Łukašenka budzie pieršym siarod trecich?

Alaksandar Łukašenka narešcie vyjšaŭ u śviet. Toj, jaki pryniata nazyvać «trecim». Praŭda, słabaraźvityja krainy, što da jaho naležać, nazyvajuć siabie «krainami, jakija raźvivajucca». Heta ŭ asnoŭnym krainy Azii, Afryki i Łacinskaj Ameryki. Siarod ich, zrazumieła, jość davoli bahatyja – takija jak Brazilija ci Małajzija, jość krainy ź siarednim uzroŭniem dachodaŭ – Balivija, Venesueła, Nihieryja, a jość zusim biednyja – Kuba, Paŭnočnaja Kareja. U kampanii hetych krainaŭ čamuści apynułasia Biełaruś – dobraachvotna. Tolki jana, dy jašče ekzatyčnaja Malta pradstaŭlali na forumie niedałučanych krainaŭ u Havanie Eŭropu.

Nia ŭsie krainy treciaha śvietu ŭvachodziać u Ruch niedałučanych krainaŭ. Ale ŭsie biez vyklučeńnia krainy, jakija ŭ jaho ŭvachodziać, majuć prablemy z ekanamičnym i sacyjalnym raźvićciom, a taksama z demakratyjaj. Nia ŭsie krainy prysłali na kanferencyju kiraŭnikoŭ vyšejšaha ranhu. Pieravažnaja bolšaść vysokapastaŭlenych haściej, jakija źjechalisia na samit u stalicu Kuby, majuć słavu dyktataraŭ, pačynajučy ad kubinskaha kamandante Fidela Kastra i da prezydenta Ekvataryjalnaj Hviniei Teadora Mbasoha.

Pamiž imi – jašče cełaja plajada adyjoznych asobaŭ. Naprykład, prezydent Irana Achmadzinižad, jaki ličyć, što treba ścierci Izrail z pavierchni Ziamli (čamu b nie z dapamohaj atamnaj zbroi?). Albo siabra Łukašenki prezydent Venesueły Uha Čaves, jakoha nienavidzić, prynamsi, pałova nasielnictva hetaj krainy. Nie pryjechaŭ na samit tolki kiraŭnik Paŭnočnaj Karei Kim Čen Ir – ale tolki tamu, što jon uvohule nikudy nie lataje ź mierkavańniaŭ biaśpieki.

Ruch niedałučeńnia ŭźnik na piku chałodnaj vajny, u pačatku 60-ch hadoŭ minułaha stahodździa. U jaho ŭvajšli krainy, jakija nie chacieli dałučacca ni da bloku NATO na Zachadzie ni da Varšaŭskaj damovy na Ŭschodzie. Kala vytokaŭ ruchu stajali takija nieardynarnyja asoby jak premjer-ministr Indyi Džavacharłał Neru, prezydent Jehiptu Hamal abdel Naser i kiraŭnik sacyjalistyčnaj Juhasłavii Josip Broz Cita (što samo pa sabie było tady dziorzkim vyklikam Kramlu). Nie zastałasia ŭ baku i Kuba. Ale jana mahła nazyvacca niedałučanaj krainaj tolki farmalna. Bo nasamreč aficyjnaj idealohijaj na vostravie Svabody staŭ kamunizm, a sama Kuba apynułasia ŭ poŭnaj zaležnaści ad ekanamičnaj dapamohi SSSR, zrabiłasia jahonym syravinavym prydatkam.

U 1960-ja hady kubinskija revalucyjanery Če Hievara i Fidel Kastra karystalisia vialikaj papularnaściu nia tolki ŭ Savieckim Sajuzie, ale siarod lavackaj moładzi va ŭsim śviecie. Ale prajšoŭ čas, i kamandante Fidel pieratvaryŭsia ŭ karykaturu na samoha siabie. Stary, schudnieły paśla pieraniesienaj aperacyi na kiškach, z paŭvarjackim pozirkam z-pad sivych brovaŭ – u takim vyhladzie jon paŭstaŭ na ekranie kubinskaha telebačańnia. Na forum jon tak i nia zmoh pryjści, choć i byŭ abrany staršyniom Ruchu niedałučeńnia. Heta vyhladaje sapraŭdy symbalična, bo i sam ruch pieratvaryŭsia ŭ anachranizm, u pieražytak minułaha.

Samit u Havanie nahadvaŭ mitynh adviazanych antyhlabalistaŭ, dzie vysokija kiraŭniki słabaraźvitych krainaŭ, nie vybirajučy vyrazaŭ, družna hanili ZŠA i ŭvohule Zachad, jaki, nibyta, adzin vinavaty va ŭsich biedach, vojnach i niastačy treciaha śvietu. I nichto z hetych kiraŭnikoŭ, atrymlivałasia, nie niasie adkaznaści pierad ułasnym narodam za svaju ŭłasnuju pravalnuju palityku.

Kiraŭnik Biełarusi abiacaŭ, što jaho kraina stanie apiryščam Ruchu ŭ Eŭropie. Ź jakoj metaj? Kab eŭrapiejskija krainy zrabilisia takimi samymi «biednymi, ale hordymi», jak niekatoryja krainy Azii i Afryki? Alaksandar Łukašenka lubić pachvalacca stabilnaściu ŭ svajoj krainie. Jon nibyta zabyŭ, što teraryzm, relihijny fanatyzm na pačatku 21 stahodździa pryjšli z tych krainaŭ, jakija ličać siabie niedałučanymi: ź Blizkaha i Siaredniaha Ŭschodu.

Małajzija, Vijetnam, PAR, Venesueła, Balivija, Jehipiet, Ałžyr i Iran – voś śpis zamiežnych vizytaŭ Łukašenki na bližejšy čas. Heta, treba razumieć, śpis pryjarytetaŭ zamiežnaj palityki Respubliki Biełaruś. I śpis mahčymych sajuźnikaŭ, kali nie ličyć Rasiei? Vyhladaje, Biełaruś moža być nieŭzabavie adkinutaja navat nie ŭ časy kolišniaha SSSR, ale ŭ časy siaredniaviečča – epochu relihijnych vojnaŭ i tatalnaha abskurantyzmu.

• 0
• 0
• 0
• 0
• 0
• 0
• 0
• 0