ budučyni hetaja technałohija dapamoža detalova sačyć za kožnym asobnym budynkam i budzie karysnaj va ŭsim śviecie — ad nazirańnia za raskolinami ŭ ziamnoj kary da manitorynhu rastavańnia ledavikoŭ Antarktydy.
Dla Miechika ž mienavita dakładnaje razumieńnie miechanizmaŭ asiadańnia, atrymanaje z arbity, pavinna stać pieršym krokam da vyratavańnia krytyčnaj infrastruktury horada.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7676
Kamientary