Na paŭdniovym uschodzie Kitaja, u pravincyi Fudziań, adbyŭsia adzin z samych maštabnych pažaraŭ apošnich hadoŭ. Uzharańnie ŭźnikła 9 lipienia na abutkovaj fabrycy kampanii Huiteng u horadzie Dzińdzian i zabrała žyćci 28 čałaviek, paviedamlaje Associated Press.
Pavodle aficyjnych danych, u momant pažaru ŭ piacipaviarchovym budynku znachodzilisia 239 čałaviek — 237 rabotnikaŭ i dvoje naviedvalnikaŭ. Vyratavać udałosia 213 čałaviek. Dvoje paciarpiełych pamierli ŭ balnicy, a jašče 26 čałaviek, jakija spačatku ličylisia źnikłymi bieź viestak, paźniej byli znojdzienyja zahinułymi.
Pažar pačaŭsia na pieršym paviersie budynka, dzie raźmiaščalisia vytvorčy cech i skład. Ahniu spryjała vialikaja kolkaść lohkaŭzharalnych materyjałaŭ, jakija vykarystoŭvajucca pry vytvorčaści abutku. Akramia taho, na leśvičnych pralotach zachoŭvalisia materyjały dla padešvaŭ, što značna ŭskładniła pracu pažarnikaŭ i zapavoliła tušeńnie.
Dla likvidacyi pažaru byli nakiravany 183 ratavalniki i 35 adzinak techniki. Adkrytaje hareńnie ŭdałosia patušyć prykładna praz čatyry hadziny, a ŭsiaho ŭ pošukava-vyratavalnaj apieracyi ŭdzielničali bolš za 500 čałaviek.
Pryčyna pažaru pakul aficyjna nie ŭstanoŭlenaja. Uładalnika fabryki i inšych adkaznych asob zatrymali, a rachunki kampanii byli zamarožanyja na čas rasśledavańnia.
Staršynia KNR Si Dzińpin zapatrabavaŭ zrabić usio mahčymaje dla vyratavańnia ludziej, jak maha chutčej vyśvietlić pryčyny trahiedyi i pryciahnuć vinavatych da adkaznaści.
Trahiedyja znoŭ źviarnuła ŭvahu na prablemy biaśpieki pracy ŭ Kitai. Niahledziačy na ŭzmacnieńnie kantrolu, vytvorčyja avaryi tam praciahvajuć adbyvacca. Pavodle aficyjnaj statystyki, u 2025 hodzie ŭ krainie adbyłosia kala 20 tysiač niaščasnych vypadkaŭ na vytvorčaści, u jakich zahinuli bolš za 18 tysiač čałaviek.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary